O‘zbekiston kasaba uyushmalari Federatsiyasi raisi etib Qudratilla Rafiqov bir ovozdan saylandi. Uning nomzodi Oqsoqollar kengashi tomonidan tavsiya qilindi.
Bandlik va mehnat munosabatlari vazirligi qariyb 900 nafar bangladeshlikka O‘zbekistonda ishlash uchun ruxsat berilmaganini aytdi. Uzbekistan GTL va ENTER Engineering ishlash huquqi uchun tasdiqnomani olish yuzasidan murojaat qilmagan. Mazkur holatga Qonunchilik palatasi deputati munosabat bildirib, «O‘zimiznikilarning rizqini qirqishi qanchalik to‘g‘ri bo‘larkin?» — dedi.
Prezident qarori bilan Sirdaryo viloyatidagi ko‘p tarmoqli poliklinikalarda tajriba tariqasida «To‘g‘ri ovqatlanish va sog‘lom turmush tarzi» xonalari tashkil etiladi. O‘rganishlar natijasida bu amaliyot butun respublikada hayotga tadbiq etiladi.
Tashqi ishlar vaziri Abdulaziz Kamilov Afg‘oniston Islom Respublikasi Milliy yarashuv oliy kengashi raisi Abdulla Abdulla bilan uchrashdi. Suhbatda asosiy e’tibor Afg‘onistonni Markaziy Osiyodagi integratsiya jarayonlariga jalb qilish hamda mustahkam tinchlik o‘rnatishga qaratildi.
Markaziy saylov komissiyasi bir vaqtning o‘zida bir nechta joyga nomzod ko‘rsatilganida, saylovoldi targ‘iboti hamda uchrashuvlar o‘tkazishda muammolar yuzaga kelganini ma’lum qildi. Shunga ko‘ra, Konstitutsiyaning 117-moddasiga tegishlicha o‘zgartirish kiritishni taklif etmoqda.
Maktablarda darsdan oldin madhiya kuylash, tanaffusda vatan mavzusidagi she’r va qo‘shiqlar eshittirish so‘raldi. Ushbu mazmundagi xat Xalq ta’limi vazirligi tasarrufidagi maktablar rahbarlariga yuborilgan.
Prezident raisligida Qoraqalpog‘istonni rivojlantirish masalalariga bag‘ishlangan videoselektor bo‘lib o‘tdi. Unda 856 km avtomobil yo‘llarini ta’mirlash, ichimlik suvi ta’minotini 70 foizga yetkazish hamda 9 mingdan ortiq arzon uylar bunyod etish ta’kidlandi. «Umuman olganda, Qoraqalpog‘istonda ishlarni yangicha tashkil etish va nazorat tizimi o‘rnatiladi», — dedi prezident.
Shavkat Mirziyoyev Shanxay hamkorlik tashkilotiga a’zo davlatlar rahbarlari kengashi majlisida Tog‘li Qorabog‘ bo‘yicha kelishuvga erishilganini qo‘llab-quvvatlashini ta’kidlab, kelgusida vaziyat yanada barqarorlashishiga umid bildirdi. Prezident tashkilotga a’zo mamlakatlarni muhtoj aholi qatlamiga yordam ko‘rsatish, inqirozga qarshi kurash borasida umumiy dastur ishlab chiqishda hamkorlikka chaqirdi.
Hukumat qarori bilan loyiha-qidiruv va qurilish-pudrat tashkilotlari reytingi yuritilishi belgilanmoqda. Tender savdolari aynan mazkur reyting natijalariga ko‘ra o‘tkaziladi va savdolarda yuqori o‘rinda turuvchi tashkilotlar ustunlikka ega bo‘ladi.
Moxir Valiyev Kadastr agentligining Davlat kadastrlari palatasi raisi etib tayinlandi.
Bunga qadar Sirdaryo viloyati prokurori lavozimida faoliyat olib borgan Ravshan Masharipov Samarqand viloyati prokurori etib tayinlandi.
Prezident Shavkat Mirziyoyev 10 noyabr kuni Shanxay hamkorlik tashkilotiga a’zo davlatlar rahbarlari kengashining videoanjuman shaklida o‘tadigan majlisida ishtirok etadi.
O‘zbekiston raisligida Mustaqil Davlatlar Hamdo‘stligi Hukumat rahbarlari kengashining videokonferensaloqa shaklidagi majlisi bo‘lib o‘tdi. Majlis yakunlari bo‘yicha transport, energetika, qurilish, ta’lim, madaniyat, turizm, jismoniy tarbiya va sport sohalarini, shuningdek, yoshlar siyosatini rivojlantirishga oid jami 23 hujjat imzolandi.
«O‘zqurilishmateriallari» uyushmasi raisi lavozimida faoliyat olib borgan Botir Zaripov Buxoro viloyati hokimi vazifasini bajaruvchi etib tayinlandi.
Murad Qurbanov Qoraqalpog‘iston Respublikasi sog‘liqni saqlash vaziri etib tayinlandi. Oldingi vazir may oyida tayinlangan edi.
Energetika vaziri o‘rinbosari Behzot Normatov O‘zbekiston «Lukoyl»dan eksport bahosidan past narxda 5 mlrd kub metr gaz xarid qilganini ma’lum qildi. «Agar yana qo‘shimcha talab bo‘lsa, kelishilgan narxlarda ichki bozorga yo‘naltirishimiz mumkin», — deya ta’kidladi.
Shavkat Mirziyoyev tibbiyot xodimlarini bayram bilan qutlab, 2020 yil O‘zbekiston sog‘liqni saqlash tizimi uchun mislsiz sinov, izchil rivojlanish va yangi tajriba orttirish yili bo‘lganini ta’kidladi.
CNN, AP, The New York Times va NBC Jo Bayden AQSH prezidentlik saylovlarida g‘alabani qo‘lga kiritganini yozmoqda. U AQSHning eng keksa va 46 prezidenti bo‘ladi. Bayden hisobida 284 ta, Trampda esa — 214 ta saylovchilar ovozi mavjud.
Korrupsiyaga qarshi kurashish agentligi direktori Akmal Burxonov Markaziy bank rahbariyatida korrupsiyani oldini olishga xohish borligiga shubha bildirdi. Uning aytishicha, “komplayens nazorat” tizimi bo‘yicha o‘qitishga tijorat banklari Markaziy bank rahbariyati orqali “vaqt yo‘q” deya javob bergan.
Kelgusi yildan boshlab bolalarga vitaminlar, parazitlarga qarshi dorilar, yod preparatlari, 35 yoshgacha bo‘lgan ayollarga foliy kislotasi va ferrum bepul beriladi. Prezident ushbu amaliyot bekor qilingani bois davolanish uchun 10 marta ko‘proq mablag‘ sarflashga to‘g‘ri kelayotganini qayd etdi.
Qo‘shimcha imkoniyatlarga ega bulish uchun saytda ro‘yxatdan o‘ting