Jamiyat
13 mart kuni O‘zbekistonda sodir bo‘lgan eng muhim xabarlar dayjesti
Rossiyaning Ukrainaga qarshi mojarosida O‘zbekiston qaysi tarafdaligini aytgan prezident, Toshkentda o‘zini 7-qavatdan tashlagan rossiyalik, amaldorlarning xizmat safarlari va tadbirlarda sovg‘a olishi taqiqlangani, maktabda trenddagi qo‘shiqqa video olgan direktor va boshqalar — «Gazeta.uz»ning kun dayjestida.
Toshkentda Rossiya fuqarosi o‘zini 7-qavatdan tashlab yubordi
Toshkent markazida bir kishi turar-joy binosining 7-qavatidagi derazadan o‘zini tashlab halok bo‘ldi. O‘zbekiston Bosh prokuraturasi uning Rossiya fuqarosi ekanligini ma’lum qildi.
Toshkentdagi maktabda trenddagi qo‘shiqqa video olgan direktor va o‘rinbosarlar ogohlantirildi
Yakkasaroydagi 91-maktabda direktor va uning o‘rinbosarlari mashhur «Za dengi da» qo‘shig‘iga qalbaki dollar sochgan holda olgan hazilomuz videosi tarqaldi. Tuman hokimligi pedagoglar jiddiy ogohlantirilganini ma’lum qildi. O‘qituvchilardan birini esa ishdan bo‘shatishmoqchi ekani aytilmoqda.
Samarqandda madaniy meros obyektiga jiddiy zarar yetkazgan tadbirkor qamalgani ma’lum qilindi
Samarqand shahridagi xususiy mulkda bo‘lgan moddiy madaniy meros obyektiga zarar yetkazilgani haqida xabar tarqaldi. Madaniy meros agentligi aybdor tadbirkor ozodlikdan mahrum etilganini ma’lum qildi.
Toshkent viloyatida 420 ming gektar yerni $700 mingga sotishga uringanlar qo‘lga olindi
DXX Ohangaron tumanida 420 ming gektar yerni $700 mingga sotishda gumonlangan ferma rahbari, uning otasi va mahalla raisini qo‘lga oldi. Shuningdek, Jizzax va Andijonda ham noqonuniy yer sotish holatlari aniqlandi.
Surxondaryoga ijtimoiy masalalar uchun davlat dasturidan tashqari qo‘shimcha 465 mlrd so‘m ajratiladi
Prezident Surxondaryoga o‘tgan yig‘ilishda viloyatga ijtimoiy muammolarni hal qilishga davlat dasturlarida ko‘zda tutilgan 1,5 trln so‘mga qo‘shimcha ravishda 465 mlrd so‘m ajratilishini ma’lum qilindi. Shuningdek, agrar soha, ichimlik suvi va tadbirkorlik loyihalariga qo‘shimcha 328 mln dollar jalb qilinadi.
Foto: Chotqol davlat qo‘riqxonasida kezib yurgan Tyan-Shan qo‘ng‘ir ayig‘i
Tabiat resurslari vazirligi Chotqol davlat qo‘riqxonasida fotoqopqonga tushib qolgan Tyan-Shan qo‘ng‘ir ayig‘ining noyob kadrlarini e’lon qildi.
O‘zbekistonda V International Tashkent Marathon va Yangi Nafas yugurish musobaqalari bo‘lib o‘tdi
V International Tashkent Marathon hamda 14 shaharda bir vaqtda o‘tkazilgan Yangi Nafas musobaqalari yugurish bo‘yicha sport marafonlari mavsumini ochib berishdi.
O‘zbekistonda yoshlar faol nuroniylarga biriktiriladi
«Bir nuroniy o‘n yoshga mas’ul» tamoyiliga muvofiq yoshlar har bir mahalladagi faol nuroniylarga biriktiriladi. Shuningdek, faol keksalar muammoli oilalar bilan shug‘ullanadi. Ishida ijobiy natija ko‘rsatgan nuroniylar rag‘batlantiriladi.
Vatan himoyasi yo‘lida halok bo‘lgan harbiylarning oilasiga beriladigan imtiyozlar ko‘payadi
Vatan himoyasi yo‘lida halok bo‘lgan harbiylarning oilasiga biryo‘la beriladigan nafaqa ularning oxirgi maosh yig‘indisi 150 baravarigacha oshiriladi. Shuningdek, bepul tibbiy yordam va maktabgacha ta’lim, OTM uchun grant, daromad solig‘idan ozod etish kabi tartiblar tatbiq etiladi.
Toshkent-Qarshi va Samarqand-Toshkent yo‘nalishida qo‘shimcha poyezd qatnovlari yo‘lga qo‘yiladi
Bayram kunlarida yo‘lovchilarni tashish maqsadida 17−23 mart kunlari Samarqand-Toshkent va 20−21 mart kunlari Toshkent-Qarshi yo‘nalishida qo‘shimcha poyezd qatnovlari yo‘lga qo‘yiladi. Qolaversa, 20 martdan Shahrisabz-Samarqand yo‘nalishida tezyurar yo‘lovchi poyezd harakati ish boshlaydi.
Hafta davomida quruq ob-havo kuzatiladi
Hafta davomida asosan kam bulutli, quruq ob-havo kuzatiladi. Harorat +22…+28 daraja bo‘ladi. Haftaning ikkinchi yarmida Qozog‘iston bo‘ylab o‘tayotgan antitsiklon kunduzgi havo haroratini biroz pasaytiradi. 13−15 martda esa tog‘li hududlarda qor ko‘chishi xavfi bor.
Toshkentda 2 ta yirik chinor yoqib yuborildi
Poytaxtning Yangihayot tumanida 2 ta yirik chinor noma’lum shaxslar tomonidan yoqib ketildi. Ekoboshqarma holatni o‘rganmoqda. «Daraxtlar qurilish uchun yoqilgani haqidagi taxminlar haqiqatga mos emas», — deya izoh berdi boshqarma.
«Gender zo‘ravonlik o‘z-o‘zidan yo‘qolmaydi — hozir harakat qilishning ayni payti» — Matilda Dimovska
Jamiyatning har qanday qismiga nisbatan istalgan ko‘rinishdagi zo‘ravonlik uning har bir vakiliga o‘z ta’sirini o‘tkazadi, deya ta’kidlaydi BMTTDning O‘zbekistondagi doimiy vakili Matilda Dimovska. «Gazeta.uz» uchun maqolasida u gender zo‘ravonlik uchun jinoiy javobgarlik belgilashga chaqiradi.
Samarqandda qiziga o‘qituvchi tegajog‘lik qilganini aytib, tuhmat qilgan ayol jarimaga tortildi
Kattaqo‘rg‘onlik ayol qiziga o‘qituvchi tegajog‘lik qilganini aytgandi. Sud buning tuhmat ekanini bildirib, ayol va o‘qituvchi bilan yoqalashgan qizning otasiga jarima belgiladi.
O‘zbekistonda amaldorlarning xizmat safarlari va tadbirlarda sovg‘a olishi taqiqlandi
Davlat fuqarolik xizmatchisi tomonidan xalqaro va boshqa rasmiy tadbirlarda sovg‘a olish tartibi belgilandi. Unga ko‘ra, amaldorlar O‘zbekistondagi xizmat safarlari va tadbirlarda sovg‘a olishi mumkin emas. Xorijda olingan sovg‘a qiymati 1,2 mln so‘mdan ko‘p bo‘lsa, u davlat organi balansiga kirim qilinadi.
Farg‘onada o‘quvchi qiz o‘zini 16 qavatli uy tomidan tashlamoqchi bo‘ldi
Farg‘onada 14 yoshli qiz o‘zini 16 qavatli uyning tomidan tashlamoqchi bo‘ldi. Uni IIB va FVV xodimlari tomdan sog‘-omon tushirib oldi. Voqeaga qizning o‘gay otasi bilan janjallashib qolgani sabab bo‘lgani aytilmoqda.
«Direktor ishdan bo‘shashga majburladi». O‘quvchini kaltaklagan pedagog haqiqatlari
Toshkentdagi 152-maktab o‘qituvchisi o‘quvchini kaltaklagani aks etgan video muhokamalarga sabab bo‘ldi. «Gazeta.uz» pedagog Gulchehra Mamajonovaga mikrofon tutdi. Uning so‘zlariga ko‘ra, direktorning unga nisbatan shaxsiy adovati bo‘lgan va ishdan bo‘shatishga uringan. Direktor esa intervyu berishdan bosh tortdi.
SSV tizimidagi qator rahbarlar lavozimidan ozod etildi
SSV rahbari Amrillo Inoyatov o‘tkazgan hay’at yig‘ilishida O‘zmedimpeks kompaniyasi direktori, Bolalar milliy tibbiyot markazi direktori v.b. va boshqarmalar boshliqlari ishdan olindi. Bunga ularning topshiriqlarni o‘z vaqtida bajarmagani va yo‘nalishida yetarli natija ko‘rsatmagani sabab bo‘lgan.
Farhod Mannopov vafotidan so‘ng Star Med Center klinikasi faoliyati vaqtincha to‘xtatildi
SSV vayner Farhod Mannopov o‘limi bo‘yicha laborator tahlil va MSKT tekshiruvlari natijalarini e’lon qildi. Aytilishicha, bemorga rinoseptoplastika amaliyoti uchun narkoz berilgan, biroq operatsiya davrida ahvoli yomonlashib, o‘lim qayd etilgan. Hozirda Star Med Center klinikasi faoliyati vaqtincha to‘xtatilgan.
Eng ko‘p o‘qilgan xabarlar | So‘nggi yangiliklar
Qo‘shimcha imkoniyatlarga ega bulish uchun saytda ro‘yxatdan o‘ting