Siyosat
Hokimlarning ish o‘rni yaratish bo‘yicha rejalari qoniqarsiz — Shavkat Mirziyoyev
Prezident hokimlarning ish o‘rinlari yaratish bo‘yicha rejalari qoniqarsiz ekanligini tanqid qildi. Viloyat hokimlariga qo‘shimcha 110 ming ish o‘rni tashkil etish, kamida 1 mlrd dollarlik eksport uchun sharoit yaratish vazifasi qo‘yildi. Bundan tashqari, EIZlardagi loyihalarni ekspertiza qilish vakolati hamda sanoat zonalarning ma’muriy kengashlari vakolati Investitsiyalar vazirligiga o‘tkazildi. Zonalardagi yerlar endi hokimliklar tomonidan emas, balki direksiyalar tomonidan auksionga qo‘yiladi.
Konstitutsiyani isloh qilish bo‘yicha bugungacha qanday takliflar kelib tushdi?
O‘zbekiston Bosh qonuniga o‘zgartirishlar kiritish bo‘yicha Konstitutsiyaviy komissiya o‘zining birinchi yig‘ilishini o‘tkazdi. 6 kun davomida 13,15, 29, 37, 40, 41, 53, 78 va 80-moddalarga bog‘liq takliflar kelib tushgan. Komissiya matbuot kotibi Odiljon Tojiyev prezidentga nomzod bo‘yicha talablar va vakolatlar muddati belgilangan 90-modda yuzasidan taklif yuborilgan yoki yo‘qligi haqidagi savolga javob berdi.
«Konstitutsiyani o‘zgartirish bo‘yicha taklif yuborish qulay va inklyuziv bo‘lishi kerak»
Konstitutsiyaviy komissiya a’zosi, deputat Bobur Bekmurodov Asosiy qonunni isloh qilish bo‘yicha takliflarni qabul qilish, saralash va qonun loyihasida aks ettirish jarayoni qanday amalga oshirilishini tushuntirib berdi. Uning so‘zlariga ko‘ra, takliflar veb-sahifa, Telegram-bot, pochta, davlat tashkilotlari orqali qabul qilinadi, tahlilchilar guruhi uni saralaydi va komissiyaga kiritadi. «Asosiy prinsip — bu taklif yuborish qulay va inklyuziv bo‘lishi kerak», — dedi u.
Xitoy O‘zbekistondagi ijtimoiy loyihalarga beg‘araz yordam ajratadi
O‘zbekiston Xitoydan mamlakatda qo‘shma ijtimoiy ahamiyatga ega loyihalarni amalga oshirish uchun 37,5 mln dollar beg‘araz moliyaviy yordam oladi.
Prezident — bitiruvchilarga: «O‘zbekiston ulkan imkoniyatlar mamlakatiga aylanib bormoqda»
Shavkat Mirziyoyev maktab bitiruvchilarini mustaqil hayotga qadam tashlayotganlari bilan tabrikladi. Prezident O‘zbekiston ulkan imkoniyatlar mamlakatiga aylanib borayotganini ta’kidlab, oldiga aniq maqsad qo‘ygan yoshlarning ko‘zlagan cho‘qqilarga erishishlariga ishonch bildirdi.
Adliya vaziriga o‘rinbosar tayinlandi
Intellektual mulk agentligi direktori lavozimida ishlab kelgan Tulkin Abdusattarov adliya vaziri o‘rinbosari etib tayinlandi.
Shavkat Mirziyoyev va Vladimir Putin hamkorlik masalalarini muhokama qildi
O‘zbekiston va Rossiya prezidentlari telefon orqali muloqotda O‘zbekiston-Rossiya munosabatlarini rivojlantirish, mintaqaviy kun tartibi va xalqaro siyosat masalalarini muhokama qildilar.
«To‘g‘ridan-to‘g‘ri amal qiladigan qonunlarni ishlab chiqish vaqti keldi» — Sodiq Safoyev
Davlat ilgarigi davrlardan farqli o‘laroq, nafaqat boshqaruv, balki fuqarolarga xizmat ko‘rsatish markaziga aylanib bormoqda, dedi Senat raisining birinchi o‘rinbosari Sodiq Safoyev. Shunday ekan, amaldorlarning faoliyatiga baho berish, muammolarni parlament usullarida hal etish, qonunlarni qabul qilishda yetuk ekspertlarga tayanish zarur. «To‘g‘ridan-to‘g‘ri amal qiladigan qonunlarni ishlab chiqish amaliyotini keng joriy etish vaqti keldi deb o‘ylayman», — dedi u.
O‘zbekiston va Qozog‘iston favqulodda vaziyatlarni bartaraf etishda hamkorlik qiladi
Shavkat Mirziyoyev O‘zbekiston va Qozog‘iston o‘rtasida favqulodda vaziyatlarning oldini olish va ularni bartaraf etishda hamkorlik qilish to‘g‘risidagi hukumatlararo bitimni tasdiqladi. Tomonlar tabiiy va texnogen xususiyatli favqulodda vaziyatlarning monitoringi va prognozi bo‘yicha ma’lumotlar almashadi, ularni bartaraf etishda o‘zaro hamkorlik qiladi.
«Islohotlar buyruq bilan muvafaqiyatli amalga oshirilishi mushkul» — Sodiq Safoyev
Senat raisining birinchi o‘rinbosari Sodiq Safoyev islohotlar buyruq bilan muvafaqiyatli amalga oshirilishi mushkulligi va tub o‘zgarishlar aholi ularni chuqur va to‘la anglashiga bog‘liqligini ta’kidladi. «Taraqqiyotni ta’minlovchi tizimli mexanizmlar ichida eng muhimi — hokimiyatning uch tarmog‘i o‘rtasida bir-birini tiyib turish tizimini takomillashtirishdan iborat», — dedi u. Senator shuningdek, davlat hokimiyatining aholi oldida javobgarligini ta’minlash zarurligini qayd etdi.
«Hozir butun dunyoda konstitutsiyaviy islohotlar sharpasi kezib yuribdi» — Akmal Saidov
Seshanba kuni Konstitutsiyaviy komissiya rahbari Akmal Saidov Asosiy qonun islohoti zaruratini Karl Marks va Fridrix Engelsning «Kommunistik partiya manifesti»ga tayanib asoslantirishga harakat qildi. «Hozir butun dunyoda konstitutsiyaviy islohotlar sharpasi kezib yuribdi», — dedi u.
«Sportchilarni tayyorlash 30 yil oldingi dasturlar asosida amalga oshirilmoqda» — prezident
O‘zbekistonda biror sport turi bo‘yicha mahalliy olimlar tomonidan na metodika, na dastur ishlab chiqilgan. Sport diyetologiyasi, farmakologiyasi, psixologiyasi, kardiomashg‘ulotlar bo‘yicha mutaxassislar tayyorlanmaydi, deya tanqid qildi Shavkat Mirziyoyev sohani rivojlantirishga bag‘ishlangan yig‘ilishda. «Bugungi kunda sportchilarni tayyorlash 30 yil oldingi dasturlar asosida amalga oshirilmoqda», — dedi u.
O‘zbekistonda sportchilarni tayyorlash va seleksiya qilish bo‘yicha yangi tizim joriy qilinadi
O‘zbekistonda sportchilarni tayyorlash va seleksiya qilish bo‘yicha mutlaqo yangi tizim joriy qilinadi. Shavkat Mirziyoyev yoshlarni bolalikdanoq sportga jalb qilish borasidagi yondashuvlar o‘zgartirilishini ma’lum qildi. Buxoro tajribasi asosida — yaxshi natijaga erishgan yosh sportchilarning elektron ro‘yxati shakllantiriladi va ular maxsus guruhlarda bepul o‘qitiladi, sport maktabi trenerlarining ish haqi 35 foizga oshiriladi.
Hokim yordamchisi Oltinko‘l tumani hokimi bo‘ldi
Qo‘rg‘ontepa tumani hokimi yordamchisi Maxamadmuso Obidov Oltinko‘l tumani hokimi etib tayinlandi. U oldinroq Milliy bankning Andijon viloyati filiali rahbari ham bo‘lgan.
Angren shahriga yangi hokim tayinlandi
Alisher Rayimov Angren shahri hokimi etib tayinlandi.
AQShning O‘zbekistondagi elchisi lavozimiga Jonatan Henik nomzodi taklif etildi
Prezident Jo Bayden AQShning O‘zbekistondagi elchisi lavozimiga Jonatan Henik nomzodini ilgari surdi. 2019 yildan buyon ushbu lavozimni Deniyel Rozenblyum egallab kelmoqda.
«Siyosiy shartlarimiz yo‘q». XXR elchisi — Xitoy kreditlari haqida
Xitoyning Toshkentdagi elchisi Szyan Yan Xitoy kreditlari mamlakatlarni «qarz tuzog‘iga» tushishiga sabab bo‘layotgani haqidagi xabarlarni asossiz deb atadi. «G‘arb banklari yoki xalqaro moliya muassasalari qarz bersa — pishloq, Xitoy qarz yoki kredit bersa — tuzoq. Odamlar ba’zida farqiga bormaydilar», — dedi u.
Aziz Abduhakimov SHHT turizm vazirlariga doimiy muvofiqlashtiruvchi guruh tuzishni taklif qildi
Aziz Abduhakimov SHHTga a’zo mamlakatlar turizm vazirlariga o‘zaro hamkorlikni jadallashtirish maqsadida doimiy muvofiqlashtiruvchi guruh tuzishni taklif qildi. Guruhga turizm vazirlari o‘rinbosarlari rahbarlik qiladi va davlatlar o‘rtasida eng ommabop turistik yo‘nalishlar xaritasini tuzib chiqadi, transchegaraviy sayyohlik almashinuvi imkoniyatlarini o‘rganadi. Qolaversa, vazir qo‘shma turistik yo‘nalishlarni yaratish, elektron tijorat mahsulotlari va xizmatlarini joriy qilish zarurligini ta’kidladi.
Foto: O‘zbekiston va Qirg‘iziston xavfsizlik xizmatlari rahbarlari chegarani ko‘zdan kechirdi
O‘zbekiston Davlat xavfsizlik xizmati raisi Abdusalom Azizov Qirg‘iziston Milliy xavfsizlik davlat qo‘mitasi rahbari Qamchibek Tashiyev bilan birga vertolyotda o‘zbek-qirg‘iz chegarasining belgilanmagan qismini ko‘zdan kechirdi (foto).
«Birja nimaligini bilmaydigan tuman hokimlari ham bor» — Shavkat Mirziyoyev
Birja savdolarni ko‘paytirish bo‘yicha o‘tkazilgan yig‘ilishda davlat rahbari Jomboy va Uychi tumanlarida birja orqali g‘isht hamda beton qorishmasini sotgan korxonalarni e’tirof etib, hokimlar tomonidan bu tajriba yaxshi yo‘lga qo‘yilmaganini tanqid qildi. «Ochiq aytish kerak, hali aksariyat hokimlar masalaning ichiga kirmagan, birja nimaligini bilmaydigan tuman hokimlari ham bor», — dedi u. Prezident yil oxirigacha o‘z mahsulotlarini birjalarga olib chiqadigan tadbirkorlar sonini 2 baravarga, mahsulotlar turini esa 5 baravarga oshirishni topshirdi.
Eng ko‘p o‘qilgan xabarlar | So‘nggi yangiliklar
- Malayziya bosh vaziri O‘zbekistonga keldi (foto)
- Ziyorat turizmi, islom moliyasi, “Halol” sertifikatlashtirish — O‘zbekiston va Malayziya o‘rtasida qo‘shma bayonot imzolandi
- Senatning ellik ikkinchi yalpi majlisi 18-may kuni chaqiriladi
- Qozog‘iston prezidenti “Markaziy Osiyo davlatlarini bo‘lmoqchi bo‘lgan tashqi kuchlarga” qarshilik ko‘rsatishga chaqirdi
Qo‘shimcha imkoniyatlarga ega bulish uchun saytda ro‘yxatdan o‘ting