Payshanba Shavkat Mirziyoyev kuni hududlarda maxsus iqtisodiy va kichik sanoat zonalari faoliyati yuzasidan yig‘ilish o‘tkazdi, deb xabar berdi uning matbuot kotibi Sherzod Asadov xabar berdi.
Yig‘ilishda prezident hokimlarning ajratilayotgan mablag‘lar hisobidan ish o‘rinlari yaratish bo‘yicha rejalari qoniqarsiz ekanligini ta’kidladi.
«Bir hafta muddatda ushbu rejalarni ajratilayotgan mablag‘larga mos ravishda qayta ko‘rib chiqishga topshiriq berildi. Umuman, viloyat hokimlari, Investitsiyalar va tashqi savdo vazirligi yil yakuniga qadar sanoat zonalarida 2 mingta yangi loyihani ishga tushirishi shartligi ko‘rsatib o‘tildi», — deyiladi xabarda.
Ta’kidlanishicha, viloyat hokimlari oldiga yangi loyihalar hisobiga qo‘shimcha 110 mingta ish o‘rni yaratish, 17,5 trillion so‘mlik mahsulot ishlab chiqarish, kamida 1 milliard dollarlik eksport qilish uchun sharoit yaratish vazifasi qo‘yildi.
Bundan tashqari, infratuzilmasi hal etilgan sanoat zonalarida 1 mingdan ziyod yangi loyihaga yetadigan yer maydonlari mavjudligi ko‘rsatib o‘tildi. Ikki oy muddatda 174 ta maxsus zonada kamida 250 ta yer maydonini auksionga chiqarib, loyihalarni boshlashga ko‘rsatma berildi.
Shuningdek, sanoat zonalariga loyihani joylashtirish tartibi qayta ko‘rib chiqilib, byurokratiyadan xoli yangi tizim yaratilishi ta’kidlandi.
Jumladan:
- erkin iqtisodiy zonalarda amalga oshiriladigan loyihalarni ekspertiza qilish vakolati Investitsiyalar vazirligiga o‘tkaziladi;
- sanoat zonalari bo‘yicha ma’muriy kengashlar tugatilib, ularning vakolatlari Investitsiyalar vazirligiga beriladi;
- sanoat zonalari ishtirokchilariga imtiyozlarni qo‘llash uchun Loyihalarni va import kontraktlarini kompleks ekspertiza qilish markazining xulosasini olish tartibi bekor qilinadi. Bundan buyon nazoratni Davlat bojxona qo‘mitasi amalga oshiradi;
- sanoat zonalaridagi yerlar auksionga direksiyalar tomonidan chiqariladi (hozirda hokimlik tomonidan auksionga qo‘yiladi);
- investitsiya majburiyatlari to‘liq bajarilganidan keyin kichik sanoat zonalaridagi obyektlarni xususiylashtirishga ruxsat beriladi.
Qayd etilishicha, bularning hisobiga, sanoat zonalariga loyihalarni joylashtirish jarayonidagi bosqichlar amaldagi 5 tadan 2 taga kamayadi, sarf qilinadigan vaqt 3 oydan 1 oygacha qisqaradi.
Ma’lum qilinishicha, prezident topshirig‘iga asosan maxsus ishchi guruh sanoat zonalarining infratuzilmasini xatlovdan o‘tkazgan va tumanma-tuman loyihalar ro‘yxatini shakllantirgan. Qayd etilishicha, eng avvalo, sanoat zonalarida bo‘sh turgan 6,6 ming gektar maydonning elektr, suv, yo‘l va boshqa infratuzilma masalalari hal qilib beriladi.
Shu munosabat bilan mutasaddilar, viloyat hokimlariga:
- bir oy muddatda 40 ta sanoat zonasidagi 120 km yo‘l bo‘yicha pudratchilarni aniqlab, qurilish ishlarini boshlash;
- 1 oktabrga qadar 246 ta sanoat zonasini elektr tarmog‘i, transformator va podstansiyalar bilan ta’minlash;
- joriy yilda 200 ta sanoat zonasida 555 km suv tarmog‘i va 110 ta suv inshootini qurib yakunlash topshirildi.
Umuman, sanoat zonalari infratuzilmasini yaxshilash uchun joriy yilda 1,5 trln so‘m yoki 2021 yilga nisbatan 2 baravar ko‘p mablag‘ ajratilishi belgilandi, deyiladi xabarda.
Ma’lum bo‘lishicha, 96 ta kichik sanoat zonasining bosh rejasi haligacha tasdiqlanmagan. Shu bois ularda 3,5 trln so‘mlik 648 ta tayyor loyihalar boshlanmasdan turibdi. O‘z navbatida, davlat rahbari sanoat zonalari maydonlarining 37 foizi elektr, suv, gaz, yo‘l va kanalizatsiya bilan ta’minlanmaganini tanqid qildi, deyiladi xabarda.
Shuningdek, prezident sanoat zonalarida loyihalarni boshlash uchun tadbirkorlar 5 ta bosqichli jarayondan o‘tib, 10 turdan ortiq hujjatlarni taqdim etishi lozimligi va bunga 3 oygacha vaqt sarflanayotgani, oqibatda bugunga kelib Buxoroda 10 ta, Toshkent viloyatida 5 ta, Samarqand va Farg‘onada 1 tadan loyiha boshlanmasdan turganini aytdi.
«Biz Taraqqiyot dasturimizda kelgusi besh yilda sanoatni 1,4 baravarga oshirishni maqsad qilganmiz. Bu — juda katta marra. Shuning uchun, har bir viloyat, tuman va shahar hokimi yangi tashabbuslar ko‘rsatishi, tadbirkorlarni topib, loyihalarni ko‘paytirish bo‘yicha o‘zlarining aniq rejalariga ega bo‘lishlari zarur», — dedi davlat rahbari.
Yig‘ilishda shuningdek, bugungi kunda hududlarda 35 ta tekstil-bo‘yoq va 14 ta terini qayta ishlash bo‘yicha yangi loyihalar tayyorlangani qayd etildi. Shu munosabat bilan prezident yil yakuniga qadar tekstil-bo‘yoq va terini qayta ishlash bo‘yicha industrial parklar tashkil etish, zamonaviy tozalash inshootlarini qurish bo‘yicha loyihalarni boshlash vazifasini qo‘ydi.
Shavkat Mirziyoyev tomonidan mutasaddilar viloyat hokimlari bilan birga ushbu ishlar hisobidan 20 mingta ish o‘rni yaratishi, qo‘shimcha 250 mln dollar eksportni ta’minlashi shartligi aytildi. «Buxoro, Jizzax, Samarqand, Surxondaryo, Toshkent viloyati, Farg‘ona tadbirkorlari bu imkoniyatdan foydalanib, yuqori qo‘shilgan qiymatli mahsulotlar ishlab chiqarish bo‘yicha 630 mln dollarlik yangi loyihalarni boshlash tashabbusi bilan chiqqan. Ularni infratuzilma bilan ta’minlash uchun joriy yilda 120 mlrd so‘m ajratiladi», — dedi u.
Yig‘ilishda Samarqandda 300 gektar maydonda yangi maxsus sanoat zonasi tashkil etilishi aytildi. Shuningdek, boshqa hududlardan ham yangi loyiha takliflari bo‘lsa, ular uchun yana 50 mlrd so‘m ajratilishi belgilandi, deyiladi xabarda.
