Жаҳон
Reuters: Huawei СИ чипларига катта талаб сабаб смартфон ишлаб чиқаришни секинлаштиради
Сунъий интеллект чипларига талаб ортиб бораётгани ва АҚШ савдо чекловлари фонида Хитойнинг Huawei компанияси асосий эътиборни Ascend AI чипларини ишлаб чиқаришга қаратди ва Mate 60 смартфонларини ишлаб чиқаришни секинлаштирди, деб ёзди Reuters.
Қозоғистоннинг янги бош вазири этиб Олжас Бектенов тайинланди
Қасим-Жомарт Тоқаев Қозоғистон Президент администрацияси раҳбари Олжас Бектеновни бош вазир этиб тайинлаш тўғрисидаги фармонни имзолади. Тоқаев, шунингдек, ҳукуматнинг истеъфоси ва Бектенов номзоди юзасидан изоҳ берди.
Британия қироли Чарльз III саратон касаллигига чалинди
Буюк Британия қироли Чарльз III саратон касаллигига чалинди. Даволаниш даврида у оммавий тадбирларда камроқ қатнашади. Букингем саройининг таъкидлашича, қирол яхши кайфиятда ва тез орада давлат вазифаларига қайтишга умид қилмоқда.
Венгрияда Швециянинг НАТОга аъзо бўлиш ҳақидаги аризасига доир парламент йиғилиши тўхтатилди
Венгриянинг ҳукмрон партияси аъзолари Швециянинг НАТОга аъзо бўлиш аризаси бўйича овоз бериш жараёни ўтказилиши керак бўлган парламент йиғилишини бойкот қилди. Венгрия Европа Иттифоқидаги ҳали аризани маъқулламаган сўнгги давлат ҳисобланади.
Парижда йўлтанламас автомобиллар учун «парковка» тўловлари уч баравар оширилади
Парижликлар йўлтанламаслар учун автотураргоҳлар нархини уч баробар ошириш тартибини қўллаб-қувватлади. Франция пойтахти расмийлари шу йўл билан ушбу турдаги автомобилларнинг ҳавони ифлослантиришига қарши курашиб, йўл ҳаракати хавфсизлигини яхшилашни истамоқда.
Қозоғистонда ҳукумат истеъфога чиқди
Қозоғистон президенти Қасим-Жомарт Тоқаев ҳукуматининг истеъфоси қабул қилиш тўғрисидаги фармонни имзолади. Ҳукуматнинг истеъфога чиқиш сабаблари ҳақида маълумот берилмаган. Бош вазир вазифасини бажарувчи этиб бунгача ҳукумат раҳбарининг биринчи ўринбосари бўлган Роман Скляр тайинланди.
Бишкекдаги асосий ИЭСда портлаш содир бўлди, аҳоли иссиқ сув ва иситиш тизимидан узилди
Бишкекда шаҳарнинг катта қисмини иссиқлик билан таъминлайдиган ИЭСда портлаш содир бўлди. Аҳолига иссиқ сув таъминоти тўхтатилди, мактаб ва боғчалар онлайн таълимга ўтказилди. Қирғизистон президенти Садир Жапаров вазиятни ўз назоратига олди.
Эронга киришда Ўзбекистон фуқаролари учун визасиз режим 4 февралдан амал қилади
Эрон ТИВ мамлакатга сайёҳ сифатида келадиган 28 та давлат, жумладан, Ўзбекистон фуқаролари 4 февралдан визасиз кира олишини маълум қилди. Бундай қарор орқали Эрон ҳақидаги салбий пропаганда ва эронофобияга чек қўйилиши билдирилган.
ЖССТ: 2050 йилда саратонга чалинганлар сони 35 миллиондан ошади
ЖССТга кўра, 2050 йилга бориб дунёда саратон касаллигига чалинганлар сони 35 миллиондан ошади. Бунга нафақат аҳоли сони ва яшаш давомийлигининг ўсиб бораётгани, балки тамаки истеъмоли ёки ҳавонинг ифлосланиши каби омиллар ҳам таъсир қилади.
АҚШ аскарлари ўлимига жавобан Ироқ ва Суриядаги нишонларга зарба беради
Оқ уй Иорданиядаги АҚШ ҳарбий базасига қилинган ҳужум оқибатида америкалик аскарлар ҳалок бўлгани сабаб Ироқ ва Суриядаги Эрон билан боғлиқ нишонларга зарба бериш режаларини маъқуллади.
Европа Иттифоқи Украинага 50 млрд евролик ёрдам пакети беришга келишиб олди
Европа Иттифоқининг барча 27 давлати Украинага 50 млрд евро миқдоридаги ёрдам пакетини беришга рози бўлди. «Биз нима хавф остида турганини биламиз», — деди Еврокенгаш раҳбари Шарль Мишель. Аввалроқ Венгрия бош вазири Виктор Орбан пакетга қарши чиққан эди, бироқ ЕИ у билан муросага эриша олди.
Қозоғистон парламенти оиладаги зўравонлик учун жазони кучайтирувчи қонун лойиҳасини маъқуллади
Қозоғистон парламенти аёллар ва болалар ҳуқуқларини ҳимоя қилиш, оиладаги (маиший) зўравонлик учун жазони кучайтирувчи қонун лойиҳасини маъқуллади. Ҳужжатда калтаклашга ҳам жиноий жавобгарлик назарда тутилган.
Давлат сирларини ошкор қилишда айбланган Покистон собиқ бош вазири Имрон Хон 10 йилга қамалди
Покистон собиқ бош вазири Имрон Хон давлат сирларини ошкор қилганликда айбланиб, 10 йиллик қамоқ жазосига ҳукм қилинди. Бу сиёсатчига олти ой ичида чиқарилган иккинчи ҳукм саналади: ўтган ёзда суд уни коррупцияда айбдор деб топганди.
Ўзбекистон Transparency International ташкилотининг коррупцияни қабул қилиш индексида беш поғонага кўтарилди
Ўзбекистон Transparency International ташкилотининг коррупцияни қабул қилиш индексида 180 мамлакат ичида 121-ўринни эгаллади. Йил давомида мамлакат беш поғонага кўтарилди. Ташкилот экспертлари коррупцияга қарши янада самарали курашиш учун «кенг қамровли ислоҳотлар» зарурлигини таъкидлади.
Грузия бош вазири истеъфога чиқишини эълон қилди
Грузия бош вазири Ираклий Гарибашвили 2021 йилдан бери эгаллаб келган лавозимидан истеъфога чиқишини маълум қилди. У ҳукмрон партияни 2024 йил кузида бўлиб ўтадиган парламент сайловларига тайёрлаш учун бошқаради.
Еврокенгаш раҳбари Шарль Мишель истеъфога чиқиш фикридан қайтди
Европа Кенгаши раҳбари Шарль Мишель Европарламентнинг июнь ойида бўлиб ўтадиган сайловларида қатнашишдан бош тортди, у ўз лавозимида қолишни режалаштирмоқда. Унинг сўзларига кўра, Мишель лавозимидан эртароқ кетиш ҳақидаги қарорига бўлган «кескин муносабат» сабабли режаларини қайта кўриб чиққан.
Қатор давлатлар БМТнинг фаластинлик қочқинлар бўйича агентлигини молиялаштиришни тўхтатди
АҚШ, Буюк Британия, Германия ва Япония каби давлатлар БМТнинг фаластинлик қочқинлар бўйича агентлиги (UNRWA)ни молиялаштиришни вақтинча тўхтатди. Бунга ташкилот ходимлари ҲАМАСнинг Исроилга ҳужумига алоқадорликда айблагани сабаб бўлди. БМТ раҳбари тергов бошланганини эълон қилди.
БМТ суди Жанубий Африканинг Исроилга қарши геноцид даъвоси бўйича биринчи ҳукмни чиқарди
Халқаро суд Жанубий Африканинг Исроилга қарши иши бўйича ўзининг биринчи қарорини чиқариб, Исроил ҳукуматига Ғазо секторида геноцидга олиб келадиган хатти-ҳаракатларнинг олдини олиш учун барча чораларни кўришни буюрди. Суд зудлик билан ўт очишни тўхтатишга чақирмади.
Европа Иттифоқининг ёқилғидан чиқадиган CO2 эмиссияси сўнгги 60 йилдаги энг паст даражага етди
Европа Иттифоқида қазиб олинадиган ёқилғидан чиқадиган карбонат ангидрид (CO2) эмиссияси ўтган йили сўнгги 60 йилдаги энг паст даражага тушди. Бу натижага асосан «яшил» энергиядан фойдаланиш ҳисобига эришилди.
Эрдоған Швециянинг НАТОга аъзо бўлишини маъқуллади
Швециянинг НАТОга аъзо бўлиши ҳақидаги ҳужжат Туркия президенти Ражаб Тоййиб Эрдоған томонидан имзоланди. Швециянинг альянсга қўшилиш аризасини ратификация қилмаган фақатгина Венгрия қолди.
Қўшимча имкониятларга эга булиш учун сайтда рўйхатдан ўтинг