АҚШ Қирғизистон фуқароларига бериладиган сайёҳлик ва ишбилармонлик визаларининг амал қилиш муддатини 5 йилдан 10 йилгача узайтирди. Бундан ташқари, Қирғизистон паспорти эгалари учун B1, B2 ва B1/B2 визасига ариза топшириш учун 20 доллар миқдоридаги йиғим бекор қилинди.
АҚШ Олий суди Дональд Трамп президентликка номзодини қўйиш ҳуқуқига эга экани ҳақида қарор чиқарди. Аввалроқ Колорадо судьялари Трампга Капитолийга бостириб кирганлик иши бўйича қўйилган айбловлар туфайли уни сайлов бюллетенига киритишни тақиқлаган эди.
Ҳукумат собиқ раҳбари Наваз Шарифнинг укаси Шаҳбоз Шариф Покистоннинг янги бош вазири этиб сайланди. Унинг номзоди саккиз партиядан иборат коалиция томонидан илгари сурилганди.
Freedom House`нинг янги эркинлик рейтингида Ўзбекистон 100 баллдан 12 балл тўплади — мамлакат ҳали ҳам «эркин эмас» мақомида. Марказий Осиёнинг бошқа давлатлари ҳам шу тоифада қолмоқда. Финляндия энг юқори ўринни олди.
Олмаота яқинида 6,1 магнитудали зилзила юз берди, шаҳарда зилзила кучи 5 баллни ташкил этди. Метро фаолияти тўхтатилди, полиция кучайтирилган иш тартибига ўтказилди. Кўплаб шаҳарликлар ваҳима ичида кўчага чиқди.
Олимларнинг фикрига кўра, 2022 йилда 1 миллиарддан ортиқ одам ёки ҳар саккиз кишидан бири семизликдан азият чеккан. 1990 йилдан бери катталар орасида семизлик бўйича глобал кўрсаткич икки баравар, болалар ва ўсмирлар орасида эса тўрт баравар кўпайди.
1 мартдан бошлаб Қозоғистонда ҳукумат қарорига биноан расман ягона UTC+5 вақти ўрнатилди (аввал UTC+5 ва UTC+6 вақт зонаси бор эди). Минтақада соат миллари бир соат ортга сурилиб, Ўзбекистон билан бир хил бўлди. Европага бир соат яқинлашди.
Тожикистон энергетика тизимида йирик носозлик юз берди, Душанбе ва бир қатор вилоятларда электр таъминотида узилишлар кузатилди. Мамлакат пойтахтида иссиқлик таъминоти ўчиб, ичимлик суви таъминоти ҳам тўхтади.
Украина ёзгача Россиянинг ҳужуми тезлашиб, Украина армиясида ўқ-дорилар етишмаслиги шароитида Киев мудофаасини ёриб ўтиши мумкинлигидан хавотирда, деб ёзди Bloomberg.
Ғазо Соғлиқни сақлаш вазирлиги маълумотларига кўра, Исроил ва ХАМАС ўртасидаги уруш натижасида анклавда ҳалок бўлганлар сони 30 мингдан ошган, 70 мингдан ортиқ киши жароҳатланган.
Иллинойс штати суди АҚШнинг собиқ президенти Дональд Трампга республикачилар партиясидан ушбу штатда президентликка номзод бўлиш учун ўтказиладиган праймеризда қатнашишни тақиқлади. Аввалроқ худди шундай қарор Колорадо ва Мейн штатларида ҳам қабул қилинган эди.
Қозоғистон парламентининг қуйи палатаси мамлакатда Starlink сунъий йўлдош интернетидан фойдаланишни маъқуллади. Расмийлар Starlink тўпламларининг биринчи партиясини қабул қилиб олди, уларни қишлоқ мактабларида ўрнатиш режалаштирилган.
Шундоқ ҳам дунёда энг паст бўлган Жанубий Кореядаги туғилиш даражаси 2023 йилда яна ҳам пасайишда давом этди. Мамлакат расмийлари муаммони ҳал қилиш учун аллақачон 270 млрд долларга яқин маблағ сарфлаб улгурди, бироқ бу натижа бермаяпти.
Франциянинг Безье шаҳрида мактаб формасини кийиш бўйича ҳукумат тажрибаси бошланди. Расмийлар бу тенгсизликни камайтиришга ёрдам берадими ёки йўқ, шуни текширмоқчи. 1968 йилдан бери француз мактабларида форма кийиш мажбурий эмас.
Антарктида материгида H5N1 парранда гриппи хавфли штамми билан касалланишнинг биринчи ҳолатлари қайд этилди. Олимлар касаллик энди пингвинларнинг йирик колониялари орасида тарқалиши мумкинлигидан хавотирда.
Россияда 1 мартдан талабнинг мавсумий ортиши фонида бензин экспортига вақтинчалик тақиқ жорий этилади. Чекловлар Ўзбекистон ва ЕОИИ мамлакатларига таъсир қилмайди.
2023 йилнинг январь-сентябрь ойларида Европа Иттифоқидан Россияга 450 млн евролик юқори устуворликка эга товарлар етиб борган. Товарларнинг чорак қисми тўғридан-тўғри ЕИдан, қолгани эса Ўзбекистон, Қозоғистон, Қирғизистон, Хитой, БАА каби давлатлар орқали Россияга етиб борган, деб ёзмоқда Bloomberg.
Венгрия парламенти Швециянинг НАТОга аъзо бўлиш бўйича берган аризасини ратификация қилди. Мамлакат Швециянинг ҳарбий блокка қўшилиши учун розилиги керак бўлган энг сўнгги давлат эди. Расмий жараёнлар якунлангач, Швеция НАТОнинг 32-аъзосига айланади.
АҚШ Молия вазирлиги Ўзбекистон, Қозоғистон ва Қирғизистоннинг бир қанча компанияларига чекловларни четлаб ўтиб, Россияга маҳсулот етказиб бергани учун санкциялар киритди.
Украина президенти Владимир Зеленский Россияга қарши икки йилдан бери давом этаётган кенг кўламли урушда 31 минг украиналик аскар ҳалок бўлганини айтди. Бундан ташқари, мамлакатнинг босиб олинган ҳудудларида яна ўн минглаб тинч аҳоли вафот этган.
Қўшимча имкониятларга эга булиш учун сайтда рўйхатдан ўтинг