Жамият
9 сентябрь куни эълон қилинган энг муҳим янгиликлар дайжести
Ўзбекистонга келадиган Россия бош вазири, 37 млрд доллардан ошган давлат қарзи, Тошкентга қайтиб келган паралимпиячилар, ногиронлиги бор болаларга мўлжалланган илк мактаб ва бошқалар — «Газета.uz»нинг кунлик дайжестида.
Сўнгги икки ойда 20 млрд сўмлик давлат харидларида қонунбузарликлар аниқланди
Рақобат қўмитаси июль ва август ойларида қарийб 20 млрд сўмлик давлат харидларини ўтказишда қонунчилик талаблари бузилганини аниқлади. Текширувлар натижаларига кўра маъмурий ишлар қўзғатилиб, ноқонуний харидлар бекор қилинди.
Паралимпия ўйинлари совриндорларига мукофотлар топширилди
Париждаги Паралимпия ўйинларида қатнашган Ўзбекистон делегацияси Тошкентга етиб келди. Мусобақа совриндорларига пул, машина ва уй кўринишидаги «Президент совғалари» топширилди.
Самарқандда кўп қаватли уй хонадонида юз берган портлашда икки киши жароҳатланди
Самарқанд шаҳрида турар жой биносининг 3-қаватидаги хонадонлардан бирида портлаш юз берди ва икки нафар фуқаро жароҳат билан шифохонага ётқизилди. Ҳолат оқибатида ёнғин содир бўлмади. ФВБ суриштирув ишлари бошланганини айтди, портлаш сабаби ҳақида маълумот йўқ.
Жиззахда фуқародан тергов жараёнида енгиллик яратиб бериш эвазига 400 млн сўм талаб қилган шахс ушланди
Жиззахда тергов жараёнларида гумондордан қўшиб ёзиш ҳолатларини кўрсатмаслик ҳамда танишлари орқали тергов жараёнларида енгиллик яратиб бериш эвазига 400 млн сўм талаб қилган шахс ушланди. Қашқадарёда эса ноқонуний равишда қум қазиб олишга кўз юмиш эвазига пул талаб қилган мансабдор қўлга олинди.
Самарқандда ITMF ва IAF’нинг йиллик конференцияси бўлиб ўтмоқда
Халқаро тўқимачилик ишлаб чиқарувчилари федерацияси ва Халқаро кийим-кечак федерациясининг қўшма конференциясида жаҳон пахта саноатидаги 50 йиллик ўзгаришлар ҳақида фикр юритилди.
«Бахти Ташкентский»га оид иш апелляция инстанциясида кўрилмоқда
20 йилга қамалган «Бахти Ташкентский» ва яна 7 судланувчининг адвокатлари суд ҳукми устидан апелляция тартибида шикоят киритди. Иш Тошкент шаҳри судида кўриб чиқилмоқда. Шикоятда, жумладан, ҳукмнинг Бахтиёр Қудратуллаевни ўта хавфли рецидивист деб топиш ҳақидаги қисмини бекор қилиш сўраляпти.
Қонунчиликда ногиронлиги бўлган шахсларнинг сайланиш ва одил судловдан фойдаланиш ҳуқуқи белгиланмоқда
«Ногиронлиги бўлган шахсларнинг ҳуқуқлари тўғрисида»ги қонунга уларнинг одил судловдан тенг фойдаланиш, давлатнинг ижтимоий-сиёсий ҳаётида иштирок этиш, шунингдек, сайлаш ва сайланиш ҳуқуқини белгиловчи қўшимчалар киритилди.
Ўзбекистонда ногиронлиги бор болалар учун мўлжалланган илк мактабдан фоторепортаж
Тошкент шаҳридаги 298-мактабнинг биринчи қавати ва ҳовлиси ногиронлиги бўлган болалар учун мослаштирилди. У ерда кўзи ожизлар учун пандуслар, лифт, панжара ва тактил плиткалар ўрнатилган. Овқатланиш хонаси ва санузел ҳам ташкилланган. Бу Ўзбекистонда инклюзив инфратузилмага эга биринчи мактабдир.
Ўзбекистондаги қарийб 400 нафар давлат хизматчиси бир вақтда тадбиркорлик билан шуғулланиши аниқланди
Коррупцияга қарши курашиш агентлиги томонидан Қурилиш ва уй-жой коммунал хўжалиги, Сув хўжалиги ҳамда Қишлоқ хўжалиги вазирликларидаги 398 нафар бошқарув ходими тадбиркорлик билан шуғулланиши аниқланди. Агентлик томонидан қонун бузилиши ҳолатларига чек қўйилди.
Футзал бўйича жаҳон чемпионати кубоги Ўзбекистоннинг 14 та шаҳрида бўлди
Coca-Cola Ўзбекистонда футзал бўйича ФИФА Жаҳон кубогини қўллаб-қувватлайди, мухлислар учун қулайликни таъминлайди ва пластикни қайта ишлаш орқали атроф-муҳитга ғамхўрлик қилади.
Тошкентда Урбанизация, архитектура ва дизайн бўйича Марказий Осиё форуми бўлиб ўтади
Тошкентда ўтказиладиган Марказий Осиё урбан-форумида хорижлик меъмор, урбанист ва дизайнерлар йиғилади. Улар шаҳарларни кенгайтириш ва у билан боғлиқ экологик муаммоларни муҳокама қилади. Ушбу масалалардаги таклифлар давлат органларига тақдим этилади. Форумда барча фуқаролар иштирок этиши мумкин.
«Ўзтемирйўлйўловчи» — эскирган поездлар, чипта етишмовчилиги ва янги харидлар ҳақида
«Ўзтемирйўлйўловчи» жой ва чипталар етишмовчилиги муаммосини поездлар сонини кўпайтириш орқали ҳал қилмоқчи. Ташкилот йил охиригача 28 та, 2025−2026 йилларда эса 80 та йўловчи вагони харид қилади. Эски вагонлар бирин-кетин рўйхатдан чиқарилмоқда.
Миграция агентлиги Қозоғистондаги ўзбекистонликлардан ишончсиз машина ва ҳайдовчилар хизматидан фойдаланмасликни сўради
Ташқи меҳнат миграцияси агентлиги Қозоғистондаги Ўзбекистон фуқароларидан ватанга қайтиш вақтида ишончсиз автотранспорт воситалари ва ҳайдовчилар хизматидан фойдаланмасликни сўради. Агентлик катта трассаларда ҳаракатланаётганда хавфсизлик қоидаларига риоя қилишни эслатиб ўтди.
Тошкентда Cobalt уриб юборган 41 ёшли пиёда ҳалок бўлди
Чилонзор туманида Cobalt ҳайдовчиси пиёдани уриб юборди. 41 ёшли фуқаро воқеа жойида вафот этди.
Тошкентда 3,6 магнитудали зилзила содир бўлди
Душанба куни тонгда Тошкент шаҳри Мирзо Улуғбек туманида 2 балли ер силкиниши қайд этилди. Унинг кучи пойтахтнинг қатор туманларида ҳам сезилди.
«Юксалиш» ҳаракати Ўзбекистон бўйлаб «Биз — донормиз!» акциясини ўтказади
9−13 сентябрь кунлари Ўзбекистоннинг барча ҳудудларида қон топшириш акцияси ўтказилади. Уни «Юксалиш» ҳаракати ҳудудий қон қуйиш марказлари билан ҳамкорликда ташкил этади. Ҳаракатнинг қайд этишича, мамлакатда хайрия даражаси етарли эмас.
Самарқандда ЙТҲ оқибатида 14 ёшли қиз вафот этди
Самарқанд туманида «Жигули» мумкин бўлмаган жойдан қайрилиб олаётганида Spark йўлига чиқиб кетиб, тўқнашди. Оқибатда «Жигули» ҳайдовчисининг 14 ёшли қизи вафот этди.
Фирибгарликда айбланиб қидирувда бўлган аёл Туркиядан Ўзбекистонга депортация қилинди
Фирибгарликда айбланиб, 3 йилдан буён қидирувда бўлган 43 ёшли аёл Туркиядан Ўзбекистонга депортация қилинди. Ушбу шахсдан жабр кўрган фуқаролардан консуллик ёки ИИВга мурожаат қилишлари сўралди.
Журналистларга Азиз Воитовга оид очиқ суд мажлисидан фото ва видео олиш тақиқланди. Бу президент фармонига зид
Собиқ вазир Азиз Воитов ва яна 49 судланувчига оид судда ОАВ вакилларига фото, видео олиш ҳамда аудио ёзиб олиш тақиқланди. Айрим адвокатлар журналистларни ёлғон тарқатишда айбламоқда. Антикоррупция агентлиги бундай қарор президент фармонига зидлигини айтиб, мажлисни жонли эфирга узатишга чақирди.
Энг кўп ўқилган хабарлар | Сўнгги янгиликлар
- Тошкентдаги мусиқа фестивалида оммавий жанжал юз берди (видео)
- Журналистларга Азиз Воитовга оид очиқ суд мажлисидан фото ва видео олиш тақиқланди. Бу президент фармонига зид
- Бухородаги 4-тергов ҳибсхонасида узоқ муддатли учрашув хоналари ташкил этилди
- Sliva.app Telegram боти орқали компаниялар хизматларини онлайн банд қилиш мумкин
Қўшимча имкониятларга эга булиш учун сайтда рўйхатдан ўтинг