Россиянинг Белгород шаҳрига уюштирилган ракета ҳужуми оқибатида камида беш киши ҳалок бўлди, 18 киши жароҳатланди. Россия Мудофаа вазирлиги ҳудудда Украина томонидан отилган 14 та ракета тутиб қолинганини маълум қилди.
Индонезия ҳукумати 14 февралдан бошлаб Балига ташриф буюрадиган барча хорижий сайёҳлар учун 10 доллар миқдорида йиғим жорий этди. Маблағлар орол атроф-муҳити ва маданиятини муҳофаза қилишга сарфланади.
Кўп сонли можаролар дунёда «жуда беқарор муҳит»ни юзага келтирмоқда. Бу «ҳақ кучлилар томонда бўлади» ёндашуви кенг тарқалувчи ҳозиргидан ҳам хавфли ўнйилликнинг башорати ҳисобланади, дейилади Халқаро стратегик тадқиқотлар институти ҳисоботида.
Россия Украинанинг босиб олинган ҳудудларидаги қурилиш ишлари учун қўшни давлатлардан минглаб меҳнат мигрантларини ёлламоқда, аммо уларнинг баъзилари хандақ қазиш ва фронтда жанг қилишга мажбур бўлмоқда, деб ёзди Bloomberg. Ўз мамлакатида эса улар ёлланганлик учун қамалиши хавфи мавжуд.
АҚШ Сенати Украина, Тайван ва Исроилга 95 миллиард долларлик ёрдам кўрсатиш тўғрисидаги қонун лойиҳасини қўллаб-қувватлади. Ҳужжат энди республикачилар назоратидаги Вакиллар палатаси томонидан кўриб чиқилади. Палата спикери Майк Жонсон аллақачон лойиҳани овозга қўймаслигини айтиб улгурди.
Ҳайвонлар миграцияси сайёрадаги энг мураккаб экотизимларни сақлаб қолишда муҳим роль ўйнайди, аммо одамлар ва иқлим ўзгариши туфайли ҳар бешинчи кўчиб юрувчи тур йўқолиб кетиш хавфи остида, дейилади БМТ ҳисоботида.
Озарбайжон ва Арманистон бир-бирини чегара ҳудудини ўққа тутишда айблади. Бокуда бир киши яралангани хабар қилинди. Ереван тўрт арман аскари ҳалок бўлганини билдирди. Бу Озарбайжоннинг Қорабоғдаги ҳарбий амалиётидан буён икки давлат ўртасида юз берган энг жиддий чегара тўқнашуви ҳисобланади.
Қозоғистонда мутахассислар билан маслаҳатлашилганидан сўнг ва ёмон об-ҳаво шароити туфайли сайғоқларни отиш тўхтатилди. Уларнинг сони 2023 йил октябрь ойида ушбу ҳайвонлар популяциясининг кескин ортиши ва яйлов етишмаслиги фонида тартибга солинганди.
Финляндия президентлиги учун сайловнинг иккинчи турида ҳукмрон Миллий коалиция партиясидан номзод, собиқ бош вазир Александр Стубб 51,6 фоиз овоз билан ғалаба қозонди. Иккинчи турда унга рақиблик қилган мустақил номзод, собиқ ташқи ишлар вазири Пекка Хаависто 48,4 фоиз овоз олди.
Аргентина парламенти аъзолари президент Хавьер Милейнинг туб ислоҳотлар пакетини қабул қилмади ва ҳужжатни кўриб чиқиш учун қайтарди. Режалаштирилган ислоҳотлар туфайли мамлакатда кенг кўламли норозилик намойишлари бошланди.
Қозоғистон ҳукумати тиббиёт муассасаларида ниқоб режимини жорий қилди, шунингдек, ундан одамлар гавжум жойларда ҳам фойдаланишни тавсия қилди. Ушбу чора мамлакатда COVID-19, қизамиқ ва бошқа ўткир респиратор вирусли инфекциялар тарқалишини тўхтатиш мақсадида кўрилди.
2024 йилнинг январи дунё бўйлаб мазкур ой учун рекорд даражада иссиқ кечди. Олимлар, шунингдек, бу январь кетма-кет саккизинчи энг иссиқ ой бўлганини таъкидламоқда — рекорд даражалар 2023 йил июнидан бери қайд этиляпти.
АҚШ Атроф-муҳитни муҳофаза қилиш агентлиги мамлакатдаги ҳаво сифати стандартларини кучайтирди. PM2,5 нинг рухсат этилган ўртача йиллик концентрацияси 12 мкг/м3 дан 9 мкг/м3 гача камайтирилди. Янгиланган стандарт минглаб бевақт ўлим ва йўқотилган иш кунларининг олдини олишга ёрдам бериши кутилмоқда.
Украина Қуролли кучлари бош қўмондони Валерий Залужний лавозимини тарк этди. Унинг ўрнига қуруқликдаги қўшинлар бошлиғи Александр Сирский тайинланди. Президент Владимир Зеленский Украина Қуролли кучлари раҳбарияти тўлиқ янгиланишини маълум қилди.
Россия Марказий сайлов комиссияси урушга қарши ягона номзод Борис Надеждиннинг Россия президентлик сайловларида иштирок этишига рухсат бермади. МСК қайд этишича, уни қўллаб-қувватлаган учун йиғилган имзоларнинг бир қисми яроқсиз деб топилган. Сиёсатчи бу бўйича Россия Олий судига мурожаат қилмоқчи.
Озарбайжоннинг амалдаги раҳбари Илҳом Алиев навбатдан ташқари президентлик сайловларида 92,05 фоиз овоз олди. Бу унинг бешинчи президентлик муддати бўлади, у 20 йилдан буён мамлакатни бошқармоқда.
ҲАМАС Исроилга Ғазо секторида 135 кунлик ўт очишни тўхтатиш режасини таклиф қилди. Бу давр мобайнида гуруҳ гаровга олинганларни озод қилади, Исроил аскарлари эса Ғазони тарк этиши керак бўлади.
Европа суди миллиардер Алишер Усмоновнинг ўзига Россиянинг Украинага босқини сабабли ЕИ томонидан қўйилган санкцияларни бекор қилиш ҳақидаги апелляциясини рад этди. Усмоновнинг адвокатлари санкциялар учун асослар ноаниқ эканини таъкидлади, бироқ суд бу фикрга қўшилмади.
7 февраль куни эрталаб Украина яна ўққа тутилди, бир қанча ҳудудларда портлаш овозлари эшитилди. Киевда ҳужум туфайли 18 қаватли турар жой биноси ёниб кетди, камида уч киши ҳалок бўлди, 20 дан ортиқ киши жароҳатланди.
Сунъий интеллект чипларига талаб ортиб бораётгани ва АҚШ савдо чекловлари фонида Хитойнинг Huawei компанияси асосий эътиборни Ascend AI чипларини ишлаб чиқаришга қаратди ва Mate 60 смартфонларини ишлаб чиқаришни секинлаштирди, деб ёзди Reuters.
Қўшимча имкониятларга эга булиш учун сайтда рўйхатдан ўтинг