Европа Кенгаши раҳбари Шарль Мишель 2024 йил ёзида бўлиб ўтадиган Европа парламентига сайловларда иштирок этиш учун Европа кенгаши президенти лавозимини муддатидан олдин тарк этиш режаларидан воз кечди. Бу ҳақда сиёсатчи Facebook`даги саҳифасида маълум қилди.
«Мен Европа сайловларида қатнашмайман. Ҳозирги вазифаларимни муддати тугагунига қадар қатъият билан бажаришга ҳаракат қиламан», — деб ёзган у.
Европа Кенгаши раҳбари январь ойи бошида Европарламентда бўлиб ўтадиган сайловларда иштирок этиш нияти борлигини маълум қилганди. Бу унинг лавозимини муддатидан илгари тарк этишини англатарди. Агар Европа етакчилари ўринбосарни ўз вақтида аниқлаб олмаганида, Мишель ўрнини Венгрия бош вазири Виктор Орбан эгаллаши мумкин эди.
Мишелнинг сўзларига кўра, қарорга бўлган «кескин муносабат» уни режаларини қайта кўриб чиқишга ундаган.
«Менинг танловим оммавий ахборот воситаларида катта эътибор ва тахминларга сабаб бўлди. Ёндашувимнинг мисли кўрилмаган, баъзилар жасорат дея атаган табиатига қараб, мен олдинда ниманидир кўрардим. Лекин бу ҳам кескин реакцияга сабаб бўлди — Европа Кенгаши ичида эмас, балки ундан ташқарида», — деди Мишел.
Шунингдек, у ўз қарори ЕИ миссиясидан чалғитишини ёки қандайдир тарзда Евроиттифоқ бирлигига зарар етказишини истамаслигини қўшимча қилди.
Мишелнинг Европа кенгаши раҳбари сифатидаги ваколати 2024 йилнинг ноябрида тугайди.
Bloomberg`нинг таъкидлашича, Мишелнинг кетиш эҳтимоли ЕИ дипломатларини блок Орбаннинг Украинага 50 миллиард долларлик ёрдам пакетига қўйган ветосини «бекор қилиш учун курашаётган» бир пайтда «ҳайратга солиб қўйган». ЕИ раҳбарларининг бу борадаги навбатдаги учрашуви 1 феврал куни бўлиб ўтади.
