Финляндияда 11 февраль, якшанба куни бўлиб ўтган президентлик сайловининг иккинчи турида овоз бериш натижаларига кўра, ҳукмрон Миллий коалиция партиясидан номзод, собиқ бош вазир Александр Стубб ғалаба қозонди.
Мамлакат Адлия вазирлиги келтирган маълумотларга кўра, иккинчи турда сайловчиларнинг 70,7 фоизи иштирок этган, улардан 51,6 фоизи Стуббга овоз берган. Унга мустақил номзод сифатида рақиблик қилган собиқ ташқи ишлар вазири Пекка Хаависто сайловчиларнинг 48,4 фоиз овозини олди.
Хаависто жонли эфирда Стуббни ғалабаси билан табриклади. Александр Стубб эса, ўз навбатида, президент бўлиш унинг ҳаётидаги энг катта шараф эканини таъкидлади. У 1 мартдан расман ўз лавозимига киришади.
Сайланган президент журналистларга Финляндия Россия билан урушда Украинани қатъий қўллаб-қувватлашда давом этишига ваъда берди, деб ёзди Yle. Стубб Финляндиянинг 2023 йил апрелида НАТОга аъзо бўлганини альянс учун афзаллик деб атади.
Финляндияда президентлик сайловининг биринчи тури 28 январь куни бўлиб ўтганди, ўшанда Стубб ва Хаависто мос равишда 28,3 фоиз ва 25,8 фоиз натижа билан иккинчи турга ўтганди. Учинчи ўринни 19 фоизга яқин овоз олган «Ҳақиқий финлар» националистик партиясидан номзод Юсси Халла-ахо эгаллаганди. Сайловда жами 9 нафар номзод иштирок этган.
Финляндия қонунчилигига кўра, президент 6 йилга, кетма-кет икки мартадан кўп бўлмаган муддатга сайланади. Мамлакатнинг амалдаги президенти Саули Ниинистё икки муддат президентлик лавозимида ишлади ва шунинг учун сайловларда қатнашмади. Стубб мамлакатнинг ўн учинчи президентига айланади.
