Жанубий Корея президенти Юн Сок Ёль кейинги ҳафтада давлат ташрифи билан Ўзбекистон, Қозоғистон ва Туркманистонга келади. Ташрифлар 10−15 июнь оралиғида бўлиб ўтади ва Корея етакчисига мамлакат биринчи хоними ҳамроҳлик қилади.
Россия 2022 йилда босқин бошланганидан бери Украина электр станцияларининг ярмидан кўпини ишдан чиқарди ёки эгаллади ва бу орқали мамлакат энергия ишлаб чиқариш қуввати 20 ГВт дан пастга тушиб кетди, деб ёзди Financial Times.
Охирги 12 ой ичида глобал ҳарорат кузатувлар тарихидаги энг юқориси бўлди. БМТ бош котиби Антониу Гутерриш мамлакатларни шошилинч чоралар кўришга чақирди. «Иқлим жаҳаннамига олиб борадиган йўлдан чиқишимиз керак», — деди у.
Financial Times Россиянинг «Газпром» компанияси раҳбарияти учун тайёрланган ҳисоботга таяниб, корхонага газ савдосини урушгача бўлган ҳажмга қайтариш учун камида 10 йил вақт керак бўлишини ёзди. Ҳисобот муаллифлари давлатнинг сезиларли ёрдамисиз янги бозорларни топиш қийин бўлишини айтган.
Украинадаги икки йиллик уруш давомида 210 мингга яқин турли бино, жумладан, 900 дан ортиқ мактаб, касалхона ва черковлар шикастланган ёки вайрон бўлган, дейилади New York Times таҳлилида. Ҳарбий ҳаракатлардан энг кўп жабр кўрган шаҳарлар Мариуполь, Харьков, Ирпень, Рубежное ва Марьинка бўлди.
Ҳиндистонда дунёдаги энг йирик парламент сайловлари натижалари сарҳисоб қилинди. Нарендра Моди учинчи бор бош вазир лавозимини эгаллайди, бироқ унинг партияси парламентдаги мутлақ устунликни йўқотди ва энди коалицион ҳукумат тузишга мажбур.
АҚШ президенти Жо Байден Мексикадан чегарани ноқонуний кесиб ўтган муҳожирларга бошпана беришни вақтинча тақиқлади. Бу чоралар уларни депортация қилишни осонлаштиради, деди Оқ уй. Тақиқ АҚШ жанубий чегарасидаги тирбандлик юзага келган даврда ҳам амал қилади.
Японияда Toyota, Suzuki, Mazda, Honda ва Yamaha компаниялари иштирокида можаро келиб чиқди. Расмийлар компаниялар автомобиль сертификати маълумотларини сохталаштирганини аниқлади. Концернлар баъзи моделларни етказиб беришни тўхтатди.
Мексикадаги президентлик сайловларида ҳукмрон партия вакили, физик олим Клаудия Шейнбаум ғалаба қозонди. У мамлакатнинг 200 йиллик тарихида давлат раҳбари лавозимини эгаллаган биринчи аёл бўлади.
Қозоғистон президенти Қосим-Жомарт Тоқаев мамлакат «замонавий Афғонистон билан савдо-иқтисодий ҳамкорликни ривожлантириш муҳимлиги ва бу режим узоқ муддатли омил эканини англаган ҳолда» «Толибон»ни террорчилар рўйхатидан чиқарганини айтди.
Грузия парламенти спикери оммавий норозиликларга қарамай, президент Саломе Зурабишвили вето қўйган «Хорижий таъсирнинг шаффофлиги тўғрисида»ги баҳсли қонунни имзолади. Ҳужжат имзолангандан кейин дарҳол кучга киради.
Словения ҳукумати Фаластиннинг мустақиллиги ва суверенитетини тан олмоқчи. «Фаластинни тан олиш икки давлат ва халқнинг тинч-тотув яшаши учун ягона йўлдир», — деди Словения ташқи ишлар вазири. Бир неча кун аввал Европанинг учта давлати ҳам Фаластинни мустақил давлат сифатида тан олганди.
Хитой йирик пандаларни Вашингтон ҳайвонот боғига қайтаради — йил охиригача у ерга пандалар жуфтлиги етказилади: Бао Ли ва Цин Бао. АҚШнинг биринчи хоними буни тарихий лаҳза деб атади. АҚШ ОАВ Хитой ва Қўшма Штатлар ўртасидаги тарангликни инобатга олиб, бу кутилмаган янгилик бўлганини таъкидламоқда.
Нью-Йорк ҳакамлар ҳайъати Доналд Трампни порноактрисага тўланган пулни яшириш учун ҳужжатларни қалбакилаштиришда айбдор деб топди. Шу тариқа, у жиноий ишда айбдор деб топилган биринчи АҚШ президенти бўлди. Ҳукм 11 июль куни эълон қилинади.
Дунё аҳолисининг деярли 80 фоизи 2023 йилда камида 31 кун давомида аномал иссиқликни бошдан кечирди. Тадқиқотчиларнинг таъкидлашича, антропоген омиллар таъсирида юзага келган иқлим инқирози бўлмаганда, бу кунлар анча кам бўлар эди.
АҚШ ва Украина июнь ойида Италияда бўлиб ўтадиган G7 саммити доирасида хавфсизлик бўйича икки томонлама битим имзолаши кутилмоқда. Бу Киевнинг НАТО давлатлари билан тузган икки томонлама келишувлари ичида энг муҳимига айланади, деб ёзмоқда Financial Times.
Шимолий Корея Жанубий Кореяга пластик бутилкалардан тортиб гўнггача бўлган турли хил ахлатларга тўлдирилган 200 дан ортиқ шарни учирди. КХДР буни жанубий кореялик фаоллар томонидан Пхеньянга қарши қаратилган варақаларга жавоб дея атади.
Грузия парламенти мамлакат президенти Саломе Зурабишвилининг «хорижий агентлар тўғрисида»ги резонансли қонунга қўйган ветосини четлаб ўтди. Ҳукмрон партия оммавий норозиликларга қарамай, ҳужжатни қабул қилди. Европа Иттифоқи бундан «чуқур афсусдалигини» билдирди.
Таиланд 1 июндан мамлакатга визасиз кириш ҳуқуқига эга давлатлар сонини 57 дан 93 тага оширмоқда, улар орасида Ўзбекистон ҳам бор. Шунингдек, ташриф буюрувчиларнинг қолиш муддати 60 кунгача узайтирилмоқда.
Исроил танклари Ғазо сектори жанубидаги Рафаҳ шаҳри марказига кириб борди, шаҳар бўйлаб ҳаво ҳужумлари ҳам уюштирилмоқда. БМТ Халқаро суди мамлакатга ҳужумни зудлик билан тўхтатишни буюрганига қарамай, Исроил Рафаҳдаги ҳарбий амалиётини давом эттирмоқда.
Қўшимча имкониятларга эга булиш учун сайтда рўйхатдан ўтинг