Siyosat
11 avgust kuni O‘zbekistonda sodir bo‘lgan eng muhim xabarlar dayjesti
Adliya vazirligi bir qator huquqbuzarliklar bo‘yicha jarimalar miqdorini kamaytirishni taklif etishi, xorijdagi o‘zbekistonliklar uchun 49 ta davlatda statsionar va ko‘chma saylov punktlari tashkil etilishi, 18 yoshgacha bo‘lganlar uchun yagona bolalar nafaqasi joriy etilishi — “Gazeta.uz"ning 11 avgustdagi eng muhim xabarlari dayjestida.
6-sinfdan a’lo bahoga o‘qiganlarga OTMga kirishda qo‘shimcha ball berilishi mumkin (aniqlashtirildi)
Xalq ta’limi vaziri Sherzod Shermatov 6-sinfdan a’lo bahoga o‘qigan bitiruvchilarga OTMga kirish imtihonida qo‘shimcha ball berish bo‘yicha taklifga izoh berdi. «Bolaning taqdiri nimaga faqat bir kun bilan hal bo‘lib ketishi kerak?», — dedi vazir. U ushbu tizimni joriy qilishda korrupsiyaning oldini olish uchun elektron kundalik yordam berishi mumkinligini ta’kidladi.
«Vatandoshlar» jamoat fondi tashkil etildi
Xorijda vatandoshlar bilan hamkorlikni rivojlantirish, ularning huquq va erkinliklarini himoya qilish maqsadida prezident qarori bilan «Vatandoshlar» jamoat fondi tashkil etildi. Uning faoliyatini boshlash uchun 5 mlrd so‘m ajratiladi. Fondni Vasiylik kengashi boshqaradi, unga esa O‘zbekiston xalq artisti Sherali Jo‘rayev raislik qiladi.
Xorijdagi o‘zbekistonliklar uchun 49 ta davlatda statsionar va ko‘chma saylov punktlari tashkil etiladi
Chet elda istiqomat qilayotgan o‘zbekistonliklarning prezident saylovida qatnashishi uchun 49 ta davlatda 54 ta statsionar va 316 ta ko‘chma saylov punkti tashkil etiladi. Jumladan, O‘zbekistonning Nyu-Yorkdagi bosh konsulxonasi va BMTdagi vakolatxonasida yagona saylov uchastkasi bo‘ladi. Hozirgacha xorijdagi saylovchilarning birlamchi ro‘yxati ham shakllantirildi.
«Toshkent viloyatida ishsizlik masalasi bo‘lmasligi kerak» — prezident
Prezident Toshkent viloyatidagi sharoit va imkoniyatlar hisobga olinsa, aslida hududda ishsizlik masalasi bo‘lmasligi kerakligini ta’kidladi va mahalliy sanoatni rivojlantirish bo‘yicha ko‘rsatmalar berdi. Hisob-kitoblarga ko‘ra, bugungi kunda ishsizlar soni 134 ming nafarni tashkil etmoqda. «So‘nggi yillarda Toshkent bo‘yicha to‘plagan tajribalarimizni Toshkent viloyatida ham joriy etishimiz kerak», — dedi davlat rahbari.
Milliy gvardiya Mehribonlik uylaridagi bolalarni oilaga qaytarishga ko‘maklashadi
Milliy gvardiya prezident qarori bilan o‘ziga biriktirilgan Mehribonlik uylaridagi bolalarni ota-onalariga qaytarish, vasiy tayinlash va farzandlikka olishga ko‘maklashadi. O‘quv-tarbiya muassasalarida tarbiyalanuvchilarning muammolarini o‘rganish va hal etish uchun «Mehr daftari» tizimi joriy qilinadi.
Bosh vazir o‘rinbosari Sardor Umurzakov koronavirusga qarshi emlandi
Bosh vazir o‘rinbosari — investitsiyalar va tashqi savdo vaziri Sardor Umurzakov COVID-19 ga qarshi Moderna vaksinasi bilan emlandi.
Vasiylikka olingan yetim bolalarga ham OTMga kirish uchun kvota ajratiladi
Joriy yildan homiylikka yoki patronatga olingan 25 yoshdan oshmagan yetim bolalar Mehribonlik uylari bitiruvchilariga ajratilgan OTMga kirish uchun qo‘shimcha kvotadan foydalanishi mumkin. Jami 6,2 ming nafar bolaga qo‘shimcha kvota berish kutilmoqda. Qolaversa, ularga 50 foiz oshirilgan miqdorda stipendiya to‘lanadi. Nodavlat o‘quv kursida o‘qish harajati va xorijda davolanish uchun kompensatsiya, kitob harid qilishga esa subsidiya beriladi.
10 avgust kuni O‘zbekistonda sodir bo‘lgan eng muhim xabarlar dayjesti
Olimpiada o‘yinlarida ishtirok etgan o‘zbekistonlik sportchilarni kutib olish marosimi, Toshkentda qariyb 1,1 mlrd so‘mlik kuchli ta’sir qiluvchi preparatlarning noqonuniy savdosi aniqlanishi, “UZB” yoki “AAA” kabi seriali davlat avtomobil raqamlarining ochiq savdoda sotilishi — “Gazeta.uz"ning 10 avgustdagi eng muhim xabarlari dayjestida.
18 yoshga to‘lgan yetim bolalarga 1 xonali uy ajratiladi — prezident qarori
Prezident qarori bilan uyga muhtoj va 18 yoshga to‘lgan yetim bolaga 1 xonali, ular o‘rtasida nikoh tuzilgan taqdirda 2 xonali uy-joy ajratish tartibi belgilanmoqda. Bola 30 yoshga to‘lguncha uyni sotish, garovga qo‘yish va ijaraga berish qo‘yish mumkin emas. Yil yakuniga qadar 757 nafar bolani uy bilan ta’minlash reja qilingan. Bunga qadar yetim bolalarga bo‘sh turgan yotoqxona va qarovsiz qolgan uylardan ajratib kelingan.
Milliy gvardiya qo‘mondonining yoshlar bilan ishlash masalalari bo‘yicha o‘rinbosari tayinlandi
Sarvar Mamayusupov Milliy gvardiya qo‘mondonining yoshlar bilan ishlash masalalari bo‘yicha o‘rinbosari etib tayinlandi. U bundan avval tarbiyaviy va mafkuraviy ishlar bo‘yicha o‘rinbosar bo‘lgan.
O‘zbekistonning Aqtaudagi bosh konsuli tayinlandi
Atabek Tursinbekov O‘zbekistonning Aqtaudagi bosh konsuli etib tayinlandi.
«Odamlar svet bo‘yicha, ayniqsa gaz bo‘yicha bizdan juda norozi» — prezident
Shavkat Mirziyoyev joriy yilda O‘zbekiston 917 million kub metr gaz import qilganligini ma’lum qildi. «Bu juda katta raqam. Ikkinchidan, biz valyutaga import qilyapmiz. Kelajakda nima bo‘ladi?», — dedi u. Prezidentning so‘zlariga ko‘ra, neft va gaz sohasi uchun so‘nggi uch yilda ajratilgan 1,4 mlrd dollar o‘z natijasini bermayapti.
Endi deputatlarning yordamchilari bo‘ladi
Qonunchilik palatasida deputat yordamchisi institutini joriy etishga oid qonun loyihasi muhokama qilinmoqda. Bu orqali deputat va saylovchi o‘rtasidagi muntazam aloqani yaxshilashga erishish maqsad qilingan. Tashabbus «Milliy tiklanish» partiyasi tomonidan ilgari surildi.
Mislsiz islohotlar o‘z-o‘zidan bo‘lmaydi — Abdulla Aripov
«Biz juda tez amalga oshirilayotgan o‘zgarishlarga ko‘nikib qoldik. Ularning mohiyatini anglashga ulgurmayapmiz. Mislsiz islohotlar aynan shunday bo‘lishi kerakdek va shu ishlar o‘z-o‘zidan bo‘layotgandek qabul qilyapmiz» — dedi Abdulla Aripov O‘zLiDeP siyosiy kengashining navbatdagi majlisida. Barcha islohotlar zamirida Shavkat Mirziyoyevning qat’iyati mujassam, deya ta’kidladi u.
Shavkat Mirziyoyevning shu haftadagi ish rejasi ma’lum qilindi
O‘zbekiston prezidentining haftalik ish jadvalidan neft va gaz sohalari bo‘yicha yig‘ilish hamda Toshkent viloyatida ishlab chiqarish sohalarini rivojlantirishga oid taqdimot o‘rin olgan.
«Bizning maqsadimiz bitta — prezidentlik saylovlarida g‘olib bo‘lish» — XDP raisi
Xalq demokratik partiyasi raisi Ulug‘bek Inoyatov partiyaning maqsadi hukumatni egallash, ya’ni prezidentlik saylovlarida g‘olib bo‘lish ekanligini bildirdi. Uning ta’kidlashicha, saylovlarda xalq ayollarga ko‘proq ovoz beradi. «Ana shu nuqtayi nazardan biz nomzodimizni to‘g‘ri tanladik, deb o‘ylayman. Bu bizning saylovlarda g‘alaba qozonishimizda bir qadam bo‘ldi, deb hisoblayman», — deydi u.
Shavkat Mirziyoyevning saylovoldi targ‘iboti va amaldagi vazifasi aralashib ketmasligi nazorat qilinadi — MSK
Markaziy saylov komissiyasi tomonidan OAV va blogerlar bilan o‘tkazilgan ochiq muloqotda amaldagi prezidentning vazifasi va saylovoldi targ‘iboti aralashib ketmasligi nazorat qilinishi aytildi. «Albatta, nomzodni saylovoldi targ‘iboti va o‘zining faoliyatini adashtirmasligimiz kerak. Lekin nazorat qilinadi», — dedi MSK raisi o‘rinbosari Bahrom Qo‘chqorov. Komissiya a’zosi Sherzodxon Qudratxo‘ja esa Shavkat Mirziyoyevning tashrif va uchrashuvlari tagida piar emas, balki islohotlar yotganini ta’kidladi.
«Men faqat ayol ekanligim uchun nomzod bo‘lmadim» — Maqsuda Varisova
Prezident saylovlarida XDP nomzodi sifatida qatnashishi kutilayotgan Maqsuda Varisova saylovda g‘alaba qozonsa, avvalo ishsizlik va bandlik sohasida islohotlar qilishini ta’kidladi. Uning ta’kidlashicha, prezidentlikka nomzodlar orasida ayol kishining bo‘lishiga gender tenglik tamoyili sabab emas. «Xalq orasidan chiqqan oddiy bir ona, oddiy bir ayol bo‘lganim sababli ham, xalqimizni qiynab turgan muammolarni quyidan bilganim uchun ham meni tanlashdi, deb o‘ylayman», — dedi u.
Shavkat Mirziyoyev prezidentlik saylovlarida O‘zLiDeP partiyasidan qatnashadi
O‘zLiDeP partiyasi oktyabr oyidagi prezidentlik sayloviga amaldagi davlat rahbari Shavkat Mirziyoyev nomzodini ko‘rsatmoqchi ekanligini e’lon qildi.
Eng ko‘p o‘qilgan xabarlar | So‘nggi yangiliklar
- Eron prezidentining vertolyoti halokatga uchradi. O‘zbekiston TIV xavotir bildirdi
- Shavkat Mirziyoyev Eron prezidenti vafoti munosabati bilan hamdardlik bildirdi
- Ohangaron tumanida hokim almashdi
- Senat O‘zbekiston va AQSh Mudofaa vazirliklari o‘rtasidagi maxfiy ma’lumotlarni himoya qilish to‘g‘risidagi bitimni ma’qulladi
Qo‘shimcha imkoniyatlarga ega bulish uchun saytda ro‘yxatdan o‘ting