Prezident Shavkat Mirziyoyev O‘zbekiston xalqini Qurbon hayiti bilan tabriklab, pandemiya sharoitida diniy ibodatlarni uy sharoitida ado etish xalq hayoti va salomatligini asrashga qaratilgan eng to‘g‘ri qaror ekanini ta’kidladi.
Prezident Shavkat Mirziyoyev Germaniya prezidenti Frank-Valter Shtaynmayer va kansleri Angela Merkelga ushbu mamlakatda ro‘y bergan halokatli toshqinlar oqibatida ko‘plab insonlar qurbon bo‘lgani munosabati bilan ta’ziya yo‘lladi.
Prezident Shavkat Mirziyoyev raisligida shu hafta oilaviy tadbirkorlikni rivojlantirish hamda aholining doimiy daromad manbalarini ko‘paytirish yuzasidan videoselektor yig‘ilish bo‘lib o‘tadi. Shuningdek, Buxoro, Navoiy, Qashqadaryo, Samarqand va Surxondaryo viloyatlarida gidrotexnik inshootlarni modernizatsiya qilish bo‘yicha yig‘ilish o‘tkazilishi ko‘zda tutilgan.
Yakkabog‘ tumani hokimligi o‘z binosiga ega emasligi, hokimlik hozirga qadar Xalq demokratik partiyasining balansida bo‘lgan binoda faoliyat yuritayogani ma’lum bo‘ldi. Tuman hokimi bundan bosh vazir o‘rinbosarlarining, moliya vazirining ham xabari borligi va tez orada bino qurilishini aytdi.
Quyi palata Spikeri Nurdinjon Ismoilov qonun hujjatlariga muvofiq, majburiy emlash mumkin emasligini ma’lum qildi. Buning uchun huquqiy hujjatlarga o‘zgartish yoki qo‘shimchalar kiritish talab etiladi. Biroq, deputatlar Respublika maxsus komissiyasiga ixtiyoriy emlanganlarni rag‘batlantirish va imtiyozlar berish yoki harakatlarini cheklash borasida tavsiyalar bergani aytilmoqda. Qolaversa, xodimlari emlangan kafe va restoranlarga cheklangan vaqtda ham ishlashga ruxsat berish taklifi bildirilgan.
Jamshid Haydarov Samarqand viloyati hokimining sanoatni rivojlantirish masalalari bo‘yicha o‘rinbosari — «Urgut» erkin iqtisodiy zonasi direksiyasi rahbari vazifasiga tayinlandi.
Shavkat Mirziyoyevning bir qator xorijiy TIV rahbarlarini qabul qilishi, avtokreditlarning 40 foizga oshishi, G‘ijduvonda bir guruh ayollar kredit sababli yo‘lni to‘sib qo‘yishi, Ozarbayjonning O‘zbekistonga 50 ming doza AstraZeneca vaksinasini yuborishi — “Gazeta.uz"ning 16 iyuldagi eng muhim xabarlari dayjestida.
«Tolibon» taklif qilgan yagona tanlov — ular tomonga o‘tish yoki taslim bo‘lish, dedi Afg‘oniston prezidenti Ashraf G‘ani Markaziy va Janubiy Osiyo bo‘yicha konferensiyada. U hukumat toliblar bilan muzokaralar olib borish va ularga yon bosmaslik uchun barcha choralardan foydalanilayotganini qo‘shimcha qildi.
Yevroittifoq tashqi ishlar va xavfsizlik siyosati bo‘yicha Oliy vakili Jozep Borrel Markaziy va Janubiy Osiyo bo‘yicha konferensiyada Afg‘onistonga qo‘shni davlatlar va xalqaro hamkorlar ushbu mamlakatda tinchlik va taraqqiyotni ilgari surish borasida mas’uliyatni o‘z zimmasiga olishini ta’kidladi.
Markaziy Osiyo va Rossiya TIV rahbarlari qo‘shma bayonotda Afg‘onistondagi vaziyatni barqarorlashtirish uchun imkoniyatlarni qidirishda davom etish kerakligini ta’kidlashdi va ixtilofdagi barcha tomonlarni kuch ishlatishdan tiyilishga chaqirishdi.
O‘zbekiston prezidenti Toshkentda o‘tgan xalqaro konferensiya davomida Afg‘oniston o‘zining eng yangi tarixidagi muhim burilish davrini boshdan kechirayotganini aytdi. U shuningdek, afg‘on xalqi umummilliy murosaga erishish yo‘lida o‘zaro kelishuvlarga tayyor ekanini namoyish etishiga ishonch bildirdi.
Markaziy Osiyo mamlakatlari davlat rahbarlarining navbatdagi Maslahat uchrashuvi 6 avgust kuni Turkmanistonning «Avaza» milliy turizm zonasida bo‘lib o‘tadi. Sammitga tayyorgarlik masalalari prezident Shavkat Mirziyoyevning Turkmaniston tashqi ishlar vaziri Rashid Meredov bilan uchrashuvida muhokama qilindi.
Prezident Shavkat Mirziyoyev Toshkentdagi xalqaro konferensiya dasturi doirasida Rossiya, Hindiston, Qozog‘iston, Turkmaniston, Tojikiston tashqi ishlar vazirlari hamda Yevropa Ittifoqining tashqi ishlar va xavfsizlik siyosati bo‘yicha Oliy vakilini qabul qildi.
Shavkat Mirziyoyev Toshkentda o‘tayotgan xalqaro anjumanda Markaziy va Janubiy Osiyo davlatlari hamkorligini rivojlantirishga, jumladan, iqtisodiy aloqalarni kengaytirish bo‘yicha yillik forum o‘tkazish, xavfsiz transport-logistika infratuzilmasini yaratish, giyohvandlikka qarshi qo‘shma harakatlar rejasini ishlab chiqishga oid takliflarni bildirdi. Qolaversa, vaksinatsiya bo‘yicha o‘zaro tan olingan sertifikatlar asosida «Yangi sharoitdagi turizm» konsepsiyasini joriy etish zarurligi aytildi.
Prezident Shavkat Mirziyoyev Toshkent shahrida bo‘lib o‘tayotgan xalqaro konferensiyada nutq so‘zladi. Davlat rahbari har yili savdo-iqtisodiy hamkorlik, kooperatsiya va investitsiyaviy aloqalar bo‘yicha forumni o‘tkazish, Markaziy va Janubiy Osiyon turoperatorlarining yagona platformasini shakllantirish, olim va tadqiqotchilar uchun yengillashtirilgan viza tartibini joriy qilish kabi tashabbuslarini ilgari surdi.
Qonunchilik palatasi deputati Doniyor G‘aniyev yerga oid prezident farmoni, uning asosida Yer kodeksiga kiritilayotgan o‘zgartish va qo‘shimchalar yuzasidan fikr bildirib, qonunchilikda «lazeyka"lar qoldirib ketilayotganiga e’tibor qaratdi. Jumladan, chet el fuqarolari va yuridik shaxslariga yerni ijraga berish, DXSH asosida yerdan foydalanish, ko‘p kvartirali uyga tutash uchastkalarni ajratish, qolaversa, yakka tartibdagi uyni xususiy mulk tarzida berish masalalarida qonunchilikda «bo‘shliq"lar qoldirilgani aytilmoqda.
O‘zbekiston, AQSh, Afg‘oniston va Pokiston Afg‘oniston tinchlik jarayoni va mojarodan keyingi davrda tartibga solishni qo‘llab-quvvatlash uchun to‘rt tomonlama maslahatlar platformasini tashkil etmoqdalar.
Pokiston bosh vaziri Imron Xon Toshkentda bo‘lib o‘tgan brifingda Turkiyani Afg‘oniston mojarosini hal etishga jalb qilish hamda Afg‘oniston qo‘shnilari sammitini o‘tkazish taklifini bildirdi.
Shavkat Mirziyoyev va Imron Xon O‘zbekiston va Pokiston o‘rtasida strategik sheriklik aloqalarini o‘rnatish to‘g‘risidagi Qo‘shma deklaratsiyani imzoladi. Shuningdek, tranzit va savdo to‘g‘risidagi hamda ishbilarmonlar va sayyohlar uchun viza tartiblarini soddalashtirish to‘g‘risida hukumatlararo bitimlar, qolaversa, 500 mln dollarlik kelishuvlar ham imzolandi.
Shavkat Mirziyoyevning boshqa mamlakatlar yetakchilar bilan uchrashuvi, bloger Otabek Sattoriy ishi, Toshkentda Markaziy Osiyo xalqaro instituti ochilishi — “Gazeta.uz"ning 15 iyuldagi eng muhim xabarlari dayjestida.
Qo‘shimcha imkoniyatlarga ega bulish uchun saytda ro‘yxatdan o‘ting