Siyosat
«2 mingga yaqin bog‘cha, maktab va tibbiyot muassasalari ichimlik suvini tashib kelishga majbur bo‘lmoqda» — prezident
Shavkat Mirziyoyev 1500 tadan ortiq mahallada markazlashgan ichimlik suvi taminoti yo‘lga qo‘yilmagani, 2 mingga yaqin bog‘cha, maktab va tibbiyot muassasalari ichimlik suvini tashib kelishga majbur bo‘layotganini ma’lum qildi. Buning yechimi sifatida kelgusi 5 yilda sohaga 40 trln so‘m investitsiya yo‘naltirilishi va ichimlik suvi ta’minoti 90 foizga yetkazilishi aytildi. 2022 yilning o‘zida budjetdan 2 trln so‘m, xalqaro moliya tashkilotlaridan esa 245 mln dollar jalb etiladi.
2022 yil oxirigacha elektroshoker va gazli qurollar ekspertizasi joriy etiladi
Prezident qarori bilan 2022−2023 yillarda 10 dan ortiq yangi turdagi ekspertizalarni o‘tkazish yo‘lga qo‘yiladi. Jumladan, video va fototexnika, videolarda transportning harakatlanish tezligini aniqlash, gazli va elektroshoker qurollar, avtomobillarga o‘rnatilgan gaz ballonlari portlashi, qolaversa, internetda bulutli servislar ekspertizasi o‘tkaziladi.
Afg‘onistonda gumanitar halokatning oldini olish asosiy vazifa — Abdulaziz Kamilov
Tashqi ishlar vaziri Abdulaziz Kamilov xalqaro hamjamiyat Afg‘onistonda amalga oshirilayotgan har qanday ijobiy qadam va o‘zgarishlarni rag‘batlantirishi kerakligini ta’kidladi. O‘zbekiston TIV rahbari asosiy vazifa mamlakatda gumanitar halokatning oldini olish ekanligini eslatdi. «Vaziyatning keskinlashishi jamiyatda radikallashuv, turli guruhlar o‘rtasida to‘qnashuvlar, ekstremizm kuchlarining kuchayishiga olib kelishi mumkin», — dedi vazir.
2022-yilda O‘zbekistonda chorvachilikni rivojlantirishga Jahon bankidan $300 mln jalb qilinadi
Prezident qarori bilan O‘zbekistonda chorvachilik va uning tarmoqlarini rivojlantirish maqsadlari uchun 2022-yilda Jahon bankidan 300 mln dollar kredit mablag‘lari jalb qilinadi. Qolaversa, “Veterinariya fidoyisi” va “Chorvachilik fidokori” ko‘krak nishonlari ta’sis etiladi.
Tal’at Valiyev Xavfsizlik kengashi kotibining o‘rinbosari bo‘ldi
Tal’at Valiyev O‘zbekiston prezidenti huzuridagi Xavfsizlik kengashi kotibining o‘rinbosari etib tayinlandi. Avvalroq, Babur Shayakubov Xavfsizlik kengashi kotibining o‘rinbosarligidan ozod qilingandi.
Energiya resurslarni o‘zbek-qozoq bojxonasidan olib o‘tishni nazorat qilishga oid bitim tasdiqlanishi mumkin
2021 yil 6 dekabr kuni Nur-Sultonda imzolangan O‘zbekiston va Qozog‘iston hukumatlari o‘rtasida energiya resurslarini bojxona chegarasidan quvur transportida va elektr uzatish liniyalari orqali olib o‘tishni birgalikda bojxona nazoratidan o‘tkazish to‘g‘risidagi bitimni tasdiqlash kutilmoqda. Tegishli prezident qarori loyihasi jamoatchilik muhokamasiga qo‘yildi.
«Lukashenkoning O‘zbekiston haqidagi fantaziyalarini jiddiy qabul qilish shart emas» — siyosatchilar va jamoatchilik faollari
Aleksandr Lukashenkoning O‘zbekiston Ittifoq davlatiga qo‘shilishi mumkinligi bo‘yicha fikriga o‘zbekistonlik siyosatchilar va jamoatchilik faollari munosabat bildirdi. «Yuksalish» harakati raisi Bobur Bekmurodov bu «fantaziyalarni jiddiy qabul qilmaslikni» ta’kidlagan. Huquqshunos Xushnudbek Xudoyberdiyev Lukashenko va Solovyovni «o‘tgan-ketganni muhokama qiladigan, hammaning shaxsiy hayotiga burnini tiqadigan kampirlarga» o‘xshatgan. Adliya vaziri maslahatchisi Shahnoza Soatova Tashqi ishlar vazirligidan bu bayonotga munosabat bildirishini so‘ragan.
«O‘ylashimcha, O‘zbekiston ham Ittifoq davlatiga qo‘shiladi» — Lukashenko
Aleksandr Lukashenko O‘zbekiston va sobiq ittifoq hududidagi ayrim davlatlar 15 yildan so‘ng Rossiya va Belarusni o‘z ichiga olgan Ittifoq davlati tarkibiga kirishi mumkinligini taxmin qildi. Uning so‘zlariga ko‘ra, bu «mustaqil emas, balki suveren davlatlar» birlashmasi bo‘ladi.
Xabibulla Mirsoatov Toshkent shahar prokurori o‘rinbosari etib tayinlandi
Yunusobod tumani prokurori lavozimida ishlab kelgan Xabibulla Mirsoatov Toshkent shahar prokurori o‘rinbosari bo‘ldi. U Kasaba uyushmalari federatsiyasi rahbari Qudratilla Rafiqovning o‘g‘li.
Qarshi tumaniga yangi hokim tayinlandi
Pillachilik va qorako‘lchilikni rivojlantirish qo‘mitasi birinchi o‘rinbosari Behzodjon Yusupov Qarshi tumani hokimi etib tayinlandi. Qashqadaryo hokimi tumanning oldingi rahbari Maqsuda Mustafoyeva hokimligi paytida yo‘l qo‘yilgan kamchiliklarga ham to‘xtaldi. «2021 yilning o‘zida yer ajratish bo‘yicha qonunga zid qarorlar tufayli davlatga 6 mlrd so‘m zarar yetkazilgan», — dedi Murotjon Azimov.
«Men endi borib do‘pposlamayman-ku». Ruslanbek Davletov — Toshkent viloyati hokimligi haqida
Adliya vaziri prezident farmoni bilan hokimlarning yer ajratishiga taqiq qo‘yilgan davrda Toshkent viloyatida 781 gektar yer tadbirkorga vaqtincha biriktirib berilganini ma’lum qilgandi. Viloyat hokimligi esa bunga munosabat bildirib, yer ajratish qonuniy bo‘lganini aytdi. Jurnalistning hokimlik vazirni noto‘g‘ri gapirganlikda ayblagani haqidagi savoliga javob berar ekan, Ruslanbek Davletov shunday dedi: «Men endi borib do‘pposlamayman-ku. Gapiraversin, shuning uchun ham sudda gaplashamiz».
«O‘zining diniy o‘lchovlari, uyidagi qarashlari bilan jamiyatga o‘lchov qo‘yishga yo‘l qo‘ymaymiz, qonun bor» — Adliya vaziri
Adliya vaziri Ruslanbek Davletov diniy tashkilotlarning ayrim vakillari kimlargadir hukm o‘qishi huquqiy nuqtai nazardan noto‘g‘riligini qayd etib, bu jamiyatda bo‘linishga olib kelayotganligini, diniy tashkilotlar bunday ixtilof qilishga haqqi yo‘qligini ta’kidladi. U Adliya vazirligi ushbu sohadagi faoliyatni nazorat qilishini eslatdi. «O‘zining diniy o‘lchovlari, uyidagi qarashlari bilan jamiyatga o‘lchov qo‘yishga yo‘l qo‘ymaymiz, chunki qonun bor», — dedi Davletov.
«Matematikani qayerda o‘qigansiz?» Prezident — Avtoyo‘l qo‘mitasi rahbariga
Avtomobil yo‘llari qo‘mitasi rahbari Abdurahmon Abduvaliyev prezidentning necha foiz yo‘l yoqalariga daraxt ekilgani haqidagi savoliga noto‘g‘ri javob berdi. Javobni eshitgan Shavkat Mirziyoyev undan: «Matematikani qayerda o‘qigansiz», — deb so‘radi.
Shavkat Mirziyoyev Rejep Erdo‘g‘onga sog‘lik tiladi
Shavkat Mirziyoyev Rejep Tayyib Erdo‘g‘onga yo‘llagan maktubida Turkiya prezidenti va uning rafiqasi koronavirusga chalingani haqidagi xabardan xavotirga tushganini bildirdi. Ularga sihat-salomatlik, kuch-quvvat va yangi muvaffaqiyatlar tiladi.
Prezident daraxt ekishdagi qo‘shib yozishlar haqida ma’lum qildi
Shavkat Mirziyoyev «Yashil makon» dasturi doirasida ekilgan daraxtlar bo‘yicha raqamlarga ishonmasligini ma’lum qildi. U, shuningdek, Yunusobod tumani hokimi Jahongir Ibrohimov daraxt ekish bo‘yicha reja bajarilmagani uchun lavozimidan chetlashtirilganini aytdi.
Kambag‘allik va korrupsiyani qisqartirish borasida Xitoy tajribasi o‘rganiladi
O‘zbekiston prezidenti va XXR raisining Pekindagi uchrashuvida kambag‘allikka va korrupsiyaga qarshi kurashish borasida Xitoy tajribasini o‘rganish va joriy qilish bo‘yicha qo‘shma chora-tadbirlarni amalga oshirishga kelishib olindi. Tomonlar besh yillik Savdo-iqtisodiy va investitsiyaviy hamkorlik dasturini ham imzoladi.
Foto: Shavkat Mirziyoyev Pekinda hamkasblari bilan uchrashdi
Prezident Shavkat Mirziyoyev Pekinda qishki Olimpiya o‘yinlarining ochilishi doirasida Tojikiston, Qozog‘iston, Qirg‘iziston va Misr prezidentlari, shuningdek, BMT bosh kotibi Antoniu Guterrish bilan muloqot qildi.
Uchta agentlikda tayinlovlar amalga oshirildi
Strategik rivojlanish, Xalqaro hamkorlik va rivojlanish hamda Xorijiy investitsiyalarni jalb etish agentliklarida rahbar lavozimlariga tayinlovlar amalga oshirildi.
Senatorlar «propiska» so‘zini qonunchilikdan butunlay chiqarishni ma’qulladi
Senatorlar «propiska» so‘zi ma’nan eskirganligi va fuqarolar ongida «to‘sqinlik qiluvchi», «erkinlikni cheklovchi» degan tushunchalarni keltirib chiqarayotgani uchun uni qonun hujjatlaridan butunlay chiqarishni ma’qullashdi. Endi uning o‘rniga «yashash joyi bo‘yicha ro‘yxatga olish» tushunchasi qo‘llaniladi.
Senatorlar geografik ko‘rsatkichlar to‘g‘risidagi qonunni ma’qulladi
Senatning navbatdagi yalpi majlisida «Geografik ko‘rsatkichlar to‘g‘risida» gi qonun ko‘rib chiqildi. Unga ko‘ra, endi tadbirkorlar o‘z tovarlarida ishlab chiqarilgan joy nomini ko‘rsatishi kerak. Qayd etilishicha, hozirgacha O‘zbekistonda faqat 4 ta tovar, xususan, 2 ta mahalliy mahsulotning geografik ko‘rsatkichi ro‘yxatdan o‘tkazilgan. Senatorlar ishontirishicha, mazkur qonun mintaqaviy brendlar rivojlanishi va hududlarning turistik jozibadorligi oshishiga xizmat qiladi.
Eng ko‘p o‘qilgan xabarlar | So‘nggi yangiliklar
Qo‘shimcha imkoniyatlarga ega bulish uchun saytda ro‘yxatdan o‘ting