Jamiyat
24 fevral kuni O‘zbekistonda sodir bo‘lgan eng muhim xabarlar dayjesti
2-kursdan ishlashi kutilayotgan talabalar, evakuatsiya qilish rejasi tuzilayotgan Ukrainadagi o‘zbekistonliklar, Kiyevga uchadigan ikkita reysni bekor qilgan Uzbekistan Airways, 100 MVt quvvatli shamol elektr stansiyasi qurilishiga tamal toshi qo‘ygan prezident, Ukrainada jabrlanganlar orasida O‘zbekiston fuqarolari yo‘qligini ma’lum qilgan TIV va boshqalar — «Gazeta.uz» ning 24 fevraldagi eng muhim xabarlari dayjestida.
Toshkent metrosida erkak kishi o‘zini poyezd ostiga tashladi
Toshkent metrosining Mirzo Ulug‘bek stansiyasida erkak kishi o‘zini poyezd ostiga tashladi. Natijada bir yo‘nalishda harakat to‘xtab qoldi.
«Biz bunday bo‘lishi mumkinligiga ishonishni xohlamasdik» Ukrainaliklar urush haqida nima deyishmoqda?
«Gazeta.uz» Rossiya erta tongdan harbiy bosqin boshlagan Ukrainada yashovchi aholi bilan suhbatlashdi. Maqola qahramonlari — ba’zilari anonim, ba’zilari esa haqiqiy ismlari bilan — o‘z shaharlarida sodir bo‘layotgan voqealar va mahalliy hokimiyat tomonidan qanday choralar ko‘rilayotganini so‘zlab berishdi.
Uzbekistan Airways Rostov va Krasnodar reyslarini bekor qildi
Uzbekistan Airways aviakompaniyasi Rostov-na-Donu va Krasnodar aeroportlari yopilgani munosabati bilan ushbu shaharlarga parvozlarni bekor qildi.
Rossiyaning Ukrainaga qo‘shni viloyatlaridagi o‘zbekistonliklarning xavotirlanishiga hech qanday asos yo‘q — TIV
Tashqi ishlar vazirligi O‘zbekiston fuqarolari, shu jumladan, Rossiyaning Ukrainaga yaqin hududlarida joylashgan OTMlar talabalari uchun xavotirlanishga sabab va asoslar yo‘qligini ma’lum qildi. TIV agar fuqarolarga tahdid bo‘lsa, o‘z vaqtida choralar ko‘rilishi va ular O‘zbekistonning Moskvadagi elchixonasi va Rostov-Dondagi bosh konsulxonasiga qo‘ng‘iroq qilishlari mumkinligini bildirdi.
Muddatli harbiy xizmatga chaqiruv e’lon qilindi
Prezident qarori bilan harbiy xizmatga yaroqli O‘zbekiston fuqarolari mart-aprel oylarida muddatli harbiy xizmatga chaqiriladi. Mudofaa vazirligining «Gazeta.uz»ga ma’lum qilishicha, mazkur qarorning Ukrainada bo‘layotgan vaziyatlar bilan hech qanday aloqasi yo‘q.
Ukrainadagi o‘zbekistonlik talabalarga o‘qishni masofaviy shaklda davom ettirish tavsiya etildi
O‘zbekistonning Kiyevdagi elchixonasi Ukrainada ta’lim olayotgan o‘zbekistonlik talabalarga murojaat qilib, o‘qishni O‘zbekistonda turib masofaviy shaklda davom ettirishni tavsiya qildi.
Adliya vazirligi 2021 yilda qonun buzilgani uchun hokimliklarga 2,6 mingta taqdimnoma kiritdi
Adliya vazirligi 2021 yilda qonun buzilish holatlarini bartaraf etish bo‘yicha ta’lim muassasalariga 8,2 mingta, hokimliklarga 2,6 mingta, sog‘liqni saqlash muassasalariga 1,5 mingta taqdimnoma kiritdi. O‘rganishlar davomida Andijon viloyatida ishsizlik nafaqasi bo‘yicha jami 1,3 mlrd so‘m qarzdorlik mavjudligi aniqlangan.
«Ular mudrab o‘tiribdi, ishlamagan». Prezident Samarqandda ishdan olingan 10 nafar rahbar haqida
Shavkat Mirziyoyev Beruniy tumanidagi yig‘ilishda hududdagi rahbarlar umuman ishlamayotganini tanqid qildi. So‘zi davomida davlat rahbari faoliyatiga mas’uliyatsizlik bilan yondoshgani uchun ishdan olingan 10 nafar samarqandlik amaldorni misol qilib ko‘rsatdi. «Ularning ko‘zlariga qaradim, hammasi mudrab o‘tiribdi, ishlamagan», — dedi u.
Prezident 100 MVt quvvatli shamol elektr stansiyasi qurilishiga tamal toshi qo‘ydi
Shavkat Mirziyoyev Qoraqalpog‘istonning Beruniy tumanida 100 MVt quvvatli yangi shamol elektr stansiyasi qurilishiga tamal toshini qo‘ydi. «Tasavvur qilinglar farzandlarimiz, nevalarimiz bunday loyihadan qanday manfaat ko‘radi. Bu bir yillik emas, yillarga tatiydigan loyiha», — dedi Shavkat Mirziyoyev.
«Vatanimizning qudratini ko‘tarishga harakat qilishimiz kerak» — Shavkat Mirziyoyev
Qoraqalpog‘istonda tashrif bilan bo‘lib turgan Shavkat Mirziyoyev dunyo kun sayin emas, soat sayin tahlikali bo‘lib borayotganini ta’kidladi. «Biz iqtisodiyotimiz, mudofaamizni mustahkam qilib, ishonch bilan jonajon vatanimizning qudratini ko‘tarishga harakat qilishimiz kerak», — dedi u.
Uzbekistan Airways Kiyevga amalga oshirilishi rejalashtirilgan ikkita reysni bekor qildi
Uzbekistan Airways 27 fevral va 2 mart kunlari amalga oshirilishi rejalashtirilgan ikkita mantazam HY-3731/3732 Toshkent — Kiyev — Toshkent reyslarini bekor qildi.
Ukrainadagi o‘zbekistonliklarni evakuatsiya qilish rejasi tuzilmoqda
Ukrainadagi vaziyat keskinlashganini inobatga olib, O‘zbekistonning Kiyevdagi elchixonasi o‘zbekistonliklarni evakuatsiya qilish rejasi va mamlakatni tark etmoqchi bo‘lganlar ro‘yxatini tuzib chiqmoqda.
Jizzaxda fuqaroni aylanma yo‘llar orqali AQShga jo‘natishga va’da qilgan shaxs ushlandi
Jizzax viloyatida fuqaroni Turkiya, Italiya yoki Meksika orqali AQShga olib o‘tish va ishga joylashtirishni va’da qilgan shaxs 20 ming dollar olganida ushlangani aytilmoqda. Farg‘ona viloyatida esa fuqaroni Koreyaga ishga jo‘natishga va’da qilganlikda gumonlangan shaxs qo‘lga olingan.
Talabalar 2-kursdan ishlashi mumkin bo‘ladi — Oliy ta’lim vaziri
Oliy va o‘rta maxsus ta’lim vaziri Abduqodir Toshqulov qoraqalpog‘istonlik talabalar bilan uchrashuvda OTMlarda 2 kursdan boshlab ishlashga ruxsat beruvchi yangi tizim yaratilishini ma’lum qildi. «Ishlaganda ham o‘zining sohasida ishlasin. Men buni hurmat qilaman», — dedi u. Qolaversa, OTMlarda ta’lim jarayoni 70 foiz amaliyotga o‘tish kerakligi ta’kidlandi.
Chorshanba kuni 140 kishida kovid aniqlandi
Chorshanba kuni O‘zbekistonda 140 nafar fuqaroning koronavirusga topshirgan test tahlili musbat natijani qayd etdi. Shuningdek, kun davomida 24 kishida pnevmoniya aniqlandi.
Namangan — Krasnodar reysi Rostov viloyati osmoni yopilgani uchun majburan ortga qaytmoqda
Uzbekistan Airways 24 fevral kuni Namangan — Krasnodar yo‘nalishi bo‘yicha HY-9825 reysi Rossiyaning Rostov viloyati havo maydoni yo‘lovchi samolyotlari uchun yopilgani sababli ortga majburiy qaytayotganini ma’lum qildi.
Samarqandda avtoshohbekatni zo‘ravonlik bilan egallashda gumonlanayotgan bir guruh sportchilar qo‘lga olindi
Samarqandda huquqni muhofaza qiluvchi organlar tomonidan taksi haydovchilaridan «o‘lpon» undirib kelganlikda gumonlanayotgan yana bir guruh fuqarolar qo‘lga olindi. Ular sportchilar ekanligi aytilmoqda. Holat yuzasidan jinoiy ish qo‘zg‘atilib, tergov harakatlari olib borilmoqda.
Yakkasaroyda ishchilariga namoz o‘qishga sharoit yaratib bergan tadbirkor 21,6 mln so‘m jarimaga tortildi
Toshkentning Yakkasaroy tumanida GTA Showroom kompaniyasi rahbari korxona binosida ishchi va mijozlarga namoz o‘qishga sharoit yaratib bergani uchun 21,6 mln so‘m miqdorida jarimaga tortildi. «Milliy tiklanish» partiyasi yetakchisi Alisher Qodirov sudya MJTKning 201-moddasini noto‘g‘ri qo‘llaganini, namoz o‘qish «diniy marosim emas, balki e’tiqodning o‘zagi, erkinligi kafolatlangan huquq» ekanini ta’kidladi.
Yana qanday karantin cheklovlari bekor qilinmoqda?
O‘zbekistonda umumiy ovqatlanish joylari va ko‘ngilochar obyektlar ish vaqtiga nisbatan cheklovlar hamda umumiy ovqatlanish joylari va jamoat transporti harakatlanuvchi tarkibi umumiy sig‘imidagi o‘rinlarni 50 foizgacha qisqartirish talabi bekor qilindi. Bosh vazir Abdulla Aripov mazkur cheklovlarning bekor qilinishini “odatiy hayot tarziga qaytishning dastlabki qadamlaridan biri” deb atadi.
Eng ko‘p o‘qilgan xabarlar | So‘nggi yangiliklar
- Maktab ta’limi vazirligi “So‘nggi qo‘ng‘iroq”ni o‘tkazish bo‘yicha an’anaviy tavsiyalarni berdi
- Samarqandda xandaq qazilgani ortidan qo‘shni uy qulab tushdi (video)
- 14-mayda diniy tadbir tufayli vaqtinchalik avtobus yo‘nalishlari tashkil etiladi
- Qisqa yomg‘irdan so‘ng Toshkent ko‘chalarini suv bosdi (video)
Qo‘shimcha imkoniyatlarga ega bulish uchun saytda ro‘yxatdan o‘ting