Tarmoqlarda Toshkent xalqaro aeroportida unutib qoldirgan yuklar 26 ming so‘mdan sotilayotgani haqida xabar tarqaldi. Uzbekistan Airports yolg‘on ma’lumotlarga ishonmaslikka va firibgarlarga pul o‘tkazmaslikka chaqirdi. Kompaniya yuklari sotilmasligi va uchinchi shaxslarga berilmasligi bildirdi.
“Dok-1 Maks” ishi bo‘yicha 13-noyabrda bo‘lgan sudda farzandidan ayrilgan to‘qqiz jabrlanuvchi ko‘rsatma berdi. Ulardan biri Farmagentlik sobiq rahbari Sardor Kariyev bilan munozaraga kirishdi. Sudda tibbiyot xodimlari va Sog‘liqni saqlash vazirligining mas’uliyatsizligiga e’tibor qaratish chaqiriqlari yangradi.
O‘zbekistonda 9 oy davomida onalar o‘limi ko‘rsatgichi 100 ming tirik tug‘ilishga nisbatan 14,1 promillini tashkil etdi. Bu ko‘rsatkich 2022-yilning shu davriga nisbatan 13,1 promilliga teng bo‘lgan. Xususan, Sirdaryo viloyatida ko‘rsatkich 11,6 promillidan 45,6 promilliga oshgan.
Oqqo‘rg‘on tumanida kelin-kuyovni olib ketayotgan vertolyot va yettita Captiva ishtirokida to‘y korteji uyushtirildi. Toshkent viloyati YHXB kortej ishtirokchilariga nisbatan ma’muriy bayonnomalar rasmiylashtirilganini bildirdi.
Ma’muriy javobgarlik to‘g‘risidagi kodeks va Litsenziyalash bo‘yicha qonunchilikka o‘zgartirish kiritildi. Endi sanitariya va gigiyena qoidalarini buzgan fuqarolar 3,3 mln so‘mgacha, mansabdor shaxslar 6,6 mln so‘mgacha jarima to‘laydi. Shuningdek, litsenziya shartlarini muntazam buzganlar undan 1 yilga mahrum bo‘ladi.
Chery Group kompaniyasi dunyo bo‘yicha bir oyda 200 ming dan ortiq avtomobil sotdi, bu ko‘rsatkich 2022-yilning oktabridan 50,8 foizga ko‘proq.
Samarqandda noqonuniy muomaladan olib qo‘yilgan 1 mlrd 668 mln so‘mlik 117 ming qutidan ziyod sigaret va chilim uchun tamaki mahsulotlari yo‘q qilindi. Ular maxsus texnikalarda yanchilib, suvga bo‘ktirildi va yaroqsiz holga kelgach, ko‘mib yuborildi.
Davlat bayrog‘i kuni bag‘ishlangan “Yangi nafas” xalqaro ommaviy yugurish musobaqalari o‘tkazilishi munosabati bilan Toshkentdagi ayrim ko‘chalar 17−19-noyabr kunlari yopiladi.
O‘zbekiston uchun kuchayib borayotgan qum va chang bo‘ronlari muammosi har qachongidan ham dolzarbdir, dedi ekologiya vaziri Aziz Abduhakimov. Shuningdek, Markaziy Osiyo va Xitoy bugungi kunda atmosferaga chang chiqarish bo‘yicha dunyoda ikkinchi o‘rinda ekani ma’lum qilindi.
Deputat Oltinoy Ma’mirova O‘zbekistonda energetik ichimliklar uchun alohida aksiz solig‘ini joriy etishni taklif qildi. U 1-apreldan shirin gazlangan ichimliklar uchun taklif qilingan litri uchun 500 so‘m aksiz solig‘idan 10 baravar yuqori bo‘ladi. Bosh vazir o‘rinbosari Jamshid Qo‘chqorov uning taklifini ma’qulladi.
Toshkent viloyati hokimiyati egasiz itlar saqlanadigan “Hayot” boshpanasining yangi filiali uchun Chirchiq chetidan qariyb 2 gektar yer ajratdi. Qurilishga Milliy gvardiya yordam beradi. Avvalroq “Hayot” qarzlar tufayli hayvonlarni qabul qilishni to‘xtatmoqchi bo‘lgan edi.
Zoyir Mirzayev o‘zining ikki o‘rinbosari va Yuqori Chirchiq hokimiga BYD xizmat mashinalarini xarid qilish uchun 1 mlrd 336,5 mln so‘m ajratish to‘g‘risida farmoyish chiqardi. Hokimlik avtotransportlarni almashtirishga ehtiyoj ulardan 5 yildan ortiq foydalanilgani sababli tug‘ilganini bildirdi.
Avvalroq Qonunchilik palatasi XDP fraksiyasi drondan noqonuniy foydalanganlik uchun javobgarlikni kuchaytirishga oid qonun loyihasini ko‘rib chiqqanini xabar qilgandi. “Gazeta.uz” e’tibor qaratgach, palata spikeri o‘rinbosari Odiljon Tojiyev jazo yengillashtirilayotgani va xabar tahrirlanganini ma’lum qildi.
Shayxontohur tumanidagi “Baland” masjidining tarixiy binosi yangi quriladigan masjid bilan o‘rab olinadi. Hokimlik bunday “konservatsiya” yondashuvini kelgusida tarixiy ahamiyatga ega boshqa diniy obyektlarda ham qo‘llash rejalashtirilganini qayd etdi.
Kompromatuzb ishi bo‘yicha 7 yilga qamalgan Xurshid Daliyev va Siyovush Hoshimovning apellyatsiya shikoyatlari qanoatlantirilmasdan qoldirildi. Ushbu ajrimdan norozi taraflar Oliy sudga kassatsiya tartibida shikoyat berishi mumkin.
BMTning Cho‘llanishga qarshi kurash to‘g‘risidagi konvensiyasi ijrosiga bag‘ishlangan sessiya ishtirokchilari Samarqand viloyatida 1000 tup ko‘chat ekdi. Bu hudud “CRIC-21 yashil bog‘i” deb nomlandi.
Xalq demokratik partiyasi fraksiyasining yig‘ilishida dronlardan noqonuniy foydalanganlik uchun javobgarlikni kuchaytirishni nazarda tutuvchi qonun loyihasi muhokama qilindi. Jazo choralari qat’iy belgilangan bo‘lsada, ushbu toifadagi jinoyatlar soni yildan yilga ko‘payib borayotgani aytilgan.
Sog‘liqni saqlash vaziri Amrillo Inoyatov sentabrda bolalar yod tarkibli “Antistrumin” dorisidan ommaviy zaharlangani haqida gapirib, preparatni berishda doza oshirib yuborilganini tan oldi. Avvalroq uning o‘rinbosari Elmira Bositxonova holat sababi dori emas, O‘RVI bo‘lishi mumkinligini bildirgandi.
“Ko‘mir ta’minot” korxonasining Toshkent viloyati filiali boshlig‘i 50 ming dollar pora olishda gumonlanmoqda. U fuqaroga ishga kirishda yordam berish uchun pul olayotganda ushlandi. Shuningdek, korxonaning Samarqanddagi omborlari mudirlari 2 ming tonnadan ortiq ko‘mirni talon-toroj qilgani aniqlandi.
“Xovrenko” nomidagi Samarqand vino kombinatida qalbaki aksiz markali alkogol mahsulotlari ishlab chiqarilayotgani aniqlandi. Tadbir yakunida jami 631,7 mln so‘mlik tovar moddiy boyliklar ashyoviy dalil sifatida olingan.
Qo‘shimcha imkoniyatlarga ega bulish uchun saytda ro‘yxatdan o‘ting