Yevropa Ittifoqining sanksiyalar bo‘yicha maxsus vakili Devid O’Sallivan O‘zbekistonga tashrif buyurishi kutilmoqda. YeIning Toshkentdagi delegatsiyasi «Gazeta.uz»ga tashrif aprel oyi oxirida bo‘lishi mumkinligini ma’lum qildi.
Vaqtincha poytaxt hokimi bo‘lgan Baxtiyor Rahmonov Toshkent shahri hokimining qurilish, kommunikatsiyalarni rivojlantirish, ekologiya va ko‘kalamzorlashtirish masalalari bo‘yicha birinchi o‘rinbosari lavozimiga tayinlandi. U avval ham hokim o‘rinbosari sifatida faoliyat yuritgan.
Qozog‘iston prezidenti O‘zbekiston bilan davlat chegarasini demarkatsiya qilish to‘g‘risidagi bitimni ratifikatsiyalash bo‘yicha qonunni imzoladi. Bitim ikki davlat prezidentlari tomonidan 2022 yilning dekabrida Toshkentda imzolangan. Demarkatsiya bo‘yicha muzokaralar 2003 yildan beri davom etib kelayotgandi.
Budapeshtda O‘zbekiston elchixonasi ochildi. Marosimda O‘zbekiston va Vengriya tashqi ishlar vazirlari Baxtiyor Saidov va Peter Siyyarto ishtirok etdi. Vengriya 2016 yilda Toshkentda elchixonasini ochgandi.
MSK Konstitutsiya bo‘yicha o‘tkaziladigan referendum uchun chet davlatlarda 55 ta uchastkalari tuzilishini ma’lum qildi. Xususan, Rossiyada 7 ta, Qozog‘iston va Xitoyda 3 tadan, AQSh, BAA, Germaniya, Janubiy Koreya, Saudiya Arabistoni, Turkiyada 2 tadan tashkil etiladi. Ular Toshkentdagi 14-okrugga biriktiriladi.
Prezident Administratsiyasi sho‘’ba mudiri Saida Mirziyoyeva AQShga tashrifi chog‘ida Amerika «Tinchlik korpusi» ko‘ngillilarining O‘zbekistondagi faoliyatini qayta tiklash hamda gender tengligini birgalikda targ‘ib qilish masalalarini muhokama qildi.
Tashqi mehnat migratsiyasi agentligi boshlig‘i Afzal Irmatov hibsga olindi. Hozirda uning xatti-harakatlari yuzasidan tergov ishlari olib borilmoqda.
Farrux Boboyev Maktabgacha ta’lim agentligi direktoriga birinchi o‘rinbosar, Oyatillo Raxmatillayev va Nodir Muslitdinov esa o‘rinbosarlar etib tayinlandi.
Namangan viloyati prokurori lavozimida ishlab kelgan Bektosh Sayipov Qashqadaryo viloyatiga prokuror etib tayinlandi.
Prezident Administratsiyasi sho‘’ba mudiri Saida Mirziyoyeva BMTning suv resurslari bo‘yicha konferensiyasida so‘zga chiqib, «Orol madaniyati sammiti» loyihasini taqdim etdi. «San’at, dizayn va madaniyat Orolbo‘yidagi muammolardan xabardorlikni oshirishda hal qiluvchi rol o‘ynashi mumkin», — dedi u.
Ulug‘bek Rozuqulov yana «O‘zavtosanoat» kompaniyasi boshqaruvi raisi bo‘ldi. U avval bosh vazir o‘rinbosari va milliy aviakompaniya rahbari lavozimlarida ham faoliyat yuritgan.
Andijon viloyati Asaka tumani sobiq hokimi Mansur Alixonovga nisbatan 3 yil 1 oy muddatga ozodlikni cheklash jazosi tayinlandi. Shuningdek, tumanning ikki mansabdoriga ham sud hukmi o‘qildi.
Sobiq maktabgacha ta’lim vaziri Agrippina Shin maktabgacha va maktab ta’limi vazirining birinchi o‘rinbosari — Maktabgacha ta’lim agentligi direktori etib tayinlandi.
O‘zbekiston Markaziy saylov komissiyasi 23 mart kuni referendum o‘tkazuvchi 14 ta okrug komissiyalarini tuzish to‘g‘risida qaror qabul qildi va ularning tarkiblari tasdiqladi.
«O‘zavtosanoat» kompaniyasi raisi, Bosh prokuratura departamentining sobiq rahbari Shavkat Umurzoqov Toshkent hokimi vazifasini bajaruvchi etib tayinlandi, deya «Gazeta.uz»ga hukumatdagi manbalari ma’lum qildi.
Prezidentning tashqi siyosat masalalari bo‘yicha maxsus vakili Abdulaziz Komilov boshchiligidagi delegatsiya Afg‘oniston rasmiylari bilan uchrashdi. Unda savdo-iqtisodiy aloqalarni kengaytirish, tranzit yuklarni tashish hajmini oshirish va ayollar huquqlarini himoya qilish kabi masalalar muhokama qilindi.
O‘zbekiston prezidenti 1−2 may kunlari Germaniyaga tashrif buyurishini ma’lum qildi. U Germaniyada «O‘zbekistonni to‘g‘ri tushunishlarini» ta’kidladi, buni u «juda qadrlaydi». Bu haqda Shavkat Mirziyoyev O‘zbekiston nemislari madaniyat markazi rahbari bilan suhbatda aytib o‘tdi.
Shavkat Mirziyoyev O‘zbekiston va Iroq terma jamoalari o‘rtasidagi U20 Osiyo kubogi final uchrashuvi bo‘lib o‘tayotgan Toshkentdagi «Milliy» stadioniga keldi.
Shavkat Mirziyoyev Turkiy davlatlar tashkilotining navbatdan tashqari sammitida tashkilotning tizimli hamkorlik platformasi, shuningdek, Tabiiy ofatlar monitoringi markazini yaratishni taklif qildi. O‘zbekiston Hatay viloyatining Ovakent tumanini qayta tiklashga ham yordamlashadi.
O‘zbekiston prezidenti Shavkat Mirziyoyev va Vengriya bosh vaziri Viktor Orban to‘g‘ridan-to‘g‘ri aviaqatnovlarni yo‘lga qo‘yish hamda ikki davlat korxonalari o‘rtasida hamkorlik qilish uchun ishlab chiqarish maydonini tashkil etish masalalarini muhokama qildi.
Qo‘shimcha imkoniyatlarga ega bulish uchun saytda ro‘yxatdan o‘ting