26−27 май кунлари Исроил Рафаҳдаги чодирлар лагерларга ҳаво ҳужуми уюштирди. Ғазонинг ҲАМАС назоратидаги Соғлиқни сақлаш вазирлиги маълумотларига кўра, ҳужум оқибатида камида 45 киши ҳалок бўлган, яна юзлаб одамлар куйиш, синиш каби ҳамда бомба парчаларидан жароҳат олди. Бу ҳақда BBC рус нашри хабар қилди.
Исроил парламентида сўзлаган Нетаняху зарба «фожиали бахтсиз ҳодиса» эканлигини айтди, аммо шундай қўшимча қилди: «Мен барча мақсадларга эришилмагунча урушни тугатиш ниятида эмасман».
Унинг сўзларига кўра, Исроил тинч аҳолини ҳимоя қилиш учун барча мумкин бўлган эҳтиёт чораларини кўрмоқда ва «Исроил армияси можарога алоқадор бўлмаганларга зарар етказмаслик учун ҳаракат қилмоқда».
«Рафаҳда биз миллионлаб аҳолини эвакуация қилдик, аммо ҳаракатларимизга қарамай, кеча фожиали воқеа содир бўлди», — деди Нетаняху парламентда. «Биз ушбу ҳодисани текширамиз ва хулоса чиқарамиз, чунки бу бизнинг сиёсатимиз», — дея қўшимча қилди у.
Исроилнинг зарбаси халқаро, жумладан, гуманитар ташкилотлар, БМТ ва Европа Иттифоқи томонидан қораланди. Европа Иттифоқи дипломатияси раҳбари Хосеп Боррелнинг айтишича, Исроил БМТ судининг Рафаҳга ҳужумни тўхтатишга буйруқ берган қарорини ҳурмат қилиши керак.
«Бу операциялар тўхтатилиши керак. Рафаҳда фаластинлик тинч аҳоли учун хавфсиз ҳудудлар йўқ», — деб ёзди Франция президенти Эммануэл Макрон Х (собиқ Twitter) ижтимоий тармоғида. «Мен халқаро ҳуқуқни тўлиқ ҳурмат қилишга ва зудлик билан ўт очишни тўхтатишга чақираман», — дея қўшимча қилди Макрон.
Исроилнинг ҲАМАС билан музокараларида воситачилик қилаётган Қатар Ташқи ишлар вазирлиги бу воқеа тўхтаб қолган маслаҳатлашувларни қайта тиклаш ва гаровга олинганларни озод қилиш ҳаракатларига тўсқинлик қилиши мумкинлигидан огоҳлантирди.
Ахборот агентликларининг дипломатик манбаларига кўра, сешанба куни Жазоир ташаббуси билан БМТ Хавфсизлик кенгашининг фавқулодда йиғилиши бўлиб ўтади.
Исроил якшанба куни Рафаҳга ҳужумни ҲАМАС бир неча ой ичида Тел-Авивга биринчи ракета ҳужумини уюштирганидан бир неча соат ўтиб бошлади.
Исроил расмийларига кўра, якшанба куни Рафаҳда уюштирилган зарбада икки нафар юқори мартабали ҲАМАС жангарилари Ясин Рабия ва Ҳолид Нагар ҳалок бўлган.
«Зарба халқаро қонунларга мувофиқ, аниқ ўқ-дорилардан фойдаланган ҳолда ва ҲАМАС ҳудуддан фойдаланаётганини кўрсатувчи аниқ разведка маълумотларига асосланиб, қонуний нишонларга қарши амалга оширилди», — деди якшанба куни исроиллик ҳарбийлар.
Фаластин Қизил Ярим Ой жамиятининг билдиришича, Исроил Рафаҳ марказидан тахминан 2 километр шимоли-ғарбда жойлашган Тал ас-Султонда БМТ ҳудуди яқинида кўчирилган одамлар учун чодирларни нишонга олган.
Воқеа жойидан олинган видео ва фотосуратларда кучли ёнғин, чодирлар ва автомобилларнинг ёнаётган қолдиқлари, шунингдек, қутқарувчилар ва ўтганларнинг жасадларини олиб кетаётгани акс этган.
Халқаро Қизил Хоч қўмитаси жароҳат олганлар ва куйганлар учун даволанишни сўраб дала шифохоналаридан бирига қурбонлар оқими бўлганини таъкидлади.
«Чегара билмас шифокорлар» (ЧБШ) душанба куни ўз муассасаларидан бирида ҳужумдан сўнг камида 28 киши, жумладан, аёллар ва болалар ҳалок бўлгани ва 180 киши яраланганини маълум қилди. ЧБШ Исроилнинг зарба аниқ бўлгани ҳақидаги даъволарини рад этди.
АҚШ расмийлари эса «Исроил тинч аҳолини ҳимоя қилиш учун барча чораларни кўриши керак»лигини қайд этди.
Исроил ҳужуми якшанба куни ҲАМАС Тел-Авив ва Исроил марказининг бошқа қисмларини бир неча ой ичида биринчи марта ракета отганидан бир неча соат ўтиб содир бўлди ва одамлар бомба бошпаналарига қочди. Исроил ҳаво ҳужумига қарши мудофаа тизими ракеталарнинг кўп қисмини йўқ қилди.
ҲАМАСнинг ҳарбий қаноти Иззиддин ал-Қассам бригадаси ўзининг Телеграм каналида «ционистлар тинч аҳолини қирғин қилишларига жавобан Тел-Авивга кучли ракета зарбалари билан» ҳужум қилганини маълум қилди.
Сешанба куни Испания, Ирландия ва Норвегия Фаластин давлатини расман тан олиши керак, бу қадам БМТга аъзо 140 дан ортиқ давлатлар томонидан амалга оширилган.
Бироқ, Испания ташқи ишлар вазири Хосе Мануэл Албарес якшанба куни айтганидек, Фаластин давлатчилигини тан олиш «Фаластин халқи учун адолат ва Исроил учун хавфсизликнинг энг яхши кафолатидир».
Фаластин давлатини тан олишни «терроризмга даъват» деб билган Исроил душанба куни Мадридга қарши жавоб чораларини эълон қилди: 1 июндан бошлаб унинг Қуддусдаги консуллигига фаластинликларга консуллик хизматлари кўрсатиш тақиқланди.
Ташқи ишлар вазири Исраил Кац «Ким ҲАМАСни рағбатлантирса ва Фаластин террорчи давлатини яратишга ҳаракат қилса, фаластинликлар билан алоқаси узилади», — деди.
7 октябрь куни ҲАМАС Исроил жанубига ҳужум қилиб, 1200 га яқин одамни ўлдирган ва 252 кишини гаровга олганидан кейин Исроил Ғазога кенг кўламли ҳужум бошлади.
Ғазонинг ҲАМАС назоратидаги Соғлиқни сақлаш вазирлиги маълум қилишича, ўшандан бери урушда камида 35 800 фаластинлик ҳалок бўлган.
- Исроил армияси май ойи бошида Рафаҳда ХАМАСга қарши «мақсадли операция» бошланганини эълон қилганди.
- Рафаҳ — Ғазо секторининг жанубидаги Миср билан чегарадош шаҳар, уруш бошланганидан бери анклавнинг шимолий ва марказий қисмларидан келган 1 миллиондан ортиқ фаластинлик қочқин у ерда бошпана топган.
- Исроил сўнгги бир неча ойдан бери Рафаҳга қуруқликдан ҳужум уюштириш билан таҳдид қилиб келмоқда. Исроил расмийларига кўра, шаҳарда минглаб ҲАМАС жангарилари ва ўтган йилнинг 7 октябрида Исроилга ҳужуми чоғида гуруҳ томонидан асирга олинган, эҳтимол, ўнлаб исроилликлар жон сақламоқда.
