Россия президенти Владимир Путин ўт очишни тўхтатиш бўйича томонларнинг фронт чизиғидаги ҳозирги позицияларини тан оладиган музокаралар ўтказиш йўли билан Украинадаги урушни тўхтатишга тайёр, деб ёзмоқда Reuters тўртта россиялик манбага таяниб.
Агентлик суҳбатдошларига кўра, агар Киев ва Ғарб бу шартларни қабул қилмаса, Путин урушни давом эттиришга тайёр.
Путин атрофидаги мунозаралардан хабардор бўлган учта манбанинг айтишича, Россия президенти ўз маслаҳатчиларининг кичик гуруҳига Ғарб бундай музокараларни издан чиқаришга уринаётгани ва Украина президенти Владимир Зеленский уларни рад этаётганидан «ҳафсаласи пир бўлганини» айтган.
«Путин қанча керак бўлса, шунча жанг қилиши мумкин, лекин Путин урушни „музлатиш“ учун ўт очишни тўхтатишга ҳам тайёр», — деди Путин билан ишлаган ва Кремлдаги юқори даражадаги суҳбатлар мазмунини биладиган юқори мартабали россиялик манба.
Манбаларга кўра, Путин «урушни ортда қолдириш» учун фронтдаги рус қўшинларининг ҳозирги динамикасидан фойдаланишни афзал кўради. Унинг фикрича, урушда эришилган муваффақиятлар рус халқига ғалабани «сотиш» учун етарли бўлади, деди Reuters`нинг икки суҳбатдоши.
Путин фронтдаги ҳар қандай янги олдинга силжиш навбатдаги мобилизация тўлқинини талаб қилишини тушунади, у буни амалга оширишни истамайди, деди учта манба. Агентлик суҳбатдошларидан бири Путиннинг аҳоли орасида машҳурлиги даражаси 2022 йил сентябридаги биринчи мобилизация тўлқинидан сўнг тушиб кетганини таъкидламоқда.
Манбалардан бири агар Россия Зеленскийни четлаб ўтиб, Вашингтон билан келишувга эришмаса, Украина президенти ҳокимиятда экан, келишувга эришиб бўлмайди, деб тахмин қилган. Бироқ ўтган ҳафта Киевда нутқ сўзлаган АҚШ давлат котиби Энтони Блинкен журналистларга Путин жиддий музокаралардан манфаатдор эканига ишонмаслигини айтди, деб ёзмоқда Reuters.
Агентликнинг барча суҳбатдошлари Путиннинг келишувга «ҳар қандай ҳарбий муваффақиятлар»ни киритиш ҳақидаги «қатъий талаби» муҳокама қилинмаслигига ишонмоқда. «Путин биз ғалаба қозонганимизни, НАТО бизга ҳужум қилганини, аммо биз суверенитетимизни сақлаб қолганимизни, Қримга томон қуруқликдаги йўлагимиз борлигини айтади», — деди улардан бири.
Reuters агентлигининг таъкидлашича, можаронинг ҳозирги фронт чизиғи бўйлаб тўхтатилиши Россияни 2022 йил сентябрида расман Россия Федерацияси таркибига киритилган, бироқ тўлиқ назорат ўрнатилмаган тўртта Украина вилоятининг муҳим қисмлари эгасига айлантиради.
Путиннинг урушни тугатиш зарурлиги ҳақидаги фикрини мустаҳкамловчи яна бир омил — у уруш қанча узоқ давом этса, шунча кўп урушда тобланган ветеранлар Россияга қайтиб келишидан, иш ва даромад имкониятларидан норози бўлиб, жамиятда кескинлик келтириб чиқариши мумкинлигидан хавотирда, дейди манбалардан бири.
Швейцариядаги саммит
Украина июнь ойида Швейцарияда бўлиб ўтадиган тинчлик саммитига тайёргарлик кўрмоқда, мақсад урушни қандай тугатиш бўйича халқаро фикрни бирлаштириш. Саммит Зеленский ташаббуси билан ташкил этилган. Россия томони унда иштирок этмаяпти.
Киев аввалроқ Россиянинг музокаралар олиб боришга тайёрлигини уруш учун айбни Украина зиммасига юклашга уриниш сифатида рад этган эди. Украина расмийларининг айтишича, 2022 йилда Украинага бостириб кириш режаларини қайта-қайта рад этган Путин ҳар қандай келишув шартларини бажаришига ишониб бўлмайди.
Россия ҳам, Украина ҳам бошқа томон қайта қуролланиш учун ҳар қандай сулҳдан фойдаланиши мумкинлигидан қўрқади, дея қайд этди Reuters.
