Қирғизистон парламенти давлат байроғини ўзгартириш ҳақидаги қонунни муҳокамаларсиз қабул қилди. Расмийлар байроқдаги қуёш нурлари шаклини баъзилар кунгабоқарга ўхшатгани сабабли ўзгартирмоқчи. Президент бу унинг ташаббуси эканини тан олиб, ўзгаришлар учун «кўп маблағ керак эмаслигини» айтди.
Европа Иттифоқи «Микротех» эгаси ва бош директори Андрей Хохлунга нисбатан санкция киритди. Ўзбекистонда туғилган россиялик тадбиркор Европадан яримўтказгичларни реэкспорт қилиш орқали Россия ҳарбий саноатига ёрдам беришда айбланган. Сентябрда АҚШ ҳам Хохлунни санкциялар рўйхатига киритганди.
Сешанбага ўтар кечаси Хитойнинг шимоли-ғарбий қисмида 6,2 магнитудали зилзила содир бўлди. Унинг оқибатида ҳозирча 118 киши ҳалок бўлгани, 500 нафардан ортиқ киши жароҳатлангани айтилмоқда. Шавкат Мирзиёев Хитой раиси Си Цзиньпинга ҳамдардлик йўллади.
Европа Иттифоқи Россияга қарши санкцияларнинг 12-пакетини қабул қилди. У Россиядан заргарлик буюмлари олмосларини олиб киришни, шунингдек, ўта нозик товарлар ва технологияларни реэкспорт қилишни тақиқлашдан иборат.
Мисрнинг амалдаги раҳбари Абдулфаттоҳ ас-Сиси 10−12 декабрь кунлари бўлиб ўтган президентлик сайловида 89,6 фоиз овоз тўплади. Бу Сисининг учинчи президентлик муддати ҳисобланади.
2020 йилдан буён Кувайт амири бўлиб келган Наваф ал-Аҳмад ал-Жобир ас-Сабоҳ 86 ёшида вафот этди. Ноябрь охирида у соғлиғи билан фавқулодда юзага келган муаммо туфайли касалхонага ётқизилган.
Европа етакчилари Украина ва Молдова билан Европа Иттифоқига аъзолик бўйича музокараларни бошлашга қарор қилди. Грузия Европа Иттифоқига кириш учун номзод давлат мақомини олди. Иттифоққа Украина қўшилишига аввал қарши чиққан Венгрия бу қарорга тўсқинлик қилмади.
Эрон ҳукумати 33 та давлат, жумладан, Ўзбекистон фуқаролари учун бир томонлама виза талабларини бекор қилиш ҳақидаги қарорни ратификация қилди. Мамлакат туризм вазири бу қарор Эрон ҳақидаги салбий пропаганда ва эронофобияга чек қўйишини билдирди.
БМТ Бош Ассамблеяси Ғазо секторида зудлик билан ўт очишни тўхтатишга чақирувчи резолюцияни қабул қилди. Уни 153 давлат, жумладан, Ўзбекистон, Россия, Хитой, Бразилия ва БАА қўллаб-қувватлади. Исроил ва АҚШ яна қарши чиқди.
13 декабрга ўтар кечаси Россия қўшинлари Киевга ракета ҳужумини уюштирди. Ҳодиса оқибатида 53 киши жароҳат олди, қатор объектларга зарар етди.
2023 йил бошидан буён дунё бўйлаб 94 нафар журналист ва ОАВ ходимлари ҳалок бўлди, уларнинг аксарияти Ғазо уруши қурбони саналади. 400 га яқин журналист турли мамлакатлар қамоқхоналарида қолмоқда.
Россия президенти Владимир Путин янги, бешинчи президентлик муддатига ўз номзодини қўйишини расман эълон қилди. Сайловлар 2024 йил 15−17 март кунлари бўлиб ўтади.
Озарбайжонда навбатдан ташқари президентлик сайлови 2024 йил 7 февралда бўлиб ўтади. Бу ҳақдаги фармойишни мамлакатни 20 йилдан бери бошқариб келаётган президент Илҳом Алиев имзолади.
Россия парламентининг юқори палатаси мамлакатда навбатдаги президентлик сайлови санасини 2024 йил 17 мартга белгилади. Владимир Путин сайловда иштирок этиш қарорини ҳали эълон қилгани йўқ.
Брянск (Россия) шаҳрида 8-синфда ўқувчи қиз гимназиядаги синфдошларига қарата ўт очди. Беш киши яраланди, икки қиз ҳалок бўлди, жумладан, ҳужум қилган қиз ўз жонига қасд қилди.
Америкалик хонанда Тейлор Свифт Time журнали томонидан «Йил одами» деб топилди. Журнал хонанданинг беш қитъада 151 та шоуни ўз ичига олган ва қўшиқчини миллиардерга айлантирган Eras Tour дастурига ишора қилиб, «Ҳозир сайёрада ҳеч ким бунча кўп одамнинг ҳисларини уйғота олмайди», дея қайд этди.
Бир қатор йирик халқаро молия институтлари, жумладан, Жаҳон банки табиий офат юз берган тақдирда мамлакатларга қарз тўлашни кечиктириш имкони берилишини ваъда қилди.
Олти кун давом этган сулҳдан сўнг Исроил Ғазо секторига зарба берди, оқибатда бир неча киши ҳалок бўлди. Жанговар ҳаракатларни қайта бошлашга ҲАМАС биринчи бўлиб ракета ҳужуми уюштиргани, бу эса сулҳга зид экани сабаб сифатида кўрсатилди.
Дубайда (БАА) БМТ халқаро иқлим саммити — COP28 очилди. 2023 йилда унда 190 дан ортиқ давлатдан 70 мингдан ортиқ киши иштирок этиши режалаштирилган. Конференциянинг асосий мақсади инсониятнинг Париж келишуви мақсадларига эришиш йўлидаги прогрессини таҳлил қилишдан иборат.
Қозоғистоннинг Олмаота шаҳридаги хостелда содир бўлган ёнғин оқибатида 13 киши, жумладан, икки нафар ёш Ўзбекистон фуқароси ҳалок бўлди. Ўзбекистон ТИВ ҳалок бўлганларнинг яқинларига жасадларни ватанга олиб келишда ёрдам беришга тайёрлигини маълум қилди.
Қўшимча имкониятларга эга булиш учун сайтда рўйхатдан ўтинг