![Украина ва Молдовани Евроиттифоққа қабул қилиш бўйича музокаралар бошланади]()
Фото: European Union
Украина ва Молдовани Евроиттифоққа қабул қилиш бўйича музокаралар бошланади
Европа етакчилари Украина ва Молдова билан Европа Иттифоқига аъзолик бўйича музокараларни бошлашга қарор қилди. Грузия Европа Иттифоқига кириш учун номзод давлат мақомини олди. Иттифоққа Украина қўшилишига аввал қарши чиққан Венгрия бу қарорга тўсқинлик қилмади.
Европа Иттифоқига аъзо давлатлар раҳбарларидан иборат Европа кенгаши Украина ва Молдова билан иттифоққа қўшилиш бўйича музокараларни бошлаш ва Грузияга номзод мақомини беришга қарор қилди. Бу ҳақда 14 декабрь куни кенгаш раҳбари Шарль Мишель Брюсселдаги ЕИ саммитининг биринчи куни якунлари бўйича маълум қилди.
Европа Кенгаши, шунингдек, мамлакат аъзолик мезонларига тўлиқ жавоб бера бошлаганидагина Босния ва Герцеговина билан Европа Иттифоқига кириш бўйича музокараларни бошлашга қарор қилди.
Украина ва Молдова президентлари Владимир Зеленский ва Майя Санду Европа кенгаши қарорларини олқишлади.
«Бу Украина учун ғалаба. Бутун Европа учун ғалаба. Рағбатлантирувчи, илҳомлантирувчи ва мустаҳкамловчи ғалаба», — деб ёзди Зеленский Х (собиқ Twitter) ижтимоий тармоғида.
«Бугун биз Европанинг илиқ қучоғини ҳис қиляпмиз. Йўлимизни қўллаб-қувватлаганингиз ва ишончингиз учун ташаккур», — деди Санду ва Молдова Европа Иттифоқига аъзо бўлиш учун «қаттиқ меҳнатга тайёр» эканини қўшимча қилди.
- Украина ва Молдова ЕИга аъзо бўлиш учун 2022 йил февраль ойи охирида, Россиянинг кенг миқёсли бостириб кириши бошланганидан сўнг ариза берди. Ҳар икки давлатга ўтган йилнинг июнь ойида номзод мақоми берилган эди.
- Ноябрь ойи бошида Еврокомиссия Европа Иттифоқи кенгашига Украина ва Молдова билан Европа Иттифоқига қўшилиш бўйича расмий музокараларни бошлашни тавсия қилди. Уларни бошлашдан олдин мамлакатлар миллий қонунларни Европа Иттифоқи қоидаларига мослаштириши керак.
- Венгрия ҳукумати аввалроқ Украинанинг Европа Иттифоқига аъзолиги бўйича музокаралар бошланишига фаол қаршилик кўрсатган. Аввалроқ қарорга тўсқинлик қилишга ваъда берган Венгрия бош вазири Виктор Орбан Брюсселдаги саммитдаги овоз бериш чоғида зални тарк этди. Бу Европа Иттифоқининг қолган 26 давлати раҳбарларига бир овоздан қарор қабул қилиш имконини берди. Politico нашрининг ёзишича, Германия канцлери Олаф Шолс Орбанни мажлисни тарк этишга кўндирган.
- Саммитда Европа Иттифоқи давлатлари ҳам Украинага 50 миллиард евролик молиявий ёрдам пакетини тасдиқлаши керак эди, бироқ Венгрия бош вазири бу қарорга вето қўйди. Европа Кенгаши раҳбари ЕИ келаси йил бошида бу масалани кўриб чиқишга қайтади, деб ишонтирди.
