18 декабрь куни Европа Иттифоқи Россияга қарши санкцияларнинг 12-пакети бўйича келишиб олди. Унинг рўйхатидан 1966 йилда Тошкентда туғилган Россия фуқароси Андрей Хохлун ҳам жой олган.
Ўн иккинчи пакет доирасида 140 дан ортиқ жисмоний ва юридик шахсга чеклов киритилган. Улар орасида «Росфинмониторинг», «МирТелеком» алоқа оператори, «АльфаСтрахование» гуруҳи, Челябинск трактор заводи, «Туполев» конструкторлик бюроси ва Татаристондаги «Алабуга» махсус иқтисодий зонаси бор.
Санкция хабарида Андрей Хохлун ҳақида сўз бораркан, унинг Россиядаги микроэлектроника ишлаб чиқарувчи компанияларга, шу жумладан, Россия ҳарбий-саноат комплексига кирувчи ёки Россиянинг мудофаа ва хавфсизлик секторини қўллаб-қувватловчи корхоналарга хорижий яримўтказгичлар технологиясини ўтказишга ихтисослашган «Микротех» компанияси эгаси ва бош директори экани қайд этилган.
Бундан ташқари, «Микротех» ЕИ санкцияларига учраган товарларни импорт қилади. «Ўз позицияси орқали Хохлун Қримнинг аннекция қилиниши ва Украинадаги беқарорлик учун масъул бўлган Россия ҳукуматини моддий жиҳатдан қўллаб-қувватламоқда», — дейилади ҳисоботда.
Сентябрь ойида АҚШ молия вазирлиги Хохлунни санкциялар рўйхатига киритганди. Унда «Микротех» компанияси июль ойидан бери санкциялар остида қолаётгани, «қора рўйхат»га унинг яна иккита компанияси — Россиянинг «Кеко Р» ва Словениянинг Arktec компаниялари киритилгани ҳақида сўз борган.
Европа Иттифоқининг Россияга қарши санкцияларининг 12-пакети Россиядан заргарлик буюмлари олмосларини олиб киришни, шунингдек, ўта нозик товарлар ва технологияларни реэкспорт қилишни тақиқлашни ўз ичига олади.
