Россия президенти Владимир Путин янги, бешинчи президентлик муддатига ўз номзодини кўрсатишини айтди. Бу ҳақда у 8 декабрь куни Кремлда Россия Қаҳрамонларини тақдирлаш маросимидан кейин айтди.
Донецк Халқ Республикаси (ДХР) парламенти спикери Артём Жога Путинга тегишли сўров билан мурожаат қилди ва Россия Федерацияси президенти бу таклифга рози бўлди.
«Катта раҳмат, ҳар хил вақтларда ҳар хил фикрда бўлганимни яширмайман. Аммо ҳозир, сиз ҳақсиз, ҳозир қарор қабул қилиш керак бўлган вақт. Мен Россия Федерацияси президенти лавозимига номзодимни қўяман», — деди Россия раҳбари.
Путиннинг давлат раҳбари сифатидаги амалдаги ваколатлари 2024-йил 7-майда тугайди. Россия Федерацияси Марказий сайлов комиссияси аввалроқ 2024 йилда Россия президенти сайловини уч кун ичида — 15 дан 17-мартгача ўтказиш тўғрисида қарор қабул қилган эди.
Бу сафар президентликка кетма-кет икки муддатдан ортиқ сайланишни тақиқловчи конституциявий чеклов амал қилмайди. 2020-йилда мамлакатнинг асосий қонунига ўзгартиришлар киритилган. Шу сабаб ўша пайтда амалда бўлган давлат раҳбари аввалги шартларни ҳисобга олмаган ҳолда ушбу лавозимга яна ўз номзодини қўйиши мумкин бўлади.
