ДХХ ҳудудларда гиёҳвандлик воситалари савдоси билан шуғулланишда гумонланган 8 кишини қўлга олди. Улардан бири тожикистонлик наркокуръерлар яшириб кетган моддани олиб кетаётганида, яна бири Қирғизистондан контрабанда йўли билан келтирилган наркотикни сотаётганида ушланди.
Пойтахтдаги қурилиш корхонаси ходими кўп қаватли турар жой биноларини қуришга рухсат берувчи ҳужжатларни расмийлаштириб бериш эвазига тадбиркордан 300 минг доллар олганликда гумонланиб қўлга олинди.
Фарғонада махсус мактаб интернат ходими ҳамда ўқитувчи, Тошкент шаҳрида талаба, Бухорода эса университет ходими фуқаролардан ўқишга киритиб қўйиш учун пул олганликда гумонланиб ушланди. Сирдарё вилоятида ҳам бир фуқаро 4500 доллар билан худди шу жиноят бўйича қўлга олинди.
ДХХ ва бошқа ҳуқуқ-тартибот идоралари ходимлари томонидан яқинда ўтказилган тезкор тадбирлар давомида ноқонуний муомаладан қарийб 14 кг гиёҳвандлик воситалари мусодара қилинди, уларнинг аксарияти Қирғизистон ва Тожикистондан Ўзбекистонга олиб кирилган.
ДХХ ходимлари томонидан Қизилтепа туманида 195 дона майнинг қурилмаларини ўрнатган ферма аниқланди. Электр энергиясидан ноқонуний фойдаланиш оқибатида ферма давлатга 9,6 млрд сўм зарар етказгани маълум бўлди.
Қорақалпоғистонда фермер мансабдор танишлари орқали жами 620 гектар ерни $400 мингга фуқаро номига расмийлаштириб бермоқчи бўлгани, пулнинг ярмини олган вақтида ушлангани айтилмоқда. Шунингдек, Самарқанд ва Наманган вилоятларида ҳам ноқонуний ер савдоси билан боғлиқ ҳолатлар аниқланди.
ДХХ томонидан Самарқандда икки фуқарони Мексика орқали Қўшма Штатларга юбориши учун 44 минг доллар талаб қилган шахс ушланди.
Давлатобод туманида соф қуйма олтинларни 20 минг долларга сотаётган икки шахс ушланди. Экспертиза хулосасига кўра, олтин баҳоси 222,8 млн сўмга баҳоланган.
ДХХ «Хоразм йўл қурилиш» бўлим бошлиғини тадбиркордан 48 минг доллар олаётганда, Хивада эса Давлат кадастрлари палатаси ходимини ер сотиб олган фуқародан 60 минг доллар олаётган вақтда қўлга олди.
2022 йилда Россияда меҳнат мигранти бўлиб ишлаган Яккабоғ туманида яшовчи фуқаро жамоат хавфсизлигига таҳдид солувчи материалларни тарқатиш ва терроризмни молиялаштиришда айбланиб, 6 йилга озодликдан маҳрум этилди.
ДХХ ходимлари томонидан 1 килограмдан зиёдроқ оғирликдаги 999 пробали олтин бўлаклари ва 838 грамли ёқут тошининг ноқонуний айланмасига чек қўйилди. Уларнинг умумий нархи 1,27 млрд сўмдан ошади.
ДХХ томонидан Фарғона ва Андижон вилоятларида фуқароларнинг ишончига кириб, Ҳаж зиёратига юбориш эвазига пул олган шахслар қўлга олинди.
Яшнобод ва Учтепа туманларида фуқароларга жами $22,5 минг эвазига Ҳаж визаси ва квота олиб бермоқчи бўлган фирма мутасаддилари қўлга олинди. Улар 4 минг долларни бўнак сифатида олаётганларида ашёвий далиллар билан ушланган.
Тошкентда хусусий фирма раҳбарлари танишлари орқали фуқаро ва унинг онасига Ҳаж визасини тайёрлаб бериш учун 20 минг доллар сўрагани айтилмоқда. Улар 4 минг долларни олган вақтда ашёвий далиллар билан ушланган.
Сергели туманида тўрт нафар фуқаро 100 минг қалбаки АҚШ долларини 70 минг долларга сотишда гумонланиб қўлга олинди. Уларга нисбатан жиноий иш қўзғатилди.
Жиззах вилояти прокуратураси бўлим прокурори жиноят иши қўзғатишни рад этганини иддао қилиб, «хизмати» учун тадбиркордан 1300 доллар сўраганликда гумонланмоқда, у пулларни олган вақтида ушланди. Шунингдек, ДХХ Андижон вилоятида ҳам пора олганликда гумонланаётган мансабдорларни қўлга олди.
ДХХ 30 минг доллар эвазига фуқарони АҚШга ноқонуний юборишга келишиб, шундан 5000 долларни олишда гумон қилинган шахсни ушлади. Бошқа ҳолатда ҳам бир нечта фуқаро айни шу суммани олганликда айбланиб қўлга олинди.
Самарқандда солиқ бошқармаси солиқ назорати бўлими бош инспектори фуқаронинг қарздорлигини камайтириб бериш эвазига ундан 15 минг доллар олгани айтилмоқда. Наманганда эса адвокат суд ишини ижобий ҳал қилиб бериш учун фуқародан 7 минг доллар олгани гумон қилинмоқда.
Самарқанд шаҳрида АҚШ ва Канадага фуқароларни ноқонуний равишда жўнатмоқчи бўлиб, улардан пул олган шахслар қўлга олинди.
ДХХ пойтахтда 40 килограммга яқин гиёҳванд моддани Ўзбекистон орқали бошқа давлатга олиб ўтмоқчи бўлган икки ўзбекистонлик ва бир нафардан Тожикистон ва Қозоғистон фуқароларини ушлади. Тергов ҳаракатлари кетмоқда.
Қўшимча имкониятларга эга булиш учун сайтда рўйхатдан ўтинг