Тошкентда фуқароларга Ҳаж квотаси ва виза тайёрлаб беришни ваъда қилган хусусий фирма раҳбарлари қўлга олинди, дея хабар бермоқда Давлат хавфсизлик хизмати.
Хусусан, Z.T. МЧЖ раҳбари И.Д. фуқаро И.Б.га ўзининг Дин ишлари бўйича қўмитада ишловчи танишлари орқали 12,5 минг доллар эвазига Ҳаж зиёратини амалга ошириш учун квота олиб беришни ваъда қилгани аниқланган. 31 май куни Яшнобод туманида ўтказилган тезкор тадбирда бўнак сифатида 1000 долларини олган вақтда холислар иштирокида ашёвий далиллар билан ушланган.
Шунингдек, 2 июнь куни Учтепа туманида жойлашган A.K. МЧЖ офисида ўтказилган тезкор тадбирда компания раҳбари A.M. ва ходимлар — И.И., М.Х. фуқаро Т.И.ни алдагани маълум бўлган.
Унга юқори лавозимда ишловчи мансабдор танишлари орқали 10 минг доллари эвазига Ҳаж зиёратини амалга ошириш учун виза қилиб беришни ваъда қилиб, шундан 3000 долларини олган вақтда холислар иштирокида ашёвий далиллар билан ушланган.
Ҳар иккала ҳолатлар юзасидан фирма мутасаддилари ва бошқаларга нисбатан Жиноят кодекснинг 168-моддаси (Фирибгарлик) 2-қисми «б» банди ва 28,211-моддаси 1-қисми билан жиноят иши қўзғатилган. Ҳозирда дастлабки тергов ҳаракатларини олиб борилмоқда.
Аввалроқ 31 май куни яна Яшнобод туманида ўтказилган тезкор тадбирда хусусий фирма раҳбарлари 20 минг доллар эвазига фуқаро ва унинг онасига Ҳаж визасини тайёрлаб бермоқчи бўлиб, шундан 4 минг долларни олаётганда қўлга тушгани ҳақида хабар қилинган эди.
Маълумот ўрнида, Дин ишлари бўйича қўмита Ўзбекистонда фуқароларни Ҳажга юбориш ваколати фақатгина қўмита ва Мусулмонлар идорасида мавжуд экани, хусусий компанияларнинг ушбу фаолиятни олиб бориши ноқонуний эканини маълум қилган эди. Ноқонуний сафарлар учун Саудия Арабистонидан депорт қилиш ва 10 йилга киришни тақиқлаш жазоси кўзда тутилгани эслатиб ўтилган.
Эслатиб ўтамиз, 4 июнь куни Uzbekistan Airways`нинг бортида 240 нафар зиёратчиси бўлган илк рейси Тошкентдан Мадинага учиб, 2023 йилги Ҳаж мавсумини очиб берди. Мусулмонлар идораси зиёратчиларнинг яқинларига тиқилинч ва тирбандликнинг олдини олиш учун аэропортга келмай, масжидлардан кузатиб қўйишни тавсия қилди.
