Футбол бўйича Ўзбекистон ёшлар терма жамоаси мураббийи Тимур Кападзе 3 май куни Қатарда U-23 Осиё кубогининг финалида Японияга қарши баҳс олдидан матбуот анжуманида иштирок этди.
Миллий олимпия қўмитасининг Кападзедан иқтибос келтиришича, «Олимпия ўйинлари йўлланмаси жамоа кучига куч қўшмоқда».
«Эртага қизиқарли учрашув кутиб турибди. Бир-бирига муносиб икки жамоанинг ўйинига гувоҳ бўламиз. 2 йил аввал ўзимиздаги Осиё кубогида улар каби биз ҳам ёш таркиб билан ҳаракат қилган эдик. Шунингдек, финалга етиб келгани ва Париж-2024 Олимпия ўйинларига йўлланма олгани билан Япония жамоасини ҳам қутлайман», — деди мураббий.
Матбуот анжуманида қатнашган жамоа сардори Жасур Жалолиддиновнинг сўзларига кўра, эртанги ўйинга муносиб тайёргарлик кўрилган ва йигитлар яхши натижа кўрсатишга ҳаракат қилади.
Кападзедан эртанги ўйинда Япония жамоасидан қандай ўйин кутаётгани ҳақида сўралди.
«Иккала жамоа ҳам бир-бирини яхши билади. Уларнинг ўйинларини таҳлил қилиб чиқдик. Финал учун тайёрлаган режамиз бор ва шунга асосан ўйин кўрсатамиз», — дея таъкидлади мураббий.
Унга, шунингдек, Париж-2024 ёзги Олимпия ўйинлари йўлланмаси ўзбек футболи учун қандай аҳамият касб этиши ҳақида савол берилди.
Фото: ЎФА
«Биз бу натижадан жуда ҳам хурсандмиз. Зеро, футболимиз тарихида дастлабки Олимпиада йўлланмасига эга чиқдик. Бизгача жамоаларимиз ҳаракат қилишган эди. Лекин қайсидир паллада уларга омад етишмаган. Олимпиада лицензияси кучимизга янада куч қўшмоқда. Эртанги финалда янада яхши ўйнашга ҳаракат қиламиз», — деди у.
Бош мураббий, бундан ташқари, легионерлар — Аббосбек Файзуллаев, Ҳожимат Эркинов ва Абдуқодир Ҳусановнинг финал баҳсида ўйнай олмаслиги унинг режаларига қандай таъсир кўрсатиши ҳақидаги саволга жавоб берди.
«Агар легионерларимиз финалда ҳам иштирок этишганида, бошқача бўлар эди. Лекин биз Қатарга 11 та эмас, 23 та футболчи билан ташриф буюрганмиз. 3 нафар ўйинчи кетгани билан у қадар катта ўзгариш бўлмайди. Ҳар бир ўйинимиз кўрсатдики, жамоада уларнинг ўрнини тўлдира оладиган йигитлар бор ва улар буни билдиришмайди», — деб сўзларини якунлаган Кападзе мезбонларга ташкилотчилик ва меҳмондўстлик учун миннатдорлик билдирди.
Эслатиб ўтамиз, чемпионлик учун Японияга қарши ўйин 3 май куни соат 20:30 да бошланади.
