Давлат хавфсизлик хизмати ходимлари томонидан олтин ва ёқут тошининг ноқонуний айланмасига чек қўйилди, дея хабар бермоқда ЎзА.
Булунғур туманидаги «Юқори нуқта» ЙПХ масканида ўтказилган тезкор тадбирда Тошкент шаҳрига ҳаракатланаётган 1983 йилда туғилган фуқаро бошқарувидаги Nexia автомашинаси тўхтатилиб, кўздан кечирилган.
Унинг салон қисмида умумий оғирлиги 1 килограмм 75 грамм бўлган 11 дона бўлакдаги олтин борлиги аниқланиб, процессуал тартибда расмийлаштириб олинган. Мутахассисларнинг баҳолашича, ушбу 999 пробали олтиннинг қиймати 795 млн сўмни ташкил этади.
Яна бир тезкор тадбирда 1968 йилда туғилган шахс соф оғирлиги 838 грамм бўлган ёқут қимматбаҳо тошини 300 минг долларга сотишга келишиб, 80 минг долларни олган вақтида ашёвий далиллар билан ушланган.
Тезкор суриштирув ҳаракатлари давомида у мазкур қимматбаҳо тошни 1960 йилда туғилган фуқародан олганли аниқланиб, кўрилган чора-тадбирлар натижасида у ҳам ушланган. Мутахассисларнинг баҳолашича, ушбу қимматбаҳо тошнинг нархи 477 млн 256 минг сўмни ташкил этади.
«Ҳар икки фуқаро ҳам муқаддам фирибгарлик билан боғлиқ жиноятлари учун судланган бўлсалар-да, ўз хатоларидан тўғри хулоса чиқаришмаган», — дейилади хабарда.
Ҳозирда ҳар икки ҳолат юзасидан мазкур шахсларга ва бошқаларга нисбатан Жиноят Кодексининг 177-моддаси (Валюта қимматликларини қонунга хилоф равишда олиш ёки ўтказиш) 4-қисми «а» банди билан жиноят ишлари қўзғатилиб, тергов ҳаракатлари олиб борилмоқда.
