Афғонистонда кўкнори етиштириш сезиларли даражада камайган бўлса-да, у ерда опиоидлар ўрнини босувчи метамфетамин ҳам етиштирилади. Шу муносабат билан Ўзбекистонга метамфетамин етказиб бериш кўпайиши мумкин, дея огоҳлантирди Марказий Осиёда наркотик моддалар тарқалишининг олдини олиш дастури.
ЮНИСEФнинг Ўзбекистондаги ваколатхонаси собиқ раҳбари Мунир Мамедзаде «Газета.uz»га берган интервьюсида ижтимоий сектор эҳтимолий фавқулодда чақириқларга ҳозирча тайёр эмаслиги ва нима учун мамлакатга соғлиқни сақлашнинг барча масалаларини қамраб олувчи ягона ахборот тизими кераклигини тушунтирди.
Халқаро таълим институти маълумотларига кўра, 2022−2023 ўқув йилида АҚШ университетларида ўзбекистонлик 1000 дан ортиқ талаба таҳсил олган. Бу олдинги йилга нисбатан 72,6 фоизга кўп.
2024 йилдан Сурхондарёнинг Сариосиё туманидаги аэропортга йўловчи самолётлари қатнай бошлайди, Сариосиё ва Тошкент ўртасида поезд қатнови амалга оширилади, деди Шавкат Мирзиёев. Шунингдек, у Бойсунда очиқ осмон музейини ташкил этиш режасини ҳам маълум қилди.
Президент фармони билан 1 декабрдан иш ҳақи, пенсиялар ва ижтимоий нафақалар миқдори 7 фоизга оширилади. Шунингдек, базавий ҳисоблаш миқдори (БҲМ) 340 минг сўм этиб белгиланмоқда.
18 ноябрь куни Юнусобод, Олмазор, Шайхонтоҳур ва Мирзо Улуғбек туманларининг айрим ҳудудларида иссиқ сув ва иссиқлик таъминоти вақтинча ўчирилади.
Тошкент шаҳри ҳокимлиги Амир Темур хиёбони атрофидаги таъмирлаш ишлари юзасидан маълумот берди. У ерда пиёдалар йўлакларига ётқизилган брусчаткалар ва йўлнинг асфальт қопламаси янгиланмоқда. Ҳокимлик ҳудуд кўриниши кескин ўзгариб кетмаслигига ишонтирди.
Президент Термиздаги Ёшлар саноат ва тадбиркорлик зонасига борди. У Сурхондарё ёшларининг спортга қобилияти зўрлиги, аммо улар шуғулланаётган спорт турлари чекланганини айтиб, бу соҳага 30 млрд сўм ажратилишини билдирди. Ёшлар тадбиркорлигини ривожлантиришга эса 50 млн доллар йўналтирилади.
Сенатнинг Ёшлар, маданият ва спорт масалалари қўмитаси мажлисида Самарқандда вояга етмаганларнинг ҳуқуқбузарлиги ортгани айтилди. Хусусан, ҳуқуқбузарлик 2021 йилда 1331 тани, 2022 йилда 3941 тани ҳамда 2023 йилнинг 8 ойи давомида эса 3128 тани ташкил этган. Жиноятлар сони эса 40 фоизга ортган.
Шавкат Мирзиёев Сурхондарёга ташрифи чоғида Ўзбекистондаги сув муаммоси ҳақида гапирди. У «сув текин эмас», деган ғояни аҳолига чуқур сингдириш ва буни кундалик турмуш қоидасига айлантириш асосий вазифа бўлиши лозимлигини таъкидлади.
Чустдаги давлат боғчасида тарбиячи қизчани кийим алмаштириш чоғида ургани акс этган видео тарқалди. Ҳолатни ўрганган ММТБ воқеа 2022 йилда бўлгани, ўша йили ходим бошқа лавозимга туширилганини билдирди. Ҳозирда тарбиячини ишдан олиш масаласи кўрилмоқда. Боғча таъмир ишлари учун ёпилган.
Дам олиш кунлари Ўзбекистонга нам ва совуқ ҳаво массаси кириб келади. Ҳарорат кечаси +5…+10, кундузи +13…+18 даражагача пасаяди. Шанба куни республика бўйича ёмғир ёғади. Жойларда шамол тезлиги кучайиши мумкин.
Ўзбекистонда ўз миссиясини якунлаган ЮНИСEФ раҳбари Мунир Мамедзаде ижтимоий фаолиятнинг аҳамияти ва нима учун ижтимоий ҳимоя соҳасидан тезкор натижаларни талаб қилиб бўлмаслиги ҳақида гапирди. Шунингдек, у болаларнинг билим олиш қобилияти улар учун мос муҳит яратишга боғлиқлигини таъкидлади.
Миробод туманида Spark ва Nexia ҳайдовчилари йўл талашиб, можаро оммавий муштлашувга айланди. Ҳодиса оқибатида йўловчилардан бири стоматология клиникасига мурожаат қилди. Ҳолат юзасидан безорилик бўйича жиноят иши қўзғатилди.
Сурхондарёда ичимлик суви таъминоти лойиҳасининг биринчи босқичи ишга туширилди. Мазкур босқичда сув Сариосиё, Денов, Шўрчи ва Қумқўрғон туманларига етиб борди. Вилоят аҳолисининг марказлашган ичимлик суви билан таъминланиш даражаси 70 фоизга етди.
Тармоқларда Тошкент халқаро аэропортида унутиб қолдирган юклар 26 минг сўмдан сотилаётгани ҳақида хабар тарқалди. Uzbekistan Airports ёлғон маълумотларга ишонмасликка ва фирибгарларга пул ўтказмасликка чақирди. Компания юклари сотилмаслиги ва учинчи шахсларга берилмаслиги билдирди.
«Док-1 Макс» иши бўйича 13 ноябрда бўлган судда фарзандидан айрилган тўққиз жабрланувчи кўрсатма берди. Улардан бири Фармагентлик собиқ раҳбари Сардор Кариев билан мунозарага киришди. Судда тиббиёт ходимлари ва Соғлиқни сақлаш вазирлигининг масъулиятсизлигига эътибор қаратиш чақириқлари янгради.
Ўзбекистонда 9 ой давомида оналар ўлими кўрсатгичи 100 минг тирик туғилишга нисбатан 14,1 промиллини ташкил этди. Бу кўрсаткич 2022 йилнинг шу даврига нисбатан 13,1 промиллига тенг бўлган. Хусусан, Сирдарё вилоятида кўрсаткич 11,6 промиллидан 45,6 промиллига ошган.
Оққўрғон туманида келин-куёвни олиб кетаётган вертолёт ва еттита Captiva иштирокида тўй кортежи уюштирилди. Тошкент вилояти ЙҲХБ кортеж иштирокчиларига нисбатан маъмурий баённомалар расмийлаштирилганини билдирди.
Маъмурий жавобгарлик тўғрисидаги кодекс ва Лицензиялаш бўйича қонунчиликка ўзгартириш киритилди. Энди санитария ва гигиена қоидаларини бузган фуқаролар 3,3 млн сўмгача, мансабдор шахслар 6,6 млн сўмгача жарима тўлайди. Шунингдек, лицензия шартларини мунтазам бузганлар ундан 1 йилга маҳрум бўлади.
Қўшимча имкониятларга эга булиш учун сайтда рўйхатдан ўтинг