Наманган вилояти Чуст туманидаги 15-сонли давлат мактабгача таълим ташкилотида тарбиячи ёш қизнинг кийимини алмаштириш чоғида унга тарсаки туширгани акс этган видео тарқалди. Ҳолатни ўрганган вилоят Мактабгача ва мактаб таълими бошқармаси айнан шу тарбиячининг болалар жойида ухлагани ва яна бир қатор салбий хатти-ҳаракатлар содир этганини маълум қилди.
Аниқланишича, тарқалган видеодаги ҳолат 2022 йилнинг май ойида содир бўлган. Қолаверса, тарбиячи ўтган йилнинг июнь ойида ҳам бошқа бир болани урган.
«[2022 йил] 17 июнь куни ушбу масала ташкилотнинг кузатув кенгаши аъзолари иштирокида кўриб чиқилган ва тарбиячи лавозимидан озод этилиб, кирчи вазифасига тайинланган… Айни пайтда видеодаги ҳолат юзасидан тўпланган материалларни ҳуқуқ-тартибот органларига ҳавола этиш ва у билан тузилган меҳнат шартномасини бекор қилиш чоралари кўрилмоқда», — дейилади расмий муносабатда.
Zoʻr TV телеканалининг Bu kun информацион дастурида жараён лавҳаси эфирга узатилди.
Унда айтилишича, 15-боғча 70 ўринга мўлжалланган бўлса-да, атрофда бошқа муассаса бўлмагани учун унда 180 нафар бола тарбиялаб келинган.
1964 йилда қурилган бино таъмирталаб аҳволга келиб қолгач, Жаҳон тараққиёт банки маблағлари эвазига қайта қуриш ишлари кетмоқда, шунинг учун боғча фаолияти вақтинча тўхтатилган.
