Сиёсат
Малайзия бош вазири Ўзбекистонга келди (фото)
Жума куни Ўзбекистонга расмий ташриф билан келган Малайзия бош вазири Анвар Иброҳимни аэропортда ҳамкасби Абдулла Арипов кутиб олди. Улар «Янги Ўзбекистон» боғида Мустақиллик монументи пойига гул қўйди. Ҳукумат раҳбари куннинг 2-ярмида «Кўксарой» қароргоҳида олий даражадаги тадбирларда қатнашади.
Ўзбекистоннинг янги элчиси Британия қиролига ишонч ёрлиқларини топширди
2023 йил ноябрь ойида Лондонга янги элчи сифатида етиб борган Равшан Усманов Буюк Британия қиролига ишонч ёрлиқларини топширди.
Қозоғистон президенти «Марказий Осиё давлатларини бўлмоқчи бўлган ташқи кучларга» қаршилик кўрсатишга чақирди
Қозоғистон президенти Марказий Осиё хавфсизлик кенгашлари котиблари билан бўлиб ўтган биринчи учрашувда «минтақа давлатларини бир-бирига қарама-қарши қўйиш ва уларни бўлмоқчи бўлган ташқи кучларга биргаликда қаршилик кўрсатишга» чақирди.
Сенатнинг эллик иккинчи ялпи мажлиси 18 май куни чақирилади
Сенатнинг эллик иккинчи ялпи мажлиси 18 май куни ўтказилади. Унда Солиқ кодексининг 227−1-моддасига ўзгартириш киритиш, давлат мулкини ижарага беришда маъмурий жавобгарликни кучайтириш ва бошқа қонунларга ўзгартиришлар киритиш муҳокама қилинади. Марказий банкининг 2023 йилдаги ҳисоботи эшитилади.
Зиёрат туризми, ислом молияси, «Ҳалол» сертификатлаштириш — Ўзбекистон ва Малайзия ўртасида қўшма баёнот имзоланди
Ўзбекистон президенти ва Малайзия бош вазири ислом молияси, «Ҳалол» сертификатлаштириш, сунъий интеллект, туризм соҳаларида ҳамкорликни кенгайтиришга келишиб олди. Зиёрат туризми бўйича «Умра плюс» дастури йўлга қўйилади. Президент Ўзбекистон-Малайзия саноат зонасини ташкил этишга тайёрлигини айтди.
Иқтисодиёт
Нега турар жой мажмуалари қурувчи ташкилотлар тақдим этган лойиҳага мос келмайди? Архитектор фикри
Янги турар жой сотиб олганлар объектлари қурилишдан олдин тақдим этилган лойиҳаларга мос келмаслигидан доимо шикоят қилади. «CaEX Бизнинг уйлар 2024» кўргазмаси давомида архитекторлар номутаносибликларга нима сабаб бўлиши ва ўзлари қандай муаммоларга дуч келиши ҳақида гапириб ўтди.
БНҚИЗ ноябрь-декабрдан Аи-80 ўрнига Аи-91 ва Аи-92 бензинларини ишлаб чиқаришга ўтишни бошлайди
Бухоро нефтни қайта ишлаш заводи ноябрь-декабрь ойларида Аи-91 ва ундан юқори турдаги бензинни кўпроқ ишлаб чиқаришни бошлайди, 2025 йил бошидан эса Аи-80 ишлаб чиқаришдан бутунлай воз кечиш режалаштирилган, деди «Ўзбекнефтгаз» АЖ раҳбари ўринбосари Одил Темиров.
«Вақт ўтиши билан прогрессив солиқ шкаласи ҳақида ўйлаш мумкин бўлади» — Cолиқ қўмитаси вакили
ДСҚнинг Стратегик режалаштириш бошқармаси бошлиғи Тимур Исмоилов аксар хорижий мамлакатларда солиқ йиғиш бўйича ягона ставка қўлланмаслигини таъкидлади. «Вақт ўтиши билан, тизим бутунлай мустаҳкамлангандан сўнг солиққа тортишнинг прогрессив шкаласига ўтиш ҳақида ўйлаш мумкин», — деди у.
Жамият
«Бу — ҳам болаликдан қизиқиш, ҳам ота касб». 22 ёшли тракторчи қиз билан суҳбат
Сойибободлик 22 яшар Зиёда Жўрабоевани Гулистон туманида кўпчилик танийди. У беш йилдан бери трактор ҳайдайди. «Одам ҳаётга бир марта келади, шу боис ўз қизиқиши билан яшаши керак», — дейди у. «Газета.uz» мухбири Сирдарёга бориб, тракторчи қиз билан суҳбатлашди.
«Қанча эмас, қандай яшаш муҳим». Тўқувчи Феруза Шоджонова ҳикояси
У опаси каби орқа мушак атрофияси ташхиси билан туғилган. Шу касаллик сабаб 12 ёшида опасидан айрилган — шифокорлар унинг ҳам кўп яшамаслигини айтган. Аммо у ҳаётга ташналиги сабаб, тўқиш баҳона, ўз ўрнини топишга муваффақ бўлди. Бу ҳикоя — «Ирода» лойиҳасининг илк қаҳрамони Феруза Шоджонова ҳақида.
«11 метрдан теполмаганнинг ўрнида ўзим бўлсам дедим». Президент U-23 финалини эслади
Шавкат Мирзиёев футбол бўйича Японияга қарши U-23 финалини эслаб, жамоа пенальтидан унумли фойдалана олмай, мағлуб бўлгач, 3 кун ухламай чиққанини айтди. «Унинг ўрнида ўзим бўлсам дедим. Биттагина тўп-а!» деган президент жамоанинг Олимпия ўйинларига йўлланма олганини катта ютуқ деб атади.
Тошкентда ўгай онасининг қийноқлари сабаб уйидан чиқиб кетган болага ёрдам кўрсатилди
Тошкентда ўгай онасининг қийноқ ва зулмлари сабаб уйидан чиқиб кетган вояга етмаган бола ижтимоий ёрдам кўрсатиш марказига жойлаштирилди. Бола қаровсиз қолиши натижасида унинг таълим олиши ва тарбияси издан чиқиб кетган, деб ёзди ИҲМА.
Андижонда 80 сотих ерни 160 минг долларга сотмоқчи бўлган шахс ушланди
Андижон вилояти Олтинкўл туманида 80 сотих нотурар ерни 160 минг долларга, Самарқанд вилояти Пайариқ туманида 2,1 гектар ерни 36 минг долларга сотмоқчи бўлган фуқаролар қўлга олинди. Уларга нисбатан иккита модда бўйича жиноят ишлари қўзғатилди.
Ўзбекистонда «Тирик тарих» туркум фильмлари яратилади
Ўзбекистонда энг қадимги ўтмишдан то яқин тарихгача бўлган даврни ўз ичига олган «Тирик тарих» туркум фильмлари яратилади. «Агар тарихимизни дунёга тараннум этмоқчи бўлсак, халқимизнинг миллий ғурурини кўтармоқчи бўлсак, буни биринчи навбатда кино ёрдамида амалга оширишимиз керак», — деди президент.
Дам олиш кунлари ҳарорат пасайиб, ёмғир ёғади
Ўзбекистонда дам олиш кунлари вақти-вақти билан ёмғир ёғади, айрим жойларда кучли бўлади. Ҳарорат +17…+22 даражагача пасаяди. Жойларда шамол тезлиги кучайиши мумкин.
ДХХ Тошкентда жанговар қуроллар сақлаган шахсларни қўлга олди
Тошкент шаҳрида Россиядан олиб келинган 3 дона Макаров, 1 дона ТТ пистолети ва патронларини сақлаб келган шахслар ушланди. Ҳолат юзасидан жиноят иши очилди.
Ўзбекистонда ELLE халқаро нашри иш бошлайди
Ўзбекистон бозорига ELLE медиа бренди кириб келади. ELLE Oʻzbekiston ходимларни ишга қабул қилишни бошлади.
Жиззахда учта юк машинаси тўқнашди
Шароф Рашидов туманида 2 та Howo ва Sany юк машиналари ўртасида ЙТҲ содир бўлди. Ҳодиса оқибатида жароҳат олганлар йўқ.
Тошкент вилоятида 5 туп чинор кесганлар қамалди
Ўрта Чирчиқ туманида 5 нафар шахс 5 туп чинор дарахтини кесиб, бозорда сотмоқчи бўлгани аниқланди. Суд уларнинг икки нафарига 2 йил, уч нафарига эса 1 йилдан озодликдан маҳрум қилиш жазосини тайинлади.
Июндан айрим поездларнинг қўшимча қатнови йўлга қўйилади
3 июндан Андижон-Термиз ва Тошкент-Андижон, 6 июндан эса Андижон-Қўнғирот йўналишида қўшимча поездлар қатнай бошлайди.
Шавкат Мирзиёев Қосим-Жомарт Тоқаевни туғилган куни билан табриклади
Шавкат Мирзиёев телефон орқали Қозоғистон президенти Қосим-Жомарт Тоқаевни таваллуд куни билан табриклади. Ўзбекистон президенти унга мустаҳкам соғлик, бахт-саодат ва муваффақиятлар, қардош қозоқ халқига тинчлик ва равнақ тилади.
Uzbekistan Airways Ҳаж мавсуми учун 124 та чартер йўловчи парвозини амалга оширади
Uzbekistan Airways «Ҳаж-2024» дастури доирасида 124 та чартер йўловчи парвозини амалга оширади. 15 минг 130 нафар зиёратчи Boeing 767 самолётларида ташилиши, уларга аэропортда рўйхатдан ўтиш вақтида иссиқ нонушта, парвоз давомида эса махсус таомлар тарқатилиши режалаштирилган.
Россияда ота-она қарамоғисиз қолган икки ёшли қизча Ўзбекистонга қайтарилди
Россияда ота-она қарамоғисиз қолган ўзбекистонлик икки ёшли қиз ватанига қайтарилди. У ёрдам сўраб болалар омбудсманига мурожаат қилган бувисининг қарамоғига топширилди.
«Истеъмолчиларнинг ичимлик сувидан 1 трлн сўм қарзи мавжуд» — «Ўзсувтаъминот»
Ўзбекистонда истеъмолчиларнинг ичимлик сувидан қарздорлиги 1 трлн сўмни ташкил этмоқда. Шундан, 740,5 млрд сўми жисмоний, қолгани эса юридик истеъмолчилар ҳиссасига тўғри келмоқда. «Ўзсувтаъминот» вакилига кўра, энг кўп қарздор ҳудудлар Тошкент шаҳри, Андижон ва Тошкент вилоятлари ҳисобланади.
Ўзбекистон фуқаролари 2023 йилда аввалги йилга нисбатан 16,7 фоиз кўпроқ Шенген визаларини олди
Еврокомиссия маълумотларига кўра, 2023 йилда Ўзбекистон фуқаролари Шенген визасини олиш учун 46,5 мингта ариза топширди (+17,7 фоиз), шундан 38,33 минг нафар мурожаатчи ижобий жавоб олди, бу 2022 йилги кўрсаткичдан 16,7 фоизга кўпроқ. Шунингдек, рад этилган аризалар улуши бироз ошган.
Қозоғистонда Россия қонунчилигини бузган Ўзбекистон фуқароларини ҳибсга олиш бошланди
Қозоғистон ҳукумати Россия қонунчилигини бузган ёки жарима тўламаган Ўзбекистон фуқароларини ҳибсга олишни бошлади. Аввалроқ ТИВ Қозоғистон ва Россия маъмурий ва жиноий ишлар бўйича қарорларни ўзаро тан олиш ва ижро этишга келишиб олгани ҳақида огоҳлантирган эди.
Табиий чанг — Тошкент ҳавоси ифлосланишининг асосий сабаби — Экология вазирлиги
Экология вазирлиги Тошкент атмосферасида PM2,5 заррачалари кўпайишининг сабабларини санади. ЖБ ҳамкорлигидаги ўрганишларда ҳаво ифлосланиши асосан табиий чанг (36 фоиз) туфайли юзага келаётгани аниқланган. Бундан ташқари, иссиқлик таъминоти, транспортлар ва саноат корхоналари ҳам ўз улушига эга.
Фарғонада қўрқитиб қўйиш учун ёш болани машина юкхонасига қамаб қўйган шахсга жиноят иши қўзғатилди
Фарғона вилояти Қўқон шаҳрида уйи деразасини тош отиб синдирган қўшни болани қўрқитиб қўйиш учун машинаси юкхонасига солиб ҳаракатланган фуқарога жиноят иши қўзғатилди.
Маданият
Дам олиш кунлари Тошкентда қаерларга бориш мумкин? (18−19 май)
Тўққизта кинопремьера, «Тепло» ярмаркаси, Тоҳир Содиқов, «Юлдузли оқшом» концертлари, ижодий маҳорат дарслари, спектакллар, «Европа куни» фестивали ва дам олиш кунларидаги бошқа қизиқарли тадбирлар — Afisha.uz жамланмасида.
Жаҳон
Украина Россиянинг Харьков вилоятидаги ҳужумини барқарорлаштиришга муваффақ бўлди
Украина қўшинлари Харьков вилоятининг шимолида Россия армиясининг ҳужуми билан боғлиқ вазиятни барқарорлаштирди, деди Украина президенти Владимир Зеленский. Россия президенти Владимир Путин «бугунги кунда» Россиянинг Харьковни олиш режаси йўқлигини маълум қилди.
Бизни ўқиётганингиз учун раҳмат!
