Ўзбекистоннинг янги тайинланган элчиси Равшан Усманов Лондон шаҳрида Буюк Британия ва Шимолий Ирландия Бирлашган Қироллиги қироли Чарльз III`га ишонч ёрлиқларини топширди, деб хабар қилмоқда «Дунё» ахборот агентлиги.
«Буюк Британия ва Ўзбекистон ўртасидаги ўзаро ҳамкорликнинг бугунги динамикаси юқори баҳоланди. Кенг йўналишларда ҳамкорликни янада чуқурлаштириш учун мавжуд салоҳиятдан самарали фойдаланиш зарурлиги таъкидланди», — дейилади хабарда.
Усманов 2023 йилнинг 14 ноябрь куни Буюк Британия пойтахтига етиб борганди.
У 2018 йилдан 2023 йилнинг ноябрига қадар Ўзбекистоннинг Малайзиядаги элчиси бўлиб фаолият олиб борган. 46 ёшли элчи Бирмингем университети (Буюк Британия), Ўзбекистон Ташқи ишлар вазирлиги қошидаги Жаҳон иқтисодиёти ва дипломатия университети ва Тошкент давлат юридик институти (ҳозирда университет) битирувчиси ҳисобланади.
У ташқи сиёсат соҳасида 2000 йилдан иш бошлаган. Дастлаб марказий аппаратда ва Ўзбекистоннинг Испаниядаги элчихонасида турли лавозимларда ишлаган. Кейин у Ташқи ишлар вазирлигининг Европа давлатлари ва НАТО билан ҳамкорлик бўйича дирекциясини бошқарган. Франция, шу билан бирга, ўриндошлик асосида Италия ва Португалияда ҳам элчи бўлган.
