Шавкат Мирзиёев 16 май куни Киночилар саройида ўтган маданият соҳаси вакиллари билан учрашувда футбол бўйича Японияга қарши U-23 финали ҳақида гапириб ўтди. Давлат раҳбари ҳар қайси соҳанининг ичига кириб, мукаммал шуғуллансагина натижа бўлишини айтиб, жамоанинг Олимпия ўйинларига йўл олганини мисол тариқасида келтирди.
Ўйинда 23 ёшгача бўлган ўзбекистонлик спортчилар 1:0 ҳисобида мағлуб бўлиб, иккинчи ўринни эгаллаган ва ўша баҳсда Умарали Раҳмоналиев пенальтидан унумли фойдалана олмаганди.
«11 метрни урмаганидан кейин мен 3 кун ухламай чиқдим, биласизларми? Унинг ўрнида ўзим бўлсам дейман-да. Нимага шундай бўлиши керак?! Биттагина тўп-а! Шундай маҳорат қилди. Уларнинг кўпи билан гаплашдим, телеграмма юбордим. Биз ҳам дарровгина чемпион бўламиз деймиз-да. Биринчи марта жамоамиз Олимпиадага ўрин олди. Бу ҳам катта ютуқларимиз», — дейди президент.
Давлат раҳбари, футбол осон иш эмаслиги, дунёга машҳур 5−6 та жамоада ўзбекистонлик футболчилар ўйнаётгани унда ғурур уйғотишини қўшимча қилди.
Championat.Asia спорт нашри тарихда илк бор футболчилар Олимпиада йўлланмаси учун 30 минг доллар олгани ҳақида хабар берди. Ёшлар терма жамоаси бош мураббийи Тимур Кападзе саволга жавоб берар экан, мураббийлар ҳам пул мукофоти олганини тасдиқлади.
