Korrupsiyaga qarshi kurashish agentligining vakolatlari kengayadi
Korrupsiyaga qarshi kurashish agentligiga yangi vakolatlar berildi. Endilikda agentlik huquqni muhofaza qiluvchi organlarning elektron ma’lumotlar bazalaridan korrupsiyaga oid huquqbuzarliklar to‘g‘risidagi ma’lumotlarni olishi va jinoyat ishini qo‘zg‘atish yoki boshqa choralarni ko‘rish uchun korrupsiya faktlari to‘g‘risidagi xabarlarni yuborish va natijalari bo‘yicha qabul qilingan qaror to‘g‘risida ma’lumotni talab qilishi mumkin.
Prezident Konstitutsiyaga qator o‘zgartishlar kiritishni taklif qildi
Prezident Shavkat Mirziyoyev Konstitutsiya kuni munosabati bilan yo‘llagan tabrigida asosiy qonunga o‘zgartirishlar kiritishni taklif qildi. U inson huquqlarini himoya qilish bo‘yicha amaldagi tizim samarasini oshirish maqsadida Konstitutsiyada bolalar mehnatiga yo‘l qo‘ymaslik, nogironlar, keksa avlod vakillarining huquqlarini ishonchli himoya qilish masalalari ham o‘z aksini topishi kerakligini ta’kidladi.
Konstitutsiya kuni arafasida 182 nafar mahkum afv etildi
Prezident farmoni bilan Konstitutsiya kuni arafasida bilib-bilmay jinoyat sodir etgan, qilmishiga chin dildan pushaymon bo‘lib, tuzalish yo‘liga qat’iy o‘tgan 182 nafar mahkum afv etildi. Ularning 6 nafarini chet el fuqarolari, 6 nafarini 60 yoshdan oshganlar, 9 nafarini ayollar va 25 nafarini taqiqlangan tashkilotlarga aloqador bo‘lganlar tashkil etdi.
Qurolli kuchlarning 30 yilligiga esdalik nishoni ta’sis etildi
Prezident Qurolli kuchlarga 30 yil esdalik nishonini ta’sis etish to‘g‘risidagi farmonni imzoladi.
Dollarning rasmiy kursi ko‘tarildi
Dollarning so‘mga nisbatan rasmiy kursi 12,46 so‘mga ko‘tarilib, 10 782,24 so‘m etib belgilandi. Shuningdek, yevro va rubl kurslari esa pasaydi.
AQSh inson huquqlari buzilayotgani tufayli Pekindagi Olimpiadaga diplomatik boykot e’lon qildi
AQSh hukumati inson huquqlari buzilayotgani sababli 2022 yilda Pekinda bo‘lib o‘tadigan Olimpiadaga diplomatik boykot e’lon qildi. Xitoy bunga javoban Amerika vakillarining Olimpiadada bo‘lmasligi «hech kimni xavotirga solmasligini» ta’kidladi.
Xitoy kompaniyasi Farg‘onada texnopark va quyosh elektr stansiyasi qurishni rejalashtirmoqda
Xitoy kompaniyasi Farg‘ona viloyatida 25 gektar maydonda innovatsion texnopark hamda 350 mln dollar investitsiya hisobiga 500 gektar yerda quyosh fotoelektr stansiyasi barpo etishni rejalashtirmoqda. Stansiyada ishlab chiqarilgan elektr energiyasi texnoparkda joylashtiriladigan xorijiy korxonalarni ta’minlashga yo‘naltiriladi.
Qoraqalpog‘iston hududida yangi qush turi — cho‘l buqasi aniqlandi
Qoraqalpog‘istonda Respublikasida shamol elektr stansiyasini qurish bo‘yicha investitsiya loyihasi doirasida bahorgi monitoring chog‘ida yangi qush turi — cho‘l buqasi topildi. Ushbu qush Energetika vazirligi loyihalarining atrof-muhitga ta’sirini o‘rganish jarayonida aniqlangan.
Yil boshidan beri shaharlararo avtobuslarda yo‘lkira narxi 9,4 foizga oshdi
Davlat statistika qo‘mitasi ma’lumotlariga ko‘ra, noyabr oyida shaharlararo avtobusda yo‘lkira narxlari oktabr oyiga nisbatan o‘rtacha 0,4 foizga oshdi. Yil boshidan beri bu ko‘rsatkich 9,4 foizga qimmatlashgan.
Boysun tumani hokimligi 398 mln so‘mga Trailblazer xarid qildi
Surxondaryo viloyati Boysun tumani hokimi farmoyishi bilan texnik nosoz Captiva-2 xizmat avtomobili bepul tarzda tuman prokuraturasiga o‘tkazildi. Shundan so‘ng, hokimlik 398 mln so‘mlik Trailblazer mashinasini xarid qilish uchun shartnoma tuzgan. Biroq, hukumat qarori bilan tuman hokimlariga 270 mln so‘mgacha bo‘lgan xizmat avtomobilini xarid qilishga ruxsat etilgan.
AQSh senatorlari Davlat departamenti va prezidentni O‘zbekistonga bosim o‘tkazishga chaqirdi
AQSh senatorlar guruhi Oq uy va Davlat departamentini inson huquqlari bilan bog‘liq vaziyat sababli O‘zbekistonga bosim o‘tkazishga chaqirdi. Ularning fikricha, O‘zbekistondagi islohotlar sustlashgan, mamlakatda erkin so‘z huquqi cheklanmoqda. OAV faoliyatida ham muammolar kuzatilmoqda.
Zangiota 1-son shifoxonasida 11 oyda 422 nafar chaqaloq dunyoga kelgan
Zangiota 1-son yuqumli kasalliklar shifoxonasi direktori o‘rinbosari Hilola Alimova yil davomida markazda 422 nafar chaqaloq dunyoga kelganini ma’lum qildi. Hozirgi kunda yana 64 nafar homilador ayol davolanmoqda, ularning 3 nafari reanimatsiya bo‘limida. Qolaversa, shifoxonada 7 nafar chaqaloq va 18 yoshgacha bo‘lgan 97 nafar bola davo muolajalarini olmoqda.
Tarbirkorga $400 ming kredit olib berishni va’da qilgan SSP xodimiga jinoyat ishi ochildi
Savdo-sanoat palatasining Buxoro viloyati hududiy boshqarmasi xodimi tarbirkorga 400 ming dollar kredit olib berishni va’da qilib, buning evaziga 3 ming dollarni qo‘lga kiritgani aytilmoqda. Unga nisbatan jinoyat ishi qo‘zg‘atildi.
«Afg‘onistondagi vaziyatda quruq so‘zdan amaliy ishlarga o‘tish vaqti keldi» — Abdulaziz Kamilov
Afg‘onistondagi vaziyatning beqarorlashishiga olib kelishi mumkin bo‘lgan gumanitar falokatning oldini olish uchun afg‘on xalqiga aniq yordam ko‘rsatish nihoyatda muhim hisoblanadi, deya ta’kidladi O‘zbekiston tashqi ishlar vaziri Abdulaziz Kamilov.
Bank kartalaridan pul yechib olinish sabablari o‘rganilmoqda
Dekabr boshida ayrim bank kartalari egalari mablag‘lari ular ruxsatisiz yechib olinayotganidan shikoyat qildilar. Iste’molchilar huquqlarini himoya qilish agentligi qaysi normativ-huquqiy hujjatlarga asoslanib mijozlarni xabardor qilmasdan va ular bilan kelishmasdan pullar yechib olinayotganini aniqlashtirmoqda.
«Qo‘yliq» bozori yo‘l o‘tkazgichi kengaytirilishi tufayli boshqa joyga ko‘chiriladi
Toshkent shahridagi «Qo‘yliq» dehqon bozori va unga tutash ulgurji savdo maydonlarini boshqa joyga ko‘chirish rejalashtirilmoqda. Bu mazkur hududdagi avtomobil yo‘lining kengaytirilishi bilan bog‘liq. Foto.
Denovdagi portlashda 2 kishi halok bo‘ldi
Surxondaryo viloyatidagi «Indenim» savdo majmuasida sodir bo‘lgan portlash oqibatida halok bo‘lganlar soni 2 kishiga yetdi. FVV xodimlari ularning jasadini vayronalar ostidan chiqarib olgan.
Tuman sababli O‘zbekiston aeroportlarida reyslar kechiktirildi
7 dekabr kuni tongda Urganch va Andijon aeroportlarida yomon ob-havo natijasida samolyotlar uchish va qo‘nishni amalga oshira olmadi. «Aeroflot» aviakompaniyasining Moskvadan uchgan reysi Nukusdagi zaxira aerodromga qo‘nishga majbur bo‘ldi.
Uy-joyga muhtoj xotin-qizlarga ipoteka kreditining boshlang‘ich badali to‘lab beriladi
Hukumat qarori bilan uy-joyga muhtoj xotin-qizlarni uy bilan ta’minlash tartibi belgilandi. Unga ko‘ra, muhtoj xotin-qizlarga ipoteka kreditining 15 foizi miqdorida boshlang‘ich badali to‘lab beriladi. Shuningdek, ular vaqtincha ijtimoiy uylarga ijaraga qo‘yilishi ham mumkin. Imkoniyati cheklangan shaxslarga esa birinchi qavatdagi uylar ijaraga beriladi.
Denovdagi portlash oqibatida 9 kishi jarohatlanib, ikki kishi halok bo‘ldi (yangilandi)
Erta tongda Surxondaryodagi «Indenim» savdo majmuasida chaqnash sodir bo‘ldi. Hodisa vaqtida bino ichida bo‘lgan 9 kishi jarohat olgan, yana ikki kishi vafot etgan. Voqea joyida bosh vazirning birinchi o‘rinbosari Ochilboy Ramatov boshchiligidagi Hukumat komissiyasi ish olib bormoqda.
Qo‘shimcha imkoniyatlarga ega bulish uchun saytda ro‘yxatdan o‘ting