АҚШ президенти Жо Байден АҚШ билан Мексика чегарасини ноқонуний кесиб ўтган муҳожирларга бошпана беришни тақиқловчи фармонни имзолади. Ушбу чора-тадбирлар Қўшма Штатларда қолиш учун қонуний асосга эга бўлмаганларни чиқариб юборишни осонлаштиради, дея баёнот берди Оқ уй матбуот хизмати.
Байден маъмуриятининг аниқлик киритишича, чекловлар жанубий чегара «ҳаддан ташқари босимда» қолмагунча ўз кучида қолади. Чекловлар чегарани кесиб ўтган муҳожирлар сони «АҚШ тизими иммиграция операцияларини хавфсиз ва самарали бошқариши учун етарли даражада камайганда» олиб ташланади.
Reuters хабарига кўра, чекловлар дарҳол кучга кирди. Фармонда кузатувсиз қолган мигрант болалар, соғлиғи ёки хавфсизлигига жиддий таҳдид остида бўлган шахслар, одам савдоси қурбонлари учун истиснолар назарда тутилган.
Агентликнинг номи ошкор этилмаган АҚШ расмийларига таяниб аниқлик киритишича, тақиқ бир ҳафта давомида чегарада ўртача қўлга олишлар сони кунига 2500 кишидан ошганда жорий қилинади ва кунлик қўлга олишлар сони уч ҳафтага 1500 дан камайганида тўхтатилади. Reuters агентлигига кўра, охирги марта чегарани кесиб ўтишлар коронавирус пандемиясининг дастлабки ойларида бу даражага тушган.
- 2023 йилнинг ноябрида АҚШ расмийлари Мексика чегараси орқали АҚШга ноқонуний кириб келаётган Ўзбекистон фуқаролари мамлакатга киритилмаслигини ва уларнинг иммиграция иши ҳал этилгунга қадар ҳибсда сақланишини маълум қилганди.
- Fox News 2021 йилнинг октябридан 2023 йилнинг октябригача АҚШда чегарани ноқонуний кесиб ўтишга уринган 13 мингдан ортиқ Ўзбекистон фуқароси қўлга олинганини ёзган.
