Японияда расмийлар Toyota, Suzuki, Mazda, Honda ва Yamaha автомобилларини сертификатлаш учун зарур бўлган маълумотлар сохталаштирилганини аниқлагач, йирик автомобиль ишлаб чиқарувчилари иштирокида можаро авж олди, деб ёзди Reuters.
Япония Транспорт вазирлиги Toyota, Мазда ва Yamaha`га маълум автомобиль моделларини етказиб беришни тўхтатишни буюрди. Агентлик Toyota штаб-квартирасида текширув ўтказди, қолган тўртта автоконцернда ҳам текширув ўтказишни режалаштирмоқда.
Toyota корхонасида ўтказилган тергов шуни кўрсатдики, қоидабузарликлар 2014, 2015 ва 2020 йиллардаги олтита турли синовлар давомида содир бўлган. Гап учта модель: Corolla Fielder, Corolla Axio ва Yaris Cross, шунингдек, аввалроқ ишлаб чиқарилиши тўхтатилган яна тўртта модель ҳақида кетмоқда. Хусусан, битта ҳолатда компания машина ҳалокатга учрагани ортидан келган зарарни ҳисоблашда капотнинг икки томонини эмас, фақат бир томонини ўлчаган.
Корпорация ўз мижозлари ва акциядорларидан узр сўради. Автомобиль ишлаб чиқарувчиси бу хавфсизлик қоидаларини бузмагани ва эгалари ўз автомобилларидан фойдаланишни тўхтатишлари шарт эмаслигига ишонтирди.
Mazda ўтган ҳафтада ишчилар иккита моделда двигателни бошқариш дастурининг синов натижаларини ўзгартирганини аниқлаганидан бери Roadster RF спорткари ва Mazda2 ҳэтчбекларини етказиб беришни тўхтатди. Компания, шунингдек, ҳозирда ишлаб чиқариш тўхтатилган Atenza ва Axela моделлари учун сохта краш-тест маълумотларини аниқлади.
Умуман олганда, Транспорт вазирлиги ҳисоботида 38 та модель ҳақида сўз боради, улардан 6 таси ҳозирда бозорга чиқарилмоқда, деб таъкидлайди The Japan Times.
Компанияларга нисбатан тергов ҳаракатлари давом этмоқда. Эҳтимолий қоидабузарликларнинг жиддийлиги номаълумлигича қолмоқда, аммо бу, катта эҳтимол, транспорт воситаларининг функционаллиги ва хавфсизлигига таъсир қилмайди, дея таъкидлайди нашр.
