Bo‘stonliq tumani hokimining sobiq o‘rinbosari o‘z lavozimida ishlagan vaqtida tuman hududidan tadbirkorga 30 sotix yer maydoni ajratilishi uchun hokim qarorini chiqartirib berib, evaziga undan 35 ming dollar olgan. U olingan pulning bir qismini qaytarib berayotganida qo‘lga olindi. Bundan tashqari, Toshkent viloyatidagi yerlarni noqonuniy ravishda sotmoqchi bo‘lgan boshqa shaxslar ham ushlandi. Ulardan biri Parkent tumanida 5 gektar yerni 1 mln dollarga sotmoqchi bo‘lgan.
Transparency International xalqaro tashkilotining 2020 yil uchun Korrupsiyani qabul qilish indeksida O‘zbekiston 146-o‘rinni egalladi. Bu 2019 yil ko‘rsatkichiga qaraganda 7 pog‘onaga yuqori. COVID-19 pandemiyasi korrupsiya avj olgan va avtoritar rahbarlar uchun davlat xarajatlari ustidan nazoratni yengillashtirish va fuqarolar erkinliklarini cheklash uchun bahona bo‘ldi, deyiladi hisobotda.
Shavkat Mirziyoyev bosh prokuror Nig‘matilla Yo‘ldoshevga tumanlar bo‘ylab korrupsiya sabablarini o‘rganishni buyurdi. «Suvga, svetga shuncha qarz olindi. Hamma joyda o‘g‘irlik. Maktab, kollejlar qurilishida ham. Hamma joyda korrupsiya», — ta’kidladi davlat rahbari.
Andijon tumanidagi sanoat hududida 30 sotix yerni tadbirkorga 15 ming dollar evaziga olib berishni va’da qilgan sobiq kadastr xodimi qo‘lga olindi. Andijon shahar sudi tomonidan unga 2 yil 2 oylik axloq tuzatish jazosi tayinlangan.
Samarqand viloyati tibbiyot muassalarida 7 mlrd so‘mlik talon-torojlik va suiste’molchiliklar aniqlandi. Bundan tashqari dori vositalariga 5,643 mlrd so‘mga qimmat narxlarda davlat xaridlari amalga oshirgan. Aniqlangan holatlar asosida jinoyat ishi qo‘zg‘atilgan.
«Gazeta.uz» nashri Korrupsiyaga qarshi kurashish agentligining tanlovi doirasida «Korrupsiyaga qarshi targ‘ibotda eng faol ommaviy axborot vositalari» nominatsiyasida g‘olib bo‘ldi.
Toshkent shahar ma’muriy sudi sudyalari va xodimlari shahar YHXB xodimlari bilan 5 mingga yaqin soxta qaror chiqarib, 8 mlrd so‘m pul mablag‘larni talon-toroj qilishgan. Ularga nisbatan jinoiy ish qo‘zg‘atildi.
O‘zbekiston Jinoyat kodeksiga mansabdor shaxs tomonidan noqonuniy boylik orttirganlik uchun jinoiy javobgarlikni belgilash taklif qilindi. Shuningdek, davlat xizmatchilari eng ko‘p korrupsiyaga qo‘l uradigan sohalar ro‘yxati shakllantiriladi.
So‘nggi 9 oy ichida korrupsiya holatlari yuzasidan 838 ta jinoiy ishlari qo‘zg‘atilgan bo‘lib, ular bo‘yicha 647 nafar mansabdor shaxs jinoiy javobgarlikka tortilgan. Jinoiy javobgarlikka tortilganlarning 4 nafari respublika miqyosidagi, 15 nafari viloyat miqyosidagi, 626 nafari esa shahar-tuman miqyosidagi mansabdor shaxslarni tashkil qiladi. Ushbu korrupsion jinoyatlar oqibatida 200 mlrd so‘mdan ortiq moddiy zarar yetkazilgan.
«Biror vazirlik yoki hokimiyat davlat moliyaviy nazoratidan ustun bo‘masligi kerak, ungacha foydasi yo‘q», — dedi moliya vaziri Timur Ishmetov. Ma’lum bo‘lishicha so‘nggi ikki yilda 2477 nafar shaxs 371 mlrd so‘m byudjet mablag‘larini talon-toroj qilgan. Hozirda ular qonun oldida javob bermoqda.
Bosh prokuror «Ark Buloq» bojxona postining sobiq rahbari hibsga olinganini e’lon qildi. Ma’lum qilinishicha, mansabdorning uyida tintuv o‘tkazilganda, 311 ming dollar naqd pul topilgan. Jinoiy faoliyatdan olingan daromadlardan foydalanib, u «Tashkent City» da ikkita uy va noturar joy, Captiva sotib olib, uy qurgan.
Xalq banki va Mikrokreditbank boshqaruvining sobiq raisi bir qator korrupsiya jinoyatlarida, shu jumladan AQSHda yashirinayotgan shaxs bilan til biriktirishda ayblanmoqda. Bosh prokuror Nig‘matilla Yo‘ldoshevning so‘zlariga ko‘ra, ikki yil ichida turli banklarning 166 mansabdor shaxslari javobgarlikka tortilgan.
Shavkat Mirziyoyev orqada qolayotgan korxonalar faoliyatini tanqid qildi va yaratilgan imkoniyatlardan foydalanmayotgan tarmoqlar va hududlar rahbarlari ishdan bo‘shatilishi va sudga tortilishi haqida ogohlantirdi. Uning so‘zlariga ko‘ra, «Korrupsiya bilan oldingi tizim ko‘plarga ma’qul. Bo‘lmaydi boshqa». Prezident, shuningdek, davlat korxonalari bilan O‘zbekiston o‘z maqsadlariga erisha olmaydi, deb hisoblaydi.
Prezident boshchiligidagi selektorda korrupsiyada ayblanib qo‘lga olingan mansabdorlar haqida ma’lumot berildi. Jumladan, Qibray tumani hokimi o‘rinbosari 35 ming, Toshkent hokimligi qoshidagi boshqarma boshlig‘i 1,4 mln, Marhamat tumani hokimi yordamchisi 29 ming, Buvayda hokimi o‘rinbosari 20 ming dollar olayotganda ushlangan.
Toshkentda tuman kengashi saylovida yordam berish uchun nomzoddan 3000 dollar so‘ragan deputat qo‘lga olindi. Mamlakatdagi boshqa korrupsiya holatlari haqida ham xabar qilindi.
Adliya vaziri Ruslanbek Davletov mamlakatda yuridik shaxslarning jinoiy javobgarligi institutini joriy etish bo‘yicha rejalar haqida ma’lum qildi. Vazir AQSH va Niderlandiya hukumatlariga katta miqdorda jarimalar to‘lagan O‘zbekistondagi mobil operatorlar bilan bog‘liq korrupsion mojarolarni misol qilib keltirdi.
Hisob palatasi 2,5 yil davomida maktabgacha ta’lim tizimida 48,3 mlrd so‘mlik moliyaviy xato va kamchiliklarga yo‘l qo‘yilganini aniqladi. Ularning 7,2 mlrd so‘m quyi bo‘g‘inlarda mansabdorlar tomonidan talon-toroj qilingan. Bolalar uchun 2,2 mlrd so‘mga yaroqsiz «saryog‘», 10,1 mlrd so‘mga shubhali go‘sht sotib olingan.
Bosh prokuratura korrupsiya haqida xabar qilganlarga bir martalik pul mukofoti berilishini ko‘zda tutuvchi qaror loyihasini jamoatchilik muhokamasiga qo‘ydi. Unga ko‘ra, pul mukofoti miqdori pora, yetkazilgan zarar miqdori yoki o‘g‘irlangan mulk qiymatiga bog‘liq holda — bazaviy hisoblashning 3 baravaridan summaning 10−15 foizigacha beriladi.
Andijon viloyatida institutga kiritish evaziga 2 ming dollar olgan kafedra dotsenti firibgarlik ustida ushlandi.
Senat rahbari Tanzila Norboyeva oliy ta’lim tizimidagi korrupsiya tufayli O‘zbekistonning birorta ham oliygohi dunyoning eng yaxshi universitetlari reytingiga kira olmaganini ma’lum qildi.
Qo‘shimcha imkoniyatlarga ega bulish uchun saytda ro‘yxatdan o‘ting