ЕТТБ коронавирус пандемиясининг Ўзбекистондаги ижтимоий-иқтисодий жараёнларга таъсирини юмшатишга 220 млн доллар ажратади. Вилоятлардаги коммунал корхоналар айланма маблағларини кўпайтириш учун яна 100 млн доллар ажратиш масаласи кўриб чиқилмоқда.
Forbes журнали дунё бўйлаб 2020 йилнинг энг бой инсонларини эълон қилди. Amazon асосчиси Жефф Безос кетма-кет учинчи йил энг юқори ўринни эгаллади. Безос бир йил ичида 18 млрд доллар йўқотган.
Хитойда бир кун давомида коронавирус туфайли бирорта ҳам ўлим қайд этилмади. Барча COVID-19 ҳолатлари чет элдан келган фуқароларда аниқланди.
Жаҳон банки Ўзбекистонга соғлиқни сақлаш тизими, ижтимоий ҳимоя институтлари ва муассасаларини ҳамда бюджет кўмагини молиялаштириш учун 1,2 млрд доллар миқдорида маблағларни оператив тарзда ажратиш масаласи фаол кўриб чиқилаётганини билдирди.
Коронавирус инфекцияси аниқланган Буюк Британия бош вазири Борис Жонсон саломатлиги оғирлашганлиги боис интенсив терапия бўлимига ўтказилди.
Европа комиссияси раҳбари Урсула фон дер Лейен коронавирус инқирози шароитида Европа Иттифоқига аъзо давлатларни иттифоқ бюджетига «Маршал режаси» каби миллиардлаб евро инвестиция жалб қилишга чақирди.
Японияда коронавирус туфайли фавқулодда ҳолат жорий этилиши кутилмоқда. Ҳукумат коронавирус инфекциясини тўхтатиш учун 1 трлн долларлик рағбатлантириш дастурини қабул қилишни режалаштирмоқда.
БМТ бош котиби Антонио Гутерриш кўплаб аёллар коронавирус эпидемияси туфайли уйда зўравонликка дуч келаётганини маълум қилди. Баъзи давлатларда зўравонликка қарши ёрдам хизматига мурожаат қилган аёллар сони икки баравар кўпайган.
Хитойда карантин тугаганидан кейин ажрашиш бўйича мурожаатлар сони кескин ошган. Баъзи провинцияларда уйдаги зўравонлик ҳолатларининг кўпайгани айтилмоқда.
Буюк Британия бош вазири Борис Жонсон 5 апрель куни коронавирус инфекциясининг аломатлари йўқолмаганлиги учун касалхонага ётқизилди. Унинг шифокори бу ҳолатни «эҳтиёт чораси» деб атамоқда.
Zoom платформасида сақланган минглаб видеолар Youtube ва Vimeo платформаларига чиқиб кетди. Улар орасида фойдаланувчиларнинг шахсий рақамлари ва маълумотлари, компанияларнинг молиявий ҳисоботлари эълон қилинган видеолар ҳам бор. Компания охирги ойда кунига 200 млн киши платформадан фойдаланаётганлигини маълум қилган эди.
НАТОга аъзо давлатлар Шимолий Македонияни ҳарбий иттифоқнинг ўттизинчи аъзоси сифатида қутлаб олишди. Мамлакат ўз номини ўзгартиргандан кейин бу имкониятга эга бўлди.
Жаҳон банки Афғонистонга COVID-19 коронавирус инфекциясига қарши кураш учун 100,4 миллион долларлик грантни маъқуллади. Бундан ташқари, Тожикистон ва Қирғизистонга мос равишда 11,3 ва 12,15 миллион доллар ажратилади.
Ўзбекистон Афғонистон раҳбариятининг инклюзив музокара жамоасини шакллантириш тўғрисидаги келишувини олқишлади. Аввалроқ президент Ашраф Ғани ва унинг сиёсий рақиби Абдуллоҳ Абдуллоҳ ўртасидаги келишмовчиликлар сабабли Толибон билан ўзаро келишув ва маҳбус алмашуви бўйича музокаралар қолдирилган эди.
Қирғизистонда коронавирусга қарши кураш бўйича чора-тадбирлар қониқарсиз ташкиллаштирилганлиги учун бош вазирнинг ўринбосари Олтиной Омурбекова ва Соғлиқни сақлаш вазири Космосбек Чолпонбаев ўз лавозимларидан озод этилди.
Евросиё иқтисодий иттифоқи пандемия сабабли гречка, гуруч, жавдар, кунгабоқар уруғи ва бошқа маҳсулотлар экспортини тақиқлади.
GM, Ford, Tesla ва бир қатор йирик АҚШ компаниялари COVID-19 коронавирус инфекциясига чалинган беморлар учун сунъий нафас ускуналари ишлаб чиқаришни режалаштирмоқда.
Гонконг университети олимлари COVID-19 коронавируси қайси даражада фаол бўлиши ва неча даражада ўз кучини йўқотишини аниқлади. Бундан ташқари, вируснинг пластик ва пўлат юзаларда қанча муддат сақланиши маълум бўлди.
Дональд Трамп Америка тарихида энг йирик миқдордаги иқтисодий рағбатлантириш қонунига қўл қўйди. Қонун коронавируснинг мамлакат иқтисодиётига салбий таъсирини юмшатишга қаратилган. Унга кўра, паст ва ўрта даромадга эга фуқаролар бир маротабалик тўлов тарзида 1200 доллар олишади. Ҳар бир ёш бола учун қўшимча 500 доллар берилиши белгиланган.
Хитой ҳудудида коронавирус тарқалиши тўхтади. Касалланганлар ва даволанаётганлар сони — 3000 нафардан камроқ.
Қўшимча имкониятларга эга булиш учун сайтда рўйхатдан ўтинг