Президент «замонга муносиб фикрлаш, қарор қабул қилишда тезкорлик етишмаётгани» сабаб ҳукуматнинг иқтисодий комплексдаги ўринбосарлар сонини 15 фоизга (ҳозир улар 40 нафар) қисқартириш тўғрисида топшириқ берди.
Шавкат Мирзиёев раислигидаги йиғилишда 2023 йилда иқтисодий ўсиш 6 фоизни ташкил қилгани маълум қилинди.
Инвестициялар, саноат ва савдо бўйича ҳукумат комиссиясига 2027 йилгача Ўзбекистон электротехника саноати корхоналарини қўшимча қўллаб-қувватлаш чораларини кўриш ва уларни амалга ошириш учун бюджетдан маблағ олиш ҳуқуқи берилади.
Ўзбекистонда баҳоргача тадбиркорларнинг барқарорлик рейтинги йўлга қўйилиши кўзда тутилмоқда. У электрон шаклда бўлади ва юқори рейтингга эга тадбиркорларга қатор имтиёз ҳамда преференциялардан фойдаланиш имконини беради.
ЎзПФЛ директори Диёр Имомхўжаев «Пахтакор» ва «Сурхон» футбол клублари хусусийлаштириш арафасида эканини айтди. «„Сурхон“ аслида бир йил олдин хусусийлаштирилиши керак эди, лекин клубда бундан аввал ишлаган одамларнинг баъзи хатолари бор, прокуратура буни ўрганмоқда», — деди у.
Оҳангарондаги технопарк негизида Eltech Industrial технопарки ташкил этилмоқда. Мақсад — «янги турдаги электротехника маҳсулотлари ва уларнинг бутловчи қисмларини ўзлаштириш». Шунингдек, Сурхондарёда 2 гектар қишлоқ хўжалиги ер майдони ошхона ҳаво тортиш қурилмалари ишлаб чиқариш учун ажратилади.
Ўзбекистон ҳукумати хорижий товарларнинг (ҳозирда 520 дан ортиқ товарга тақиқ қўйилган) давлат харидларида иштирок этишига чекловларни кучайтиришни ва маҳаллий компанияларга, жумладан, электротехника ишлаб чиқарувчиларга кўпроқ имтиёзлар беришни режалаштирмоқда.
Испаниядаги Santander банкининг минтақавий менежери Давид Плаза Ўзбекистон банк хизматлари бозорига киришга қизиқиш билдирди. Шунингдек, банк Ўзбекистонга 500 млн доллар миқдорида кредит маблағларини ажратишга тайёрлигини маълум қилди.
1 февралдан Ўзбекистонга музлаткич, радиатор, чангюткич, кир ювиш машинаси, телевизор ва бошқа жиҳозларни олиб киришда ишлаб чиқарувчининг ваколатли вакиллари ёки расмий дилерлари бўлиши талаб қилинади. Улар, шунингдек, хизмат кўрсатишлари ҳам керак бўлади.
Тадбиркорлар томонидан саккиз турдаги ўзаро такрорланувчи ҳисобот ва статистик маълумотларни тақдим этиш талаби бекор қилинди. Тадбиркорлик субъектлари томонидан давлат органларига тақдим этиладиган ҳисоботлар ва статистик маълумотларнинг ягона рўйхати тасдиқланди.
2023 йил якунларига кўра, Қозоғистондан Ўзбекистонга кўмир импорти 1,4 млн тоннага ошиб, 3,1 млн тоннага (+82,3 фоиз) етган. Қирғизистон кўмири эса 10 ойда икки баробар кўпайган — деярли 900 минг тоннагача. Январь-ноябрь ойларидаги етказиб бериш ҳажми қиймат жиҳатдан 189,2 млн долларга баҳоланмоқда.
Президент фармони билан 2024 йил 1 мартдан бошлаб 22 турдаги лицензия ва рухсат этиш хусусиятига эга ҳужжатлар бекор қилинади. 7 та турдаги рухсатномалар тўлиқ бекор қилинади, яна 12 таси бирлаштириш йўли билан бекор қилинади, 3 таси эса хабар бериш тартиби билан алмаштирилади. Тўлиқ рўйхат.
Ўзбекистонда «Бизнесга лицензиясиз кириш» махсус режими бўйича ҳуқуқий эксперимент ўтказилади. Бу йил охиригача рентген ускуналаридан фойдаланиш ва ветеринария лаборатория-диагностика ишларини амалга ошириш билан боғлиқ фаолиятга тааллуқли бўлади.
Ўзбекистонда Қозоғистоннинг Евросиё банки шуъба корхонаси рўйхатга олинди. Банк Ибрагимовлар оиласи, тадбиркорлар Александр Машкевич ва Фаттоҳ Шодиевлар бошчилигидаги «Евросиё молия компанияси» гуруҳи таркибига киради.
Ўзбекистонда электротехника маҳсулотлари ишлаб чиқарувчиларга бериладиган имтиёзлар 2027 йилгача узайтирилиши мумкин. Уларга экспортда валюта курсини хедж қилиш хизматларидан фойдаланиш харажатларини қоплаб бериш ва хом ашёни импорт қилишда транспорт харажатларини компенсациялаш режа қилинмоқда.
Ўзбекистон ҳукумати 2021−2022 йилларда қўшни мамлакатдан импорт қилинган «шубҳали» электротехника маҳсулотларининг CT-1 сертификатларини қайта текширади.
Ўзбекистон ҳукумати маиший техника импортига антидемпинг божи жорий этишни режалаштирмоқда. Унинг ҳажми тахминан 10 фоиз бўлиши кутилмоқда. Электротехника соҳасида фаолият юритувчи йирик корхоналар ва экспортчиларни «ваколатли иқтисодий операторлар» рўйхатига киритиш таклиф этилмоқда.
Ҳукумат қарори билан Ўзбекистонда қайта тикланувчи энергия манбалари ва уларнинг асбоб-ускуналари, хомашё, бутловчи ва эҳтиёт қисмларини импорт қилишда божхона тўловларини 120 кун муддатга фоизлар ундирилмаган ҳолда кечиктириб тўлашга рухсат берилиши белгиланди.
Давлат солиқ қўмитасининг маълум қилишича, кешбэк лимити харидларни амалга оширувчи фуқароларнинг 98 фоизига таъсир қилмайди. Қўмита чекловлар баъзи одамлар бошқа одамларнинг чекларини ва бу орқали кешбэкларини ўзлаштираётгани сабаб жорий этилганини тасдиқлади.
«Капитал суғурта» қонунчиликда белгиланган меъёрларга риоя қилинмагани сабаб 162 млн сўм миқдорида жаримага тортилди. Шунингдек, суғурта фаолиятини амалга ошириш бўйича берилган лицензияси 11 январь санасидан бошлаб 10 кун муддатга тўхтатилди.
Қўшимча имкониятларга эга булиш учун сайтда рўйхатдан ўтинг