Апрель ойида Ўзбекистонда автомобиллар сотувининг пасайиш суръати тезлашди, деб хабар бермоқда Иқтисодий тадқиқотлар ва ислоҳотлар маркази.
ИТИМ маълумотларига кўра, автомобиль бозорида февраль ойида бошланган сотувлардаги пасайиш суръатининг тезлашиш тенденцияси кузатилган. Ўтган ойда республикада автотранспорт воситаларининг умумий савдоси (шу жумладан, енгил автомобиллар) 19 фоизга — 88,3 мингтагача камайган.
Апрель ойида 78,5 мингта енгил автомобиль сотилган, бу аввалги ойга нисбатан 18,6 фоизга кам. Йиллик ҳисобда сотувлар 35,3 фоизга қисқарган (2023 йил апрелида кўрсаткич 120 мингтадан ортиқ автомобилни ташкил қилганди).
Савдо ҳажмининг пасайиши барча ҳудудларда кузатилмоқда, энг катта пасайиш Наманган, Фарғона ва Сурхондарё вилоятларида қайд этилган бўлиб, уларда савдо ҳажми 30 фоиздан кўпроқ камайган.
ИТИМ маълумотларига кўра, пасайиш сабаблари автокредитларнинг қисқариши ва уларни бериш қоидаларининг мураккаблашиши билан боғлиқ бўлиши мумкин. Март ойида Ўзбекистон банклари томонидан 1,25 триллион сўмлик автокредитлар берилган, Марказий банкнинг очиқ маълумотларига кўра, бу сўнгги икки йилдаги минимал кўрсаткичдир.
Бирламчи енгил автомобиль бозорида ҳам пасайиш динамикаси қайд этилди. Шу билан бирга, пасайиш апрель ойида секинлашди — ўтган ойда сотувлар март ойидаги 17 фоизга нисбатан 10 фоизга пасайиш билан деярли 20 минг автомобилни ташкил этди. Йил давомида бирламчи бозор деярли 22 фоизга камайди.
Маҳаллий янги автомобиллар сотуви учинчи ой кетма-кет пасайди. Апрель ойида 17,7 мингта енгил автомобиль сотилган, бу март ойига нисбатан 9 фоизга кам, ўтган йилнинг шу даврига нисбатан эса 21 фоиздан кўпроққа камайди.
Хорижий енгил автомобиллар бозори ҳам 15,3 фоизга қисқарди — тахминан 2000 та хорижий автомобиль сотилди. Савдо ҳажми ўтган йилнинг апрель ойига нисбатан 24 фоизга камайди.
Минилган автомобиллар сотуви 21,2 фоизга — деярли 59 мингтагача камайган, йил давомида эса пасайиш 39 фоизни ташкил этган. Иккиламчи бозорда сотувлар 2022 йил бошидан бери энг паст даражага етди.
Электромобиллар бозорида апрель ойида юқори савдо кўрсаткичлари қайд этилди. Апрель ойида 2900 га яқин енгил электромобиллар сотилган, бу март ойига нисбатан 23,2 фоизга кўп дегани. Энг кўп сотувлар пойтахтда қайд этилган — деярли 2000 та автомобиль.
Йиллик ҳисобда республикада электромобиллар савдоси 2 баробарга ошган.
