Марказий банк асосий ставкани 3 фоиз бандга ошириб, йиллик 17 фоизгача кўтариш тўғрисида қарор қабул қилди. Регулятор 2020 йилдан бери асосий ставкани 14 фоиз даражасида ушлаб турганди.
Ташқи ишлар вазири Абдулазиз Камилов Сенатдаги чиқишида Ўзбекистон Украинадаги вазиятга тинч йўл билан ечим топиш ва можарони сиёсий дипломатик воситалар ёрдамида ҳал қилиш тарафдори эканини таъкидлади. «Ўзбекистон Республикаси Украинанинг мустақиллиги, суверенитети ва ҳудудий яхлитлигини тан олади. Биз Луганск ва Донецк халқ республикаларини тан олмадик», — деди у.
Ўзбекистон ташқи ишлар вазири Абдулазиз Камилов Украинада айни дамда 300 га яқин Ўзбекистон фуқароси қолаётганини маълум қилди. У Украинадан эвакуация қилиш жараёни фуқароларни Сурия, Ироқ ва Афғонистондан ватанга қайтаришдан енгил бўлмаганини таъкидлади.
Шавкат Мирзиёев ва Қасим-Жомарт Тоқаев телефон орқали мулоқотда жаҳон иқтисодиётидаги инқирозли ҳодисаларнинг салбий оқибатларини камайтириш мақсадида яқиндан ҳамкорликни давом эттириш ва саъй-ҳаракатларни самарали мувофиқлаштиришга эътибор қаратдилар.
Қишлоқ хўжалиги вазирлиги Россия шакар ва ғалла экспортига киритган вақтинчалик чекловлари Ўзбекистондаги маҳсулотлар ҳажмига таъсир кўрсатмаслигини маълум қилди. Аҳоли ва корхоналарнинг талабини узлуксиз ва барқарор нархларда буғдой, ун, шакар билан таъминлаш, нархлар кескин ўзгаришининг олдини олиш учун захиралар яратилгани айтилмоқда.
16 мартдан бошлаб Ўзбекистоннинг Қозоғистон ва Тожикистон билан ўтказиш пунктлари орқали фуқаролар ҳаракатига чекловлар бекор қилинади. Барча божхона постлари фаолияти қайта тикланади. Қолаверса, мамлакатга киришда вакцина олган хорижликлардан ПЗР-тест натижаси талаб этилмайди.
18 март куни Шавкат Мирзиёев 10 мингдан ортиқ тиббиёт ходимлари билан учрашув ўтказади. Очиқ мулоқотга улардан 25 мингдан ортиқ мурожаат ва таклифлар келиб тушган.
Сенатнинг 24-ялпи йиғилишида Меҳнат кодексини тасдиқлаш, киберхавфсизлик ва реклама тўғрисидаги қонунлар кўриб чиқилади. Шунингдек, сенаторлар омбудсман, ТИВ, ИИВ ва Коррупцияга қарши курашиш агентлиги раҳбарларининг ҳисоботларини тинглайдилар.
Ўзбекистон президенти Шавкат Мирзиёев Туркманистон президенти Гурбангули Бердимуҳамедов ва сайланган президенти Сердар Бердимуҳамедов билан телефон орқали мулоқот қилди. Мулоқотда, жумладан, икки томонлама муносабатлар кун тартиби ва минтақавий ҳамкорликнинг долзарб масалалари ҳам муҳокама қилинди.
Шавкат Мирзиёев Туркманистоннинг сайланган президенти Сердар Бердимуҳамедовни сайловда қозонган ғалабаси билан табриклади.
Туркманистон президенти этиб сайланган 40 ёшли Сердар Бердимуҳаммедов Марказий Осиё тарихидаги энг ёш президентга айланди. Шу пайтгача ушбу рекорд 42 ёшида Тожикистон президенти бўлган Эмомали Раҳмонга тегишли эди. «Газета.uz» Марказий Осиё президентлари лавозимга сайланган вақтда неча ёшда бўлгани ва неча йил давомида раҳбарлик қилгани ҳақидаги маълумотларни тўплади.
Душанба куни президент раислигида ўтган йиғилишда «Ўзбекистон ҳаво йўллари» авиачипталари нархининг ошишига йўл қўймаслик зарурлиги таъкидланди. Шунингдек, зарар билан ишлаётган корхоналарни давлат томонидан қўллаб-қувватлаш амалиётидан бутунлай воз кечиш кераклиги айтилди.
Ўзбекистон ва Германия президентлари телефон орқали мулоқотда Украина атрофида юзага келаётган вазият юзасидан фикр алмашдилар. Улар вазиятнинг янада кескин тус олишига йўл қўймаслик ва можарони тез фурсатда тартибга солиш учун сиёсий-дипломатик саъй-ҳаракатларни давом эттириш зарурлигини таъкидладилар.
Самарқанд вилояти прокурори ўринбосари бўлган Сирожиддин Усманов Самарқанд туманига ҳоким этиб тайинланди.
Ўзбекистон ТИВ расмий вакили мамлакатнинг Украинадаги элчихонаси вақтинча Львов шаҳрида жойлашганини маълум қилди.
1 июнга қадар шахснинг шаъни ва номусини камситувчи маълумотларни ошкор қилганлик учун жиноий жавобгарликни белгилашга оид қонун лойиҳаси ишлаб чиқилади. Шунингдек, аёлни ўз ҳомиласини сунъий равишда туширишга мажбурлаганлик ҳамда яқин қариндоши бўлган хотин-қизга қасддан тан жароҳати етказганлик учун жавобгарлик кучайтирилади. Ҳимоя ордери муддати эса 1 йилгача узайтирилади.
Ўзбекистон Украинадаги вазиятдан хавотирда ҳамда зўравонликни тўхтатиш ва барча муаммоларни сиёсий-дипломатик йўллар билан ҳал қилиш зарур, деб ҳисоблайди, дея маълум қилди ташқи ишлар вазири Абдулазиз Камилов. Шунингдек, у Афғонистондаги вазиятга ҳам тўхталиб ўтди ва Европа ҳамда Осиё ўртасида кўприк вазифасини ўтаб келаётган Туркияни мисол сифатида келтирди.
Польша орқали яна 254 нафар ўзбекистонлик, шу жумладан 69 нафар аёл, 37 нафар вояга етгаман шахс ва 14 нафар чақалоқ Украинадан ватанга қайтарилди. 28 февралдан бери эвакуация қилинганларнинг умумий сони 5634 нафарга етди.
Украина элчихонаси 1 март куни Ўзбекистон ТИВга мамлакатда Россия телеканаллари эфирини тақиқлашни сўраб нота юборди. Хатда қайд этилишича, Россия ОАВлари олиб бораётган «ахборот уруши ҳарбий кампаниянинг ажралмас қисми» ва «жаҳон ҳамжамиятини дезинформациялашга қаратилган». Элчи Николай Дорошенко «Озодлик» радиосига берган интервьюсида шунингдек, 28 тонналик гуманитар ёрдамни юборгани учун Ўзбекистонга миннатдорчилик билдирди.
Шавкат Мирзиёев Cotton Campaign ўзбек пахтасига бойкотни бекор қилганига муносабат билдирди. «Бу ҳам биз учун жуда катта имконият, янги бозорлар дегани», — дея таъкидлади у. Шу боис, тайёр маҳсулот ишлаб чиқариб, четга сотувчи корхоналарга экспортёрларнинг имтиёзлари берилиши, дастгоҳлари учун божхона божи ундирилмаслиги маълум қилинди.
Қўшимча имкониятларга эга булиш учун сайтда рўйхатдан ўтинг