25 сентябрь куни Ўзбекистонда содир бўлган энг муҳим воқеалар дайжести
Навбатдаги «Алифбо ислоҳоти»га жамоатчилик муносабати, CAU (Akfa) университети атрофидаги можаро тафсилотлари, «Антиструмин» ишлаб чиқарувчи Samo заводида текшириш бошлангани, эмланмаганлар орасида тарқалаётган кўкйўтал, Чилонзорда яна дарахткушлик ва бошқалар — «Газета.uz»нинг кун дайжестида.
Қирғизистонда ун экспортига вақтинчалик тақиқ жорий этилди
Қирғизистон ҳукумати «озиқ-овқат хавфсизлигини таъминлаш» мақсадида олти ойга ун ва буғдой экспортини тақиқлади. Сўнгги ҳафталарда мамлакатда маҳаллий бозорнинг 50 фоизини эгаллаган Қозоғистон уни нархи кескин ошди.
«Ўзбекистон темир йўллари» холдинг компаниясига айлантирилади
«Ўзбекистон темир йўллари» холдинг компаниясига айлантирилади. Президент аҳоли чипта сотишдаги коррупция, вагонлардаги шарт-шароитлар ва хизмат кўрсатишдан норозилиги ҳамда соҳага ислоҳотлар зарурлигини маълум қилди. Юк ташувчи темир йўл станцияларини шаҳарлардан ташқарига кўчириш таклиф этилмоқда.
«Антиструмин» ишлаб чиқарувчи Samo заводида текшириш бошланди
«Антиструмин» йод препаратини ишлаб чиқарувчи Samo компанияси фаолияти текширилмоқда. Ножўя таъсирлар туфайли касалхонага ётқизилган болаларнинг ота-оналари ушбу препаратни қўллаш сабаб бўлган деб тахмин қилишмоқда. Расмийлар эса болаларда ЎРВИ бўлиши мумкин деган фикрда.
Тошкентдаги корхона 3,8 млрд сўмлик табиий газдан ноқонуний фойдалангани аниқланди
Шайхонтоҳур туманида 1 та МЧЖ табиий газдан ноқонуний фойдаланиб келгани оқибатида 3 млрд 838 млн сўмлик зарар етди. Бу ҳажмдаги газ 29 мингдан ортиқ хонадоннинг бир ойлик истеъмолини ташкил этади. Корхонанинг, шунингдек, электрдан 3 млрд сўмдан зиёд қарзи борлиги маълум бўлди.
Ханчжоу-2022: Осиё ўйинларининг илк кунида ўзбекистонлик спортчилар 7 та медаль қўлга киритди
Ханчжоу шаҳрида ўтаётган Осиё ўйинларининг дастлабки кунида ўзбекистонлик спортчилар 1 та олтин, 3 та кумуш ва 3 та бронза — жами 7 та медал билан тақдирланди. Мусобақадаги илк олтинни дзюдо бўйича -52 кг вазн тоифасида Диёра Келдиёрова қўлга киритди.
Ўзбекистонда кўкйўтал эмланмаганлар орасида тарқалмоқда ва бу табиий ҳол — Нурмат Отабеков
Санитария-эпидемиологик осойишталик ва жамоат саломатлиги қўмитаси раиси ўринбосари Нурмат Отабековнинг айтишича, кўкйўтал касаллиги мавсумий бўлиб, асосан эмланмаганлар орасида тарқалади. «Шу боис кўкйўтал кам миқдорда бўлса-да, аҳоли ўртасида қайд этиб турилиши табиий ҳол», — деди у.
Навбатдаги «Алифбо ислоҳоти»: Жамоатчилик бунга қандай муносабатда?
Лотин ёзувига асосланган ўзбек алифбосидаги 4 та ҳарфнинг янги шакли лойиҳасини жамоатчилик турлича қарши олди: бунинг «ҳаммага керакли ўзгариш» экани айтилаётган бир пайтда «ўзгартириш учун мантиқий сабаб топа олмаётган»лар ва «тўрт ҳарфнинг ўзгариши ислоҳот эмас» дегувчилар бор. Муносабатлар.
Ўзбекистонда Венгриянинг янги элчиси иш бошлади
Венгриянинг Ўзбекистондаги элчиси этиб тайинланган Ёжеф Рожа ташқи ишлар вазири Бахтиёр Саидовга ишонч ёрлиқлари нусхаларини топширди.
Қонунчилик палатаси ва Сенат ваколатлари янги таҳрирдаги Конституцияга мувофиқлаштирилмоқда
ЎзЛиДеП фракциясида Қонунчилик палатаси ва Сенат ваколатларини янги таҳрирдаги Конституцияга мувофиқлаштиришга оид қонун лойиҳаси кўриб чиқилди. Унга кўра, парламент палаталарига ўзини ўзи тарқатиб юбориш ваколатини бериш, қуйи палата спикери ўринбосарларини 7 тадан 2 тагача қисқартириш кутилмоқда.
Чилонзор туманида 30 га яқин қуриган кўп йиллик дарахт кесиб ташланди
Тошкентнинг Чилонзор туманида қуриган 29 туп дарахт кесиб ташланди. 2021 йил баҳорида «ободонлаштириш» доирасида ушбу ҳудуддаги 55 туп дарахт тагига полиэтилен плёнка тўшалиб, керамзит сепилганди. Оқибатда 33 та дарахтда қуриш белгилари аниқланган.
Ҳафта давомида қуруқ ва илиқ об-ҳаво сақланиб туради
Ўзбекистонда ҳафта давомида қуруқ ва илиқ об-ҳаво сақланиб туради. Кечалари ва эрталаб ҳарорат +12…+17 даража атрофида бўлади, кундуз кунлари +30 даражагача исийди. Баъзи жойларда қисқа муддатли ёмғир ёғиши мумкин.
Қашқадарё ва Фарғонада ўқишга киритиб қўйиш учун фуқаролардан пул олган шахслар ушланди
Қаршидаги жамоат саломатлиги техникуми ва Фарғонадаги ТАТУ филиалига ўқишга киритиб қўйишни ваъда қилиб, фуқаролардан пул олишда гумонланганлар қўлга олинди.
Пойтахтнинг 3 та туманидаги айрим жойларда электр вақтинча бўлмайди
Чилонзор, Яккасарой ва Мирзо Улуғбек туманларидаги айрим ҳудудлар 25 сентябрь куни электр таъминотидан вақтинча узилади.
Akfa университетининг собиқ ректори Абдужаббор Абдувоҳидовни обрўсига доғ тушириш ва таҳдид қилишда айблади
Akfa университетининг собиқ ректори Бехзод Жалилов ОТМ янги раҳбарияти қўйган айбловларни рад этди. У ОТМ кузатув кенгаши раиси Абдужаббор Абдувоҳидовни обрўсига доғ тушириш ва таҳдидларда айблаб, олийгоҳ ривожига эътибор қаратишини маслаҳат берди ва президентдан хавфсизлигини таъминлашни сўради.
Шавкат Мирзиёев Италия собиқ президенти Жоржо Наполитано вафоти муносабати билан таъзия йўллади
Шавкат Мирзиёев Италиянинг собиқ президенти, сенатор Жоржо Наполитано вафоти муносабати билан мамлакат президенти ва халқига таъзия йўллади.
Олий ҳарбий таълим муассасаларида курсантлар қасамёд қабул қилди (фото)
Якшанба куни Мудофаа вазирлигига қарашли олий ҳарбий таълим муассасаларида биринчи босқич курсантларининг қасамёд қабул қилиш маросимлари бўлиб ўтди. Фото.
Тошкентда поезд устида селфи тушмоқчи бўлган йигитни 27 минг вольтли ток урди
Тошкентдаги «Ҳамза» темирйўл бекатида поезд устига чиқиб, селфи тушмоқчи бўлган 18 ёшли йигитни 27 минг вольтли ток урди. Ҳозирда унинг аҳволи оғирлиги айтилмоқда.
ДХХ 3 та вилоятда қалбаки валюталарнинг муомалага чиқарилишига чек қўйди
ДХХ Сирдарё, Бухоро ва Навоий вилоятларида қалбаки валюталарнинг муомалага чиқарилишига чек қўйди. Хусусан, бир ҳолатда қалбаки 10 минг долларни 5 минг долларга сотмоқчи бўлганлар, яна бирида эса сохта 14 минг долларни ўтказмоқчи бўлганлар ушланди.
Central Asian University университетида (собиқ Akfa) можаро авж олди. ОТМ собиқ ректорни айбламоқда
Central Asian University университетида (собиқ Akfa) талабалар — икки йиллик тайёргарликдан сўнг иккинчи босқичга ўқишга қабул қилинган мактаб битирувчиларига ўқишни давом эттира олмасликлари айтилди. Улар ОТМга киритилмаяпти. Университет собиқ раҳбарият қонунни бузганини даъво қилмоқда.
Қўшимча имкониятларга эга булиш учун сайтда рўйхатдан ўтинг