Тошкент шаҳри Шайхонтоҳур туманида 1 та МЧЖ 3 млрд 838 млн сўмлик табиий газдан ноқонуний фойдалангани аниқланди. Бу ҳақда Энергетика вазирлиги ахборот хизмати хабар берди.
Қайд этилшича, «Р.Т.» МЧЖга қарашли корхонанинг 2 та буғ қозони газ тармоғига ўзбошимчалик билан уланган, оқибатда 5 млн 816 минг 592 метр куб газ ўғирланган. Бу 29 мингдан зиёд хонадоннинг бир ойлик истеъмолини ташкил этади.
Шу билан бирга, истеъмолчининг бугунги кун ҳолатида электр энергиясидан 3 млрд 59 млн 281 минг сўм қарздорлиги мавжудлиги сабабли электр тармоғидан ажратилди.
Аниқланган ҳолат юзасидан расмийлаштирилган ҳужжатлар белгиланган тартибда ҳуқуқни муҳофаза этувчи органларга тақдим қилинди, дейилади хабарда.
