22 сентябрь куни Қирғизистон Вазирлар Маҳкамаси олти ой муддатга буғдой ва буғдой унини экспорт қилишни тақиқлади. Тегишли фармон мамлакат ҳукумати сайтида эълон қилинди.
Мазкур қарор «мамлакатнинг озиқ-овқат хавфсизлигини таъминлаш ва озиқ-овқат маҳсулотларининг бозор нархларини барқарорлаштириш мақсадида» қабул қилинди, дейилади ҳужжатда.
Қишлоқ хўжалиги вазирлиги Қирғизистондан ун ва ғалла экспортини вақтинча тақиқлаш таклифи билан чиқди. Вазирлик ушбу чорани мамлакатда ун нархининг сезиларли даражада ошиши билан изоҳлади ва унинг танқислиги «озиқ-овқат инқирозига олиб келиши мумкинлигини» таъкидлади.
Қирғизистон ҳукумати аввалроқ мамлакатда буғдой тақчиллиги йўқлигини, нархларнинг ошиши эса фақат Қозоғистондан етказиб бериладиган унга алоқадор эканини билдирган эди. Вазирлар Маҳкамаси бунга Қозоғистондан дон олиб келинадиган темир йўлларнинг мавсумий тирбандлиги сабаб бўлган деб ҳисобламоқда.
Ун тегирмонлари уюшмаси маълумотларига кўра, Қозоғистон уни Қирғизистон ички бозорининг 50 фоизини эгаллайди, дея аниқлик киритмоқда Tazabek. «Озодлик» радиоси маълумотларига кўра, маҳаллий бозорларда Қозоғистондан келган бир қоп ун 1000 сомга (тахминан 11 доллар) қимматлашган. Шундан сўнг, дўконларда маҳаллий уннинг нархи ҳам бир оз ошган.
Қирғизистон ҳукумати, шунингдек, Давлат моддий захиралар жамғармаси ун тегирмонлари учун буғдой захирасини реал танқислик юзага келган тақдирда бўшатишга тайёрлигини ҳам қайд этди. Арзон дон ва ун экспортига йўл қўймаслик учун Қишлоқ хўжалиги вазирлиги тақиқ жорий этишни таклиф қилди, деб ёзади 24.kg. Кейинчалик маълум бўлишича, жамғарма 40 минг дона озиқ-овқат буғдойини истеъмолга чиқарган.
Жогорку Кенеш депутати Жусупбек Коргонбай уулу ун нархининг ошишини унинг Ўзбекистонга экспорт қилиниши билан боғлади, бу эса, унинг сўзларига кўра, Қирғизистонда омборлар бўшаб қолишига олиб келган. Қирғизистон Миллий статистика қўмитасининг Kursiv.uz келтирган маълумотларига кўра, жорий йилнинг дастлабки етти ойида мамлакат 15 минг тонна буғдой унини экспорт қилган — бутун ҳажм Ўзбекистонга тўғри келган.
Аввалроқ «Газета.uz» Қозоғистондан экспорт қилинадиган дон нархи ошиши фонида Ўзбекистон ҳудудларида ҳам ун ва нон нархи кескин ошгани ҳақида ёзган эди.
