«Қамоқхоналарда қийноқ ҳолатларини деярли учратганим йўқ» — Омбудсман
Инсон ҳуқуқлари бўйича вакил Феруза Эшматова 9 ой ичида қамоқхоналарга 120 та мониторинг ташрифлари амалга оширилганини маълум қилди. Унинг айтишича, мониторинг давомида қамоқхоналарда «қийноқ ҳолатлари деярли учрамаган». «Шу пайтгача уларнинг ҳеч қайсисидан „мени бу қийнаяпти“, „урди“ ёки қанақадир „руҳий тазйиқ, босим, қийноқлар ўтказаяпти“ деган мурожаат бўлмади», — дейди омбудсман.
Байрам кунлари якшанбага тўғри келса, душанбани ҳам дам олиш куни деб эълон қилиш таклиф этилди
Депутатлар байрам муносабати билан дам олиш ишланмайдиган кунга тўғри келса, дам олиш кунини байрамдан кейинги кунга кўчиришни таклиф қилишди. Меҳнат кодексига киритилаётган ўзгартишларга кўра, қонунчиликда белгиланган байрам кунлари агар якшанба кунига тўғри келса, унда душанба куни дам олиш кунига қўшиб берилади.
Долларнинг расмий курси пасайди
Долларнинг сўмга нисбатан расмий курси 14,37 сўмга пасайиб, 10 666 сўм этиб белгиланди. Шунингдек, евро курси ҳам пасайди, рубль курси эса кўтарилди.
Иқтисодиёт бўйича Нобель мукофоти соҳиблари эълон қилинди
Иқтисодиёт бўйича 2021 йилги Нобель мукофоти америкалик иқтисодчиларга топширилди. Дэвид Кард «меҳнат иқтисодиётини ўрганишга», Жошуа Энгрист ва Гуидо Имбенс «сабаб-оқибат муносабатларини таҳлил қилишга» ҳисса қўшганликлари учун эътироф этилди.
Суд Гулистон тумани ҳокими ўринбосарини фирибгарликка суиқасд учун жаримага тортди
Суд апрель ойида 400 доллар олаётганда ушланган Гулистон тумани ҳокимининг собиқ ўринбосарини фирибгарликка суиқасдда айбдор деб топди. У 73,5 млн сўм миқдорида жаримага тортилди.
«Қашқадарё аҳолиси ҳалигача пахтани букилиб, қўл меҳнати билан теради» — Шавкат Мирзиёев
ЎзЛиДеПдан президентликка номзод Шавкат Мирзиёев қашқадарёликлар ҳалигача пахтани қўл меҳнати билан теришига эътибор қаратди. Номзод ўз дастурида кейинги беш йилда 40% қишлоқ хўжалиги техникаларини янгилаб, механизация даражасини 90%га етказиш режалаштирилганини таъкидлади. Шунингдек, у қишлоқ хўжалиги техникаси хариди учун субсидиялар кўламини ҳам кўпайтиришни таклиф қилди.
«Ягона мақсадимиз — Ўзбекистонга Афғонистондан ўқ отилмасин» — президент
Шавкат Мирзиёев ҳар куни унга Афғонистон билан чегарадаги вазият ҳақида маълумот беришларини маълум қилди. Унинг сўзларига кўра, Ўзбекистон жафокаш афғон халқига қўлидан келганча ёрдам беришга тайёр. «Бизнинг ягона мақсадимиз — Ўзбекистонга Афғонистондан ўқ отилмасин», — дея таъкидлади президент.
БМТ ИҲК ёшлар ҳуқуқлари бўйича резолюцияни қабул қилди
БМТнинг Инсон ҳуқуқлари бўйича кенгаши Ўзбекистон ташаббуси билан илгари сурилган COVID-19 пандемиясининг ёшлар ҳуқуқларига таъсири тўғрисидаги резолюцияни қабул қилди.
Тошкентда хонадонлардан бирида содир бўлган ёнғин оқибатида 1 киши ҳалок бўлди
Янгиҳаёт туманида жойлашган уйларнинг бирида ёнғин содир бўлди. Ёнғин оқибатида уйнинг тахминан 20−25 кв.м майдонда шифт ва ички қисми ёниб зарарланган. Ёнғин оқибатида 6 фуқаро қутқариб қолинди, 1 киши ҳалок бўлди.
Россияда ишлаш ҳуқуқини берувчи патент учун тиббий кўрик Тошкентда ўтказилади
Россияда ишлаш ҳуқуқини берувчи патентни олишда талаб этиладиган тиббий кўрик Россия Соғлиқни сақлаш вазирлиги томонидан Ўзбекистонда ўтказилади. Шу муносабат билан Россиянинг 40 нафар тиббиёт ходими Тошкентга келди.
Аҳолидан ортиқча ҳужжат талаб қилган 9 та вазирлик ва идора раҳбар ходимлари жавобгарликка тортилди
Адлия вазирлиги давлат хизматларини кўрсатишда аҳолидан ортиқча ҳужжат талаб қилган — Бандлик ва меҳнат муносабатлари, Инновацион ривожланиш ҳамда Олий ва ўрта махсус таълим вазирликлари, Давлат экология қўмитаси, 3 та агентлик ва 2 та инспекциянинг раҳбар ходимларини жаримага тортди. Қолаверса, давлат идораларнинг 38 нафар маъсул ходимига интизомий жазо қўлланилди.
Ҳафта давомида қуёшли об-ҳаво бўлиши кутилмоқда
Ҳафта давомида ёғингарчилик кутилмайди, ҳаво асосан қуёшли бўлади. Ҳаво ҳарорати кундуз кунлари +20…+23 даража илиқ атрофида, жанубда +25 даража илиққача бўлади.
«Навоийазот» захарли моддаларнинг Зарафшон дарёсига оқизилгани бўйича айбловни рад этди
«Навоийазот» кохонаси балиқларнинг оммавий заҳарланишига сабаб бўлган саноат чиқиндиларининг Зарафшон дарёсига ташлангани юзасидан муносабат билдирди. Таъкидланишича, «сўнгги даврда оқава сувларнинг сифати ўзгаришларсиз» бўлган. «Ташланма сувлардан лаборатория тахлиллари олиниб кейинчалик Зарафшон дарёсига юборилади», — дейилади хабарда.
Туркия Ўзбекистонга 200 минг доза Sinovac вакцинасини етказиб беради
Туркия Ўзбекистонга 200 минг дозада Sinovac вакцинасини, шунингдек, 20 минг қути «Фавипиравир» дори-дармонларини етказиб беради. Вакциналар ва дориларнинг бу партияси дўстлик ва хайрихоҳлик белгиси сифатида Туркия томонидан Ўзбекистонга юборилади.
Тошкентда содир бўлган ЙТҲ оқибатида 2 киши вафот этди
Яккасарой туманида Lacetti автомашинаси ҳайдовчиси бошқарувни йўқотиб, йўл ўртасидаги ёритиш чироғи устунига урилган. Тўқнашув оқибатида автомобилда ёнғин юзага келган. Ҳодиса натижасида ҳайдовчи ва бир нафар йўловчи вафот этган.
Зангиота 1-сон шифохонасида 160 нафарга яқин бола даволанмоқда — бош шифокор
Зангиота 1-сон юқумли касалликлар шифохонаси директори Анвар Ҳусановнинг таъкидлашича, Covid марказга кунига ўртача 25 нафар ўғил-қиз ётқизиляпти. Ҳозирги кунда 160 нафарга яқини болалар даволанмоқда. Унинг сўзларига кўра, шу кунгача Ўзбекистонда 117 мингдан ортиқ бола коронавирусга қарши эмланган. Касалланган ўрта ҳолатдаги бемор муолажаси учун давлат ҳисобидан 15 млн сўмгача маблағ сарфланаётгани маълум қилинди.
Европада газ нархлари кескин пасайди. FT буни Путиннинг энергетика масалалари юзасидан қилган чиқиши билан изоҳлади
7 октябрь куни газ фючерслари нархи кескин — 22 фоизга пасайиб, минг кубометр учун 1000 доллардан камроқни ташкил қилди. Financial Times нашри газ нархлари қулашини Россия президенти Владимир Путиннинг энергетика масалалари юзасидан қилган чиқиши билан боғламоқда. RT нашрига кўра, экспертлар Европа газ бозоридаги вазият вақт ўтиши билан мувозанатга келиши мумкинлигига ишонч билдирмоқда.
«Самарқанд» халқаро аэропорти вақтинча ёпилмоқда
«Самарқанд» халқаро аэропорти янги аэродром мажмуасини ишга туширишга тайёргарлик кўриш муносабати билан бир ойга ёпилди. Барча қатновлар Навоий, Бухоро, Қаршига йўналтирилади, бу ердан йўловчилар учун Самарқандга ер усти трансфери ташкил этилади.
Спорт соҳасидаги энг муҳим хабарлар ҳафталик дайжести
Ўзбекистон миллий терма жамоасининг Малайзия билан ўйини, Бекободда янги футбол академиянинг очилиши, шорт-трекчиларнинг Москвадаги мусобақада ғолиб бўлиши — «Газета.uz»нинг ҳафталик спорт янгиликлари дайжестида.
«Навоийазот»га қарашли қудуқдан дарёга ҳаёт учун хавфли моддалар чиқарилган
Давлат экология қўмитаси «Навоийазот» корхонаси қудуғидан саноат чиқиндиларининг Зарафшон дарёсига ташланганлигини аниқлади. Хавфли моддаларнинг рухсат этилган концентрацияси бир неча бор ошиб кетиши балиқларнинг оммавий заҳарланишига олиб келди.
Қўшимча имкониятларга эга булиш учун сайтда рўйхатдан ўтинг