Сиёсат
Президент ва туризм соҳаси вакиллари нималарни муҳокама қилди?
Шавкат Мирзиёев туризм соҳасидаги тадбиркорлар билан мулоқот ўтказди. Президент туроператорларни молиявий қўллаб-қувватлаш, ҚҚСни субсидия шаклида қайтариш муддатини узайтириш, пенсиядаги сайёҳлар учун алоҳида виза режимини жорий этиш бўйича топшириқлар берди ва бошқа масалаларни муҳокама қилди.
Президент Бухорони 2045 йилгача ривожлантириш концепцияси, «Янги Ўзбекистон» массиви ва боғи лойиҳалари билан танишди
Бухоро ҳудудини 3831 гектарга кенгайтириш режалаштирилмоқда. Шаҳарда «Янги Ўзбекистон» массиви ва «жуда баланд бўлмаган стела»ли истироҳат боғи, тарихий обидалар макетлари, рақамли панорама ва бошқа объектлар қурилади. Президентга шаҳарни 2045 йилгача ривожлантириш концепцияси тақдим этилди.
Сардоба туманига янги ҳоким тайинланди
Зиядулла Каримов Сирдарё вилоятининг Сардоба туманига ҳоким бўлди. У бунга қадар Давлат активларини бошқариш агентлигининг ҳудудий бошқармаси бошлиғи лавозимида ишлаган.
Президент шайх Нуриддин Холиқназар орқали Маккадаги ўзбекистонлик ҳожилар ҳолидан хабар олди
Шавкат Мирзиёев Макка шаҳрида бўлиб турган Мусулмонлар идораси раиси Нуриддин Холиқназар билан телефонда мулоқот қилди. У муфтийдан фуқароларнинг шароити, саломатлиги ва кайфияти ҳақида сўради, Ўзбекистонга қайтгач, «ҳожилар ёшлар тарбияси ва оилалар тотувлигида ибрат бўлишларига» умид билдирди.
Сабине Маҳл БМТнинг Ўзбекистондаги доимий координатори этиб тайинланди
Сабине Маҳл БМТнинг Ўзбекистондаги доимий координатори этиб тайинланди, у бу лавозимда 1 июндан иш бошлади. Тайинловга қадар у 2019 йилдан бери БМТнинг Грузиядаги доимий вакили эди, Индонезия, Фаластин ва Қирғизистондаги БМТ Аёллар бўлимларига раҳбарлик қилган, шунингдек, ЕХҲТда ишлаган.
Фирдавс Абдухолиқов бошқа ишга ўтади
Кинематография агентлиги раҳбари Фирдавс Абдухолиқов лавозимини тарк этади. У Тошкентдаги Ислом цивилизацияси маркази директори этиб тайинланиши кутилмоқда.
Шавкат Мирзиёев расмий ташриф билан Туркияга жўнаб кетди
Президент расмий ташриф билан Туркияга учиб кетди. Давлат раҳбари Анқарада Стратегик ҳамкорлик кенгашининг учинчи йиғилишида иштирок этади.
БМТ Бош ассамблеяси наркотиклар муаммосини ҳал қилиш резолюциясини маъқуллади, унинг ташаббускори — Ўзбекистон
БМТ Бош ассамблеяси Ўзбекистон ташаббуси билан қабул қилинган «Марказий Осиё давлатларининг гиёҳвандлик билан боғлиқ муаммоларни самарали ҳал этиш ва бартараф этишда ягона фронт бўлиб ҳамкорлик қилишга тайёрлиги» резолюциясини маъқуллади.
Иқтисодиёт
Президент Каппадокиядаги каби ҳаво шарлари ҳудудини яратиш бўйича топшириқ берди
Ўзбекистонда Туркия Каппадокияси мисолида ҳаво шарлари ҳудудини яратиш режа қилинмоқда. Президент Мўйноқ аэропортида парашютдан сакраш тизимини йўлга қўйиш мумкинлигини айтди. Экология, транспорт ва мудофаа вазирларига экстремал туризмни ривожлантириш дастурини қабул қилиш топширилди.
Президент — Бухорода янги аэропорт қурилиши сабаблари ҳақида
Бухоро вилоятида 226 млн доллар эвазига янги аэропорт қурилади, аввалроқ мавжуд аэропортнинг ўзида янги терминал қуриш кўзда тутилганди. Президентнинг таъкидлашича, ҳозирги ҳаво бандаргоҳи «сайёҳлар оқимини икки баравар ошириш режаси учун кичиклик қилмоқда».
Президент асфальт-бетон қопламали йўллар қурилишини янада кенгайтириш бўйича топшириқ берди
Президент Бухоро вилоятига ташрифи доирасида янги лойиҳа бўйича таъмирланаётган йўлни кўздан кечирди. У 20 йилгача хизмат қилиши керак бўлган янгича қатламли асфальт-бетон билан қопланган. Шавкат Мирзиёев лойиҳани янада кенгайтириш бўйича топшириқ берди.
Йилнинг дастлабки 5 ойида давлат бюджети дефицити 29 трлн сўмдан ошди
Ўзбекистонда январь-май ойларида давлат бюджети дефицити 29 трлн сўмдан ортиқни ташкил этди. Майдаги даромад ва харажатлар орасидаги фарқ ой бошига шаклланган қолдиқ ва ой давомида муомалага чиқарилган давлат қимматли қоғозлари ҳисобига қопланган.
«Манфаатлар тўқнашуви тўғрисида»ги қонун қабул қилинди
Президент «Манфаатлар тўқнашуви тўғрисида»ги қонунни имзолади. Ҳужжат давлат органлари ва давлат улуши 50 фоиздан ортиқ компанияларга нисбатан татбиқ этилади. Антикоррупция агентлиги ваколатли ташкилот этиб белгиланди.
2023 йилда Ўзбекистон ва ЕИ ўртасидаги савдо айланмаси 11 фоизга ўсди — Евроиттифоқ элчиси
Ўзбекистон ва Европа Иттифоқи ўртасидаги товар айирбошлаш 2023 йилда 11 фоизга ўсиб, 5,13 млрд еврога етди. ЕИ элчиси Шарлотта Адриан иттифоқ Ўзбекистоннинг Жаҳон савдо ташкилотига аъзо бўлишини қўллаб-қувватлашда давом этишини таъкидлади.
Шавкат Мирзиёев ЖСТ бош директори билан учрашди
Шавкат Мирзиёев ва ЖСТ бош директори Нгози Оконжо-Ивеала учрашувида Ўзбекистоннинг ташкилотга қўшилиш борасидаги амалий ишлари муҳокама қилинди. Томонлар электрон савдо ва рақамли хизматлар экспортини ошириш, мамлакатда Савдо сиёсати бўйича компетенция маркази ташкил этиш масалаларига тўхталди.
Жамият
Самарқандда ўқувчи бошқарувидаги Nexia уриб юборган 6 ёшли қиз вафот этди
Ургут туманида 9-синф ўқувчиси бошқарувида бўлган Nexia-2 юқори тезликда 6 ёшли қизни уриб юборди. Қиз шифохонада вафот этди. Бола машинани уйидан отасининг рухсатисиз олиб чиқиб кетгани аниқланди.
Алкоголь ва тамаки бозорини тартибга солиш инспекцияси ташкил этилмоқда
Иқтисодий жиноятларга қарши курашиш департаменти қошида Алкоголь ва тамаки бозорини тартибга солиш инспекцияси ташкил этилмоқда. Шунингдек, 1 октябрдан истеъмол ва техник этил спирти ҳамда алкоголь маҳсулотларини ишлаб чиқаришда қўшимча лицензия талаблари киритилади.
Бадиий таржима соҳасида Огаҳий номидаги халқаро мукофот таъсис этилди
Ўзбекистонда бадиий таржима соҳасида Муҳаммад Ризо Огаҳий номидаги халқаро мукофот таъсис этилди. Танлов 2025 йилдан бошлаб ҳар икки йилда бир марта ўтказилади. Ғолибларга БҲМнинг 300 баравари миқдорида бир марталик пул мукофоти берилади.
Май ойида 67,8 млрд сўмлик электр ва табиий газдан ноқонуний фойдаланилгани аниқланди
Май ойида Ўзбекистонда 971 та ҳолатда истеъмолчиларнинг табиий газ ва электр энергиясидан ноқонуний фойдалангани аниқланди. Бунда давлат манфаатларига 67,8 млрд сўмлик зарар етказилган. Бундай ҳолатларнинг энг кўпи Навоий, Сурхондарё ва Андижон вилоятларига тўғри келди.
Тошкентда фуқароларни АҚШга ноқонуний юбормоқчи бўлганлар қўлга олинди
Учтепа туманида ҳуқуқ-тартибот идоралари ходимлари фуқароларни АҚШга ноқонуний жўнатиш ҳолатларига чек қўйди. Қўлга олинганлардан бири бунинг учун 42 минг доллар, иккинчиси эса 17 минг доллар сўраган.
Хоразмда 2 нафар фуқарони Норвегияга ишга юборишни ваъда қилган шахс қўлга олинди
Хивада фуқаро 2 нафар танишини ишлаш учун Норвегияга юбориш эвазига 5600 доллар сўрагани аниқланди. У аванс олаётганда ушланди.
Жаҳон
АҚШ Мексика билан чегарани ноқонуний кесиб ўтганларга бошпана беришга вақтинча чеклов киритди
АҚШ президенти Жо Байден Мексикадан чегарани ноқонуний кесиб ўтган муҳожирларга бошпана беришни вақтинча тақиқлади. Бу чоралар уларни депортация қилишни осонлаштиради, деди Оқ уй. Тақиқ АҚШ жанубий чегарасидаги тирбандлик юзага келган даврда ҳам амал қилади.
Бизни ўқиётганингиз учун раҳмат!
