Бош прокуратура ҳузуридаги Иқтисодий жиноятларга қарши курашиш департаменти, Давлат хавфсизлик хизмати ва Ички ишлар вазирлиги ходимлари Тошкент шаҳрининг Учтепа туманида фуқароларни АҚШга жўнатишни ваъда қилган шахсларни қўлга олди.
Департамент матбуот хизмати хабарига кўра, Г. А. уч нафар фуқарога танишлари ёрдамида АҚШга юборишни ҳамда виза ҳужжатларини расмийлаштириб беришини айтган. У бунинг учун 42 минг доллар талаб қилган, 28,8 минг доллар олаётган пайтда ашёвий далиллар билан ушланган.
Яна бир ҳолатда Ф.А. фуқаро М.Я.га танишлари ёрдамида АШҚга бориш учун ҳужжатларни расмийлаштириб, виза олиб беришни ваъда қилган. У ҳам 17 минг доллар олаётган вақтда қўлга олинган.
Ҳолатлар юзасидан Жиноят кодексининг 168-моддаси (Фирибгарлик) ва 211-моддаси 28-моддаси (Пора беришда иштирок этиш) билан жиноят иши қўзғатилган. Ҳозирда тергов ҳаракатлари олиб борилмоқда.
Эслатиб ўтамиз, 2023 йилнинг ноябрь ойи охирида АҚШнинг Тошкентдаги элчихонаси АҚШга Мексика орқали ноқонуний кирмоқчи бўлган Ўзбекистон фуқаролари эндиликда мамлакатга қўйиб юборилмаслиги ва иммиграция иши ҳал бўлгунича ҳибсда сақланишини билдирганди.
2024 йилнинг июнь ойи бошида АҚШ президенти Жо Байден Мексикадан чегарани ноқонуний кесиб ўтган муҳожирларга бошпана беришни вақтинча тақиқлади. Бу чоралар уларни депортация қилишни осонлаштиради, деди Оқ уй. Тақиқ АҚШ жанубий чегарасидаги тирбандлик юзага келган даврда ҳам амал қилади.
Маълумот учун, 2021 йилдан 2023 йилгача АҚШ ҳукумати томонидан «алоҳида қизиқиш уйғотувчи шахслар» сифатида таснифланган ўн минглаб муҳожирлар Мексика орқали АҚШга ноқонуний киришга ҳаракат қилишган. Қўлга олинганларнинг 13 мингдан ортиғи Ўзбекистон фуқароларидир.
