Prezident Shavkat Mirziyoyev Tojikiston prezidenti Imomali Rahmonning taklifiga binoan 10−12 iyun kunlari rasmiy tashrif bilan Dushanbeda bo‘lishi kutilmoqda. Bu haqda Tojikistonning mahalliy OAVlari xabar berdi.
O‘zbekiston Tog‘li Qorabog‘da maktab qurishni rejalashtirmoqda, dedi AOKA direktori Asadjon Xodjayev. Uning aytishicha, hududdagi tiklanishi lozim bo‘lgan ob’ektlar ro‘yxati belgilanmoqda, ularni rekonstruksiya qilishga o‘zbekistonlik quruvchilar jalb qilinadi.
Hukumat qaroriga asosan Qoraqalpog‘iston va viloyatlarda qishloq xo‘jaligi ekinlarini sug‘orish uchun suv olish limitlari tasdiqlandi. Unga ko‘ra, respublika bo‘yicha mart-sentyabr oylarida jami limit 29 mlrd 236 mln 500 ming kub etib belgilanmoqda. Bundan tashqari, suv tanqisligining salbiy ta’sirlarini yumshatish bo‘yicha maxsus ishchi guruh ham shakllantirildi.
2021−2023 yillarda Toshkentda 10,7 mlrd dollarlik 1390 ta investitsiya loyihalarini amalga oshirish, 98 mingga yaqin ish o‘rinlarini ochish rejalashtirilmoqda. Jumladan, joriy yilda 4,1 mlrd dollarlik investitsiyalarni o‘zlashtirish hamda 27016 ta ish o‘rnini ochish mo‘ljallangan.
Bosh prokuratura turkshunos olim Andrey Kubatinga DXX tomonidan ruhiy va jismoniy tazyiqlar o‘tkazilmaganligini ma’lum qildi. Xibsxonaga joylashtirish va chiqib ketayotgan vaqtida uning badanida jismoniy jarohatlar kuzatilmagani, sog‘lig‘i bo‘yicha shikoyatlar bo‘lmagani va ruhiy holati mutaxassislar tomonidan ijobiy baholangani aytilmoqda.
12 aprel kuni O‘zbekistonda 67,4 mingdan ziyod kishi koronavirus infeksiyasiga qarshi emlanib, vaksina olganlar soni 200 ming nafardan oshdi.
O‘zbekiston futbol assotsiatsiyasi «Navbahor» — «Paxtakor» futbol o‘yini vaqtida kelib chiqqan tartibsizliklar bo‘yicha o‘z qarorini e’lon qildi. Unga ko‘ra, ikkala jamoaning rasmiylariga intizomiy choralar ko‘riladi. «Navbahor» futbol klubi esa keyingi ikkita uy uchrashuvini muxlislarsiz o‘tkazadi.
Ukraina prezidenti Vladimir Zelenskiy Donbassdagi frontga safari paytida AQSH Ukrainaning NATOga kirishiga ko‘maklashishi kerak deya ta’kidladi. U ushbu so‘zlarni Rossiya qo‘shinlarining Ukraina chegarasiga tortilishi haqidagi xabarlardan so‘ng aytdi.
Afg‘onistonda sodir bo‘lgan zilzila O‘zbekistonning bir nechta hududlarida 2 balldan sezildi. Magnituda M=5,4, chuqurligi 191 kmni tashkil etdi.
Andijon shahri yaqinida «Yangi Andijon» massivi bunyod etiladi. Uning bosh rejasi prezidentga taqdimot qilindi. 4 ming gektarda joylashadigan ob’ektda 411 ming nafar aholi uchun uy-joy, savdo maskanlari, kichik sanoat zonasi va yashil hudud bo‘lishi reja qilingan.
Alisher Usmonov fikriga ko‘ra, O‘zbekistonda sovet ittifoqidan so‘ng bo‘lgan turg‘unlikdan keyin endi haqiqiy iqtisodiy islohotlar boshlandi. «Ushbu islohotlarning tashabbuskori, birinchi navbatda, o‘z aholisining farovonligini oshirish, shuningdek, Markaziy Osiyo mamlakatlari qo‘shnichilikni mustahkamlash bo‘yicha boshqaruvni olgan davlat rahbari hisoblanadi», — dedi u Shavkat Mirziyoyev haqida.
Madaniyat vazirligi mansabdorlari tadbirkorlik sub’ektini asossiz ravishda tanlovda g‘olib sifatida ko‘rsatganligi natijasida, musiqa asboblarini haqiqiy bozor bahosidan 792,2 mln so‘mga qimmat narxda sotib olgan. Holat yuzasidan jinoyat ishi qo‘zg‘atilib, tergov harakatlari o‘tkazilmoqda.
Xorijdagi konsullik okrugi hududiga vaqtincha kirgan fuqaro yashash uchun mablag‘larsiz qolganda, muassasaga moliyaviy yordam so‘rab murojaat qilishi mumkin. Muassasa 2 ish kunida fuqarodan arizani qabul qiladi va Tashqi ishlar vazirligining roziligiga ko‘ra fuqaro bilan qarz shartnomasi tuziladi hamda oziq-ovqat mahsulotlari, turar joy, kiyim-kechak va transport xarajatlari uchun to‘lov o‘tkaziladi.
Toshkentning Sharof Rashidov ko‘chasidagi (Mustaqillik maydoni yonida) ma’muriy bino rekonstruksiyasi va favvora ostiga avtoturargoh qurilishiga 431,5 mlrd so‘m sarflanishi mumkin. Pudratchi sifatida aksionerlari orasida qurilish vazirining o‘g‘li va rafiqasi bo‘lgan «12-trest» tanlanmoqda.
Isroilning Eron yadro inshootidagi fojiada ayblanishi, AQSHda politsiyachi afroamerikalikni otib o‘ldirgani sababli namoyishlar boshlangani, Parijda noma’lum shaxsning kasalxona yaqinida odamlarga o‘q uzgani va boshqa yangiliklar — «Gazeta.uz»ning jahon yangiliklari dayjestida.
Quvaytning Jazeera Airways aviakompaniyasiga O‘zbekistonga muntazam qatnovlarni amalga oshirish uchun ruxsatnoma berildi. Aviakompaniya Quvayt — Toshkent — Quvayt yo‘nalishida muntazam aviaqatnovlarni amalga oshiradi.
Haftaning birinchi yarmida respublikada iliq va kam bulutli ob-havo kuzatiladi. Haftaning ikkinchi yarmiga kelib havo harorati haftaning boshiga nisbatan kechalari 9−14 daraja, kunduzi 22−27 daraja iliq bo‘lgan biroz yuqori, asosan yog‘ingarchiliksiz ob-havo bo‘lishi kutilmoqda.
Dollarning rasmiy kursi 2 so‘mga arzonladi va jami 10 475 so‘m etib belgilandi. Shuningdek, rubl kursi ham pasaydi, yevro esa biroz qimmatladi.
Izboskan tumanida G. va O. kimdan ekani noma’lum bo‘lgan 3 oylik chaqalog‘ini sotishga urindi. Ular Andijon shahridagi «Daryotrans» yonida 700 dollar evaziga «er-xotin mijoz»ga chaqaloqni bergan. Fuqaro O. 5 yilga ozodlikdan mahrum etildi, chaqaloqning onasiga esa shartli jazo tayinlandi.
Telegram messenjeri IPO o‘tkazishga tayyorgarlik ko‘rmoqda. Messenjerning 30−50 mlrd dollarga baholanishi ko‘zda tutilmoqda.
Qo‘shimcha imkoniyatlarga ega bulish uchun saytda ro‘yxatdan o‘ting