Kuz faslining so‘nggi kunida O‘zbekistonda sodir bo‘lgan eng muhim xabarlar dayjesti
Nukus voqealari ishi bo‘yicha sudlanuvchilar fikri, Toshkentda o‘tgan qaynonalar forumi, suvaraklarga o‘xshaydigan poraxo‘rlar, Andijon suv omborini boshqarish to‘g‘risidagi qonunlar, quruvchilarni nogironlar aravachasiga o‘tkizib ish sifatini tekshirgan Andijon hokimi va boshqalar — «Gazeta.uz»ning kun dayjestida.
«Ipak yo‘lida turizm» 27-Toshkent xalqaro turizm yarmarkasi ish boshladi
30 noyabr-2 dekabr kunlari «Ipak yo‘lida turizm» Toshkent xalqaro turizm yarmarkasi bo‘lib o‘tadi. Unda dunyoning 30 ta davlatidan 300 nafardan ziyod soha mutaxassislari ishtirokida forum va sessiyalar, modalar namoyishi, B2B uchrashuvlari, gastrobozor, xalqaro oshpazlarning mahorat darslari o‘tkaziladi.
Samarqand Darvoza savdo markazi katta qishki chegirmalarni e’lon qildi
2, 3 va 4 dekabr kunlari Samarqand Darvoza savdo-ko‘ngilochar markazida Hot Winter Sale — 90% gacha chegirmalar taqdim etiladi.
Bosh prokuratura hindistonlik investorning Toshkent hokimiga qarshi ayblovlarini tekshirmoqda
O‘zbekiston Bosh prokuraturasi avvalroq Toshkent hokimi Jahongir Ortiqxo‘jayevni shantajda ayblagan hindistonlik tadbirkor Murari Lal Jalanning bayonotini tekshirishga kirishdi.
Akça Holding kompaniyasi O‘zbekistonda qiymati $250 mln bo‘lgan to‘qimachilik loyihasini ishga tushirmoqchi
Turkiyaning Akça Holding kompaniyasi Namanganda to‘qimachilik bo‘yicha $250 mlnlik investitsiya loyihasini yo‘lga qo‘yishni rejalashtirmoqda. Korxonada ishlab chiqarilgan tekstil mahsulotlari AQSh, Braziliya, Kanada va boshqa mamlakatlarga eksport qilinadi.
Markaziy bank tijorat banklaridagi dollarlashuv darajasini qanday pasaytirmoqchi?
Dollarlashuv darajasining yuqoriligi narxlarni barqarorlashtirishga erishishdagi pul-kredit siyosatining samaradorligini pasaytiradi, deya qayd etdi MB. Bunga qarshi kurashish uchun regulyator inflyatsiyani pasaytirish niyatida, bu esa kredit stavkalari va dollarlashuvni kamaytirishga yordam berishi kutilmoqda.
«Maktablarning qariyb 6 foizida harakat xavfsizligi sinfxonalari tashkil etilgan, xolos» — senator
Senator Qutbiddin Burxonov avtomobil yo‘llarida inson xavfsizligini ta’minlash bo‘yicha prezident qarori ijrosida qator kamchiliklar kuzatilayotganini aytdi. Uning ta’kidlashicha, maktab o‘quvchilariga yo‘l harakati qoidalarini o‘rgatish ishlari ham talab darajasida emas.
Shavkat Mirziyoyev Qirg‘iziston bilan chegara va Andijon suv omborini birgalikda boshqarish to‘g‘risidagi qonunlarni imzoladi
O‘zbekiston va Qirg‘iziston o‘rtasida Andijon (Kampirobod) suv omborining suv resurslarini birgalikda boshqarish to‘g‘risidagi bitimni ratifikatsiya qilish bo‘yicha qonunlar imzolandi.
Farg‘onada 30 kg giyohvand moddalarining noqonuniy aylanmasiga chek qo‘yildi
DXX Farg‘ona viloyatida giyohvand moddalarining noqonuniy savdosi bilan shug‘ullangan shaxslarni aniqladi. Ulardan 30 kgdan ortiq taqiqlangan moddalar musodara qilindi.
Poraxo‘r shaxslar suvaraklarga o‘xshaydi — Akmal Burxonov
Korrupsiyaga qarshi kurashish agentligi rahbari Akmal Burxonov korrupsionerlarni suvaraklarga o‘xshatib, ularni yegulik ko‘p joyda bo‘lishini aytdi.
Toshkentda qaynonalar forumi o‘tkazildi
30 noyabr kuni poytaxtdagi Temiryo‘lchilar madaniyat saroyida qaynonalar forumi o‘tkazildi. Unda Oila va xotin-qizlar davlat qo‘mitasi raisi Zulayho Mahkamova, jamoatchilik faollari va qaynonalar qatnashgan. Forumda 30 noyabrni Qaynonalar kuni, deb e’lon qilish taklifi bildirilgan.
Samarqandda O‘zbekiston — Rossiya hukumatlari rahbarlarining uchrashuvi bo‘lib o‘tadi
Shavkat Mirziyoyev Rossiya prezidenti Vladimir Putin bilan telefon orqali muloqot qildi. Davlat rahbarlari Markaziy Osiyo mintaqasidagi amaliy hamkorlik masalalari yuzasidan fikr almashdi. 1−2 dekabr kunlari Samarqandda ikki davlat hukumatlari rahbarlari darajasidagi qo‘shma komissiya uchrashuvi bo‘lib o‘tadi.
«Mohir aloqachi» ko‘krak nishoni va «O‘z kasbining ustasi» belgisi ta’sis etildi
Vazirlar Mahkamasining tegishli qarori bilan axborot-kommunikatsiya texnologiyalari sohasida «Mohir aloqachi» ko‘krak nishoni va «O‘z kasbining ustasi» belgisi ta’sis etildi.
Andijon hokimi quruvchilarni nogironlar aravachasiga o‘tirg‘izib ishining sifatini tekshirdi
Andijon viloyati hokimi Shuhrat Abdurahmonov Yangi Andijon shahridagi qurilish ishlari bilan tanishish chog‘ida quruvchilarni nogironlar aravachasiga o‘tirg‘izib ishining sifatini tekshirdi. «Bitta nogironni hech qaysing uyingga olib kirolmaysan. Qilayotgan ishimiz bir tiyin bo‘lmaydimi?», — dedi Shuhrat Abdurahmonov.
Davlat aktivlarini boshqarish agentligi binosida quyosh elektr stansiyasi ishga tushirildi
Davlat aktivlarini boshqarish agentligida ishga tushirilgan quyosh elektr stansiyasi muassasaning binosini kunduz kuni elektr energiya bilan to‘liq ta’minlaydi. Shuningdek, ehtiyojdan ortgan qismini hududiy elektr tarmoqlariga uzatish imkoniyati ham yaratildi.
Deputat mahalla raisi daraxt kesish bo‘yicha arizani muhrlamagani uchun so‘kingani aytilmoqda
Uchtepa tumani deputati uy qurilishiga xalaqit bergan 2 daraxtni kesishga ruxsat olish uchun ariza yozib, MFY raisidan uni muhrlab berishni so‘ragan. U buni inkor qilgani uchun deputat xonadan haqorat aytib chiqib ketgan. Rais uning ustidan arz qildi. Deputat esa uni so‘kmagani, o‘ziga-o‘zi noliganini aytmoqda.
Oqqo‘rg‘ondagi 29 ta mahalladagi aholining muammolari o‘rganildi
Prezident maslahatchisi G‘.Mirzayev boshchiligidagi 24 ta vazirlik va idora rahbarlaridan iborat ishchi guruhi 920 ta xonadon va 15 ta ijtimoiy soha obyektini o‘rgandi. Ularda aniqlangan 547 ta masalaning 76 tasi (13,8 foizi) hal qilindi, 471 ta masala bo‘yicha chora-tadbirlar belgilandi.
Salam Air aviakompaniyasi O‘mondan O‘zbekistonga muntazam qatnovlarni yo‘lga qo‘yadi
O‘monning Salam Air aviakompaniyasi O‘zbekistonga muntazam aviaqatnovlarni amalga oshirish uchun ruxsatnoma oldi. Endilikda Maskat — Tashkent — Maskat va Maskat — Namangan — Maskat yo‘nalishlarida muntazam reyslar amalga oshiriladi.
Toshkentda IIO xodimi xizmat vaqtida o‘ldirildi
30 noyabr kuni soat 00:50 larda Olmazor tumani IIO profilaktika inspektori tezkor chaqiruv bo‘yicha «G‘alaba» mahallasida xizmat vazifasini bajarayotgan vaqtida o‘ldirib ketildi. Qotillikda gumonlanayotgan fuqaro muqaddam sudlangan bo‘lib, xodimga tajovuz qilgach, voqea joyidan qochib ketgan.
O‘zbekistonda havo harorati keskin pasayishi kutilmoqda
1 dekabrdan O‘zbekiston hududiga sovuq havo massasi kirib keladi, deya ogohlantirdi O‘zgidromet. Dam olish kunlarida havo harorati kechasi −4…−7 darajagacha, kunduzi 0…+3 darajagacha pasayadi.
Qo‘shimcha imkoniyatlarga ega bulish uchun saytda ro‘yxatdan o‘ting