Давлат тест маркази томонидан 2020−2021-ўқув йилида олий таълим муассасаларига ўқишга қабул қилиш бўйича ўтказилган кириш тест синовлари якуни бўйича маълумот берилди. Бу йил 140 068 нафар абитуриент талабаликка қабул қилинди (ўтган йилдагидан 37 718 нафар кўп).
Пандемия даврида тиббиёт ходимларини рағбатлантириш тартибига ўзгартишлар киритилди. Хусусан, тиббиёт ходимлари ва бошқа ходимларнинг ойлик лавозим маошига 6 фоизлик кунлик қўшимча тўлов бекор қилинди. Ходимларга пул маблағлари банк карталарига ўтказиш орқали амалга оширилади.
Дам олиш кунлари совуқ антициклон туфайли ҳарорат иқлим меъёридан 3−4 даражага пасайиши кутилмоқда. Кейинги ҳафтанинг биринчи ярмида бутун республика ҳудуди ушбу совуқ антициклон таъсирида бўлади, булутлилик ортади, тоғолди ва тоғли ҳудудларда ёғингарчилик кузатилиши мумкин.
Абитуриентларнинг имтиҳон натижалари 25 сентябрь куни соат 15:00 да ДТМ расмий веб-сайтида эълон қилинади. Аввалроқ ДТМ натижалар аллақачон аниқ экани, фақат бу йил кўплаб ёшларга имтиёзлар берилганлиги сабабли, уларни қўшиб чиқиш ишлари якунланаётганлиги ҳақида хабар берган эди.
Россия Ўзбекистонга 2020 йилда 10 миллион доза, 2021 йилда 25 миллион дона коронавирусга қарши вакцина етказиб бериши кутилмоқда. Россия тўғридан тўғри инвестициялар жамғармаси (РТИЖ) ва Laxisam фармацевтика компанияси Ўзбекистонга «Спутник V» вакцинасини юборишга келишувга эришди.
Андижондаги хонадонлардан бирида «Технопарк» компаниясининг ақлли газ ҳисоблагичи портлади. «Ҳудудгазтаъминот» портлашга ҳисоблагич ичида ҳаво-газ аралашмасининг чақнаши сабаб бўлганини маълум қилди.
Россия оммавий ахборот воситалари Каменск-Шахтинскдаги мигрантлар учун мўлжалланган чодирли лагерда 33 ёшли ўзбекистонликнинг вафот этгани ҳақида маълум қилди. Унга бир томонлама пневмония ташхиси қўйилган. Ташқи ишлар вазирлиги ўлимни тасдиқлади, аммо фуқаронинг лагерда яшаганини рад этди.
Пандемия сабабли ҳорижликлар ва Россия фуқаролигига эга бўлмаган шахслар учун мамлакатда қолиш муддати 15 декабргача узайтирилди. Ўзбекистон элчихонаси РФда ноқонуний яшаб келаётган фуқароларни мамлакатда бўлиб туришларини қонунийлаштиришга ва ишлаш учун рухсатномаларни расмийлаштиришга чақирди.
Депутат Дониёр Ғаниев Ички ишлар вазирлиги эпидемияга қарши курашиш қоидалари бузилган тақдирда автомобилларни вақтинча ушлаб туришга рухсат бериш таклифи илгари сурилган қонун лойиҳасини тақдим этганини маълум қилди. Парламент аъзоси ИИВ бу орқали карантин пайтида автомобилларни жарима майдончаларига жойлаштириш ноқонуний эканлигини тан олганини тахмин қилди. ЙҲХББ маълумотларига кўра, карантин қоидалари бузилгани учун энг камида 155,8 мингта автомобиль жарима майдончаларига жойлаштирилган.
Президент «Таълим тўғрисида"ги қонунга имзо чекди. Мазкур қонун билан 1997 йилда қабул қилинган «Таълим тўғрисида"ги ҳамда «Кадрлар тайёрлаш миллий дастури тўғрисида"ги қонунлар ўз кучини йўқотди.
23 сентябрь — Халқаро имо-ишоралар тили куни. Имо-ишоралар тилининг Ўзбекистондаги мақоми қандай ва карларнинг маълумот олиш ҳуқуқлари қай даражада ҳимояланган? Карлар ҳуқуқлари фаоли Маъмур Aҳлиддинов ва «Газета.uz» колумнисти Дилмурод Юсупов саволларга ойдинлик киритишга ҳаракат қилишди.
Мобиль қурилмаларнинг IMEI-кодларини пулли рўйхатга олишдан, ҳисоб-китобларга кўра, 135,5 млрд сўм тўпланди. Жами бўлиб 47 миллиондан зиёд код рўйхатга олинган. АКТ вазирлиги мобиль қурилмаларнинг расмий импорти ҳажми бир неча баробарга ўсганини маълум қилди.
Ўзбекистонда жисмоний шахсларга тегишли бўлган 2,5 млндан ортиқ автотранспорт воситалари мавжуд, шулардан 93% енгил автомобиллар. Энг кўп автотранспорт воситалари Тошкент шаҳрига, энг ками эса Сирдарё вилоятига тўғри келмоқда.
Тошкент метросининг 17 та бекатида биттадан чиқиш вестибюллари «ишлаб чиқариш эҳтиёжлари сабабли» вақтинча ёпилади. Бу қанча вақтгача давом этиши ҳақида аниқ маълумот берилмаган.
Россиянинг Қозоғистон билан чегара олди ҳудуди Самара вилоятида тўпланиб қолган фуқароларни ватанга олиб келиш мақсадида махсус автобус қатнови ташкил этилди. 15 та автобусдан иборат илк карвон Самара вилоятига йўлга чиқди.
Ўзбекистонда ипотека кредитини ажратишнинг соддалаштирилган тизими жорий этилади. Бу борадаги тажриба Андижоннинг учта туманида амалга оширилмоқда.
Ўзбекистонда коронавирус бўйича расмий статистика маълумотлари юзасидан саволлар бор. Daryo.uz нашрининг беморлар 2−3 кун ичида «тузалиб кетаётгани» тўғрисидаги мақоласидан кейин Соғлиқни сақлаш вазирлиги ҳудудлар бўйича батафсил статистикани эълон қилишни тўхтатди. Олдинроқ вафот этган коронавирус беморларининг жинси, ёши, исм-шарифининг бош ҳарфлари ва яшаш (даволаниш) жойлари бўйича маълумотларни очиқлаш ҳам тўхтатилган эди.
Самарқанд шаҳар бош имом-хатиби Нуриддинхон Исломов 73 ёшида ҳаётдан кўз юмди.
Навоий вилоятида Lacetti ҳайдовчисининг қарама-қарши йўлга чиқиб кетиб, Nexia автомобили билан тўқнашиши оқибатида икки киши ҳалок бўлган, яна уч киши тан жароҳатлари олган ва касалхонага ётқизилган.
Ижтимоий тармоқларда ҳижоб кийган аёллар ИИББ томонидан ушланганлиги айтилган видео тарқалди. Тошкент шаҳар ИИББнинг изоҳлашича, ушбу фикрлар ҳақиқатдан йироқ ва рўмол ўраган аёлларга ҳеч қандай озор берилмаган. Айтилишича, ушбу фуқаролар жамоат жойида тиббий ниқобсиз бўлган ва инспекторлар томонидан профилактик суҳбатлар ўтказилган.
Қўшимча имкониятларга эга булиш учун сайтда рўйхатдан ўтинг