Мобил илова орқали кўрсатиладиган давлат хизматларини 100 тага етказиш зарур — президент
Шавкат Мирзиёев рақамли технологияларни жорий этиш чора-тадбирларига оид тақдимот билан танишди. Унда рақамли иқтисодиёт хизматларини 16 трлн сўмга, компьютер дастурлари экспортини 40 млн долларга етказиш мумкинлиги таъкидланди. Бундан ташқари, мобил илова орқали кўрсатиладиган давлат хизматлари сонини 100 тага етказиш белгиланди. Вазир, вилоят, туман ва шаҳар ҳокимлари порталларини шакллантириш бўйича топшириқ берилди.
Амир Темур хиёбонидаги оммавий тўпланишга россиялик блогер сабаб бўлган — пойтахт ИИББ
13 июль куни Амир хиёбонида 150−200га яқин фуқаролар тўпланган. Тошкент шаҳар ИИББнинг маълум қилишича, бунга россиялик блогер, «Субо»нинг обуначиларига пул тарқатиш ҳақидаги эълони сабаб бўлган. Ички ишлар органлари томонидан тўпланган фуқароларга карантин қоидаларига риоя қилиш ва оммавий тўпланмаслик кераклиги тушунтирилган ҳамда улар тарқатилган, дейилади бошқарма баёнотида.
12 нафар ўзбекистонликлар Буюк Британиянинг «олтин визаси» ни олган
2008 — 2020 йилларда 12 нафар ўзбекистонликка Буюк Британиянинг «олтин визаси» берилган, бироқ уларнинг кимлиги ҳақида маълумот йўқ. Ҳисоботга кўра, мазкур визаларнинг аксариятини коррупция хавфи юқори бўлган Хитой, Россия, Гонгонг ва АҚШ каби мамлакатлар фуқаролари олган.
Халқ таълими тизимига қарийб 45 минг нафар эркак ўқитувчи қайтди
Ўзбекистонда қарийб 45 минг нафар эркак ўқитувчи халқ таълими тизимига қайтди. Шунингдек, ўрта махсус маълумотли ўқитувчилар сони 64 минг 892 нафардан 46 минг 214 нафарга (30%га) камайган.
Августда «Темир дафтар»даги оилаларнинг 18 ёшгача бўлган фарзандларига 500 минг сўмдан берилади
Президент фармони билан, август ойида «Темир дафтар»га киритилган оилаларнинг 18 ёшгача бўлган ҳар бир фарзандлари учун 500 минг сўмдан бир марталик моддий ёрдам кўрсатилади. Шунингдек, фармон билан ёшларни қўллаб-қувватлаш бўйича бошқа қатор чоралар эълон қилинди.
Фарғона водийсининг тоғли ҳудудларига сел келиши хавфи кутилмоқда
Ўзгидромет кеча Наманган вилоятининг Косонсой туманида содир бўлган, саккиз киши ҳалок бўлган сел келиши ҳолати бўйича маълумот берди. Шунингдек, 15−16 июль кунлари Андижон, Наманган ва Фарғона вилоятларининг тоғ олди ва тоғли ҳудудларида сел келиши хавфи борлиги ҳақида хабар берилди.
Вакцина олиш учун яратилган имкониятлардан 2 баравар паст даражада фойдаланяпмиз — Нурмат Отабеков
СЭС раҳбари ўринбосари Нурмат Отабеков таъкидлашига кўра, ҳозирда Ўзбекистон бўйлаб эмлаш тадбирлари учун яратилган имкониятларнинг тенг ярмидан фойдаланилмоқда. Ҳар бир эмлаш пунктида кунига 36 нафар фуқаро эмланмоқда, режада эса 70 киши бўлган. «Вакцинадан бошқа биз эпидемик вазиятни барқарорлаштирадиган бир таклифни ёки қандайдир ташаббусни кўрмаяпмиз», — деди у. Шунингдек, вакцинация жараёнларида фаол иштирок этаётган тиббиёт ходимларига рағбат сифатида моддий қўллаб-қувватлаш механизмларини жорий этиш режалаштирилмоқда.
ЎзХДП йўлларда радарлардан фойдаланиш тартибини қайта кўриб чиқишни таклиф қилмоқда
ЎзХДП депутати Шерзод Раҳмонов айрим йўл ҳаракати қоидаларини қайта кўриб чиқиш зарурлигини таъкидлади. Хусусан, партия ҳаракатланаётган транспорт воситаларида радарлардан фойдаланишни бекор қилишни ва барча турдаги радарларнинг жойлашуви онлайн режимда кўрсатилишини таклиф қилмоқда.
Фарғонада 50 сотих ерни 25 минг долларга сотмоқчи бўлган шахс қўлга олинди
Фарғона вилоятида қурилиш балансида бўлган 50 сотих ер майдонини 25 минг долларга сотмоқчи бўлган шахс қўлга олинди. Шунингдек, Наманган вилояти, Бухоро вилояти, Сирдарё вилоятининг Сардоба, Тошкент шаҳрининг Чилонзор ҳамда Навоий вилоятининг Қизилтепа туманларида ҳам ноқонуний ер сотиш билан боғлиқ ҳолатлар аниқланди.
Тошкент ҳокимлиги давлат органлари томонидан етказилган зарарни қоплаб беради
Тошкент бюджетидан давлат органлари ёки ушбу органлар мансабдор шахсларининг қонунга хилоф ҳаракатлари (ҳаракатсизликлари) натижасида фуқаролар ёки юридик шахсларга етказилган моддий ва маънавий зарарни қоплаш харажатлари учун 5,72 млрд сўм ажратилади. Ҳокимнинг қарорига биноан етказилган зарар суд қарорлари асосида қопланади.
Янги Ўзбекистон университетида бир йиллик контракт нархи қарийб 50 млн сўм бўлади
Янги Ўзбекистон университетида маҳаллий талабалар учун бир йиллик контракт нархи 49 млн 700 минг сўм эканлигини маълум қилинди. Хорижий талабалар учун эса 10 минг доллар этиб белгиланди.
«Қонун маҳаллий блогерга ҳам, хорижий блогерга ҳам баробар бўлиши керак» — Комил Алламжонов
Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов фикрига кўра, россиялик блогер Субхан Мамедов (Subo) билан профилактик суҳбат эмас, балки «унга нисбатан ёлғон маълумот тарқатиб, жамоат тартиби ва соғлигига хавф туғдиргани, йиғилишлар ўтказиш тартибини бузгани» нуқтаи назаридан ҳуқуқий баҳо берилиши керак.
ССВ Амир Темур хиёбони яқинидаги оммавий тўпланиш бўйича изоҳ берди
Карантин қоидалари ва чекловлари қўпол равишда бузилаётган ҳолатлар, хусусан, 13 июль куни Тошкентдаги Амир Темур хиёбонида 150−200 нафарга яқин ёшлар йиғилган ҳолати эпидемиологик вазиятнинг янада оғирлашишига олиб келиши мумкин, дея маълум қилди Соғлиқни сақлаш вазирлиги. «Касалликнинг янги штаммлари тез юқиши, жадал ривожланиши ҳамда яширин равишда организмни кучли жароҳатлаши кузатилмоқда», — дея қўшимча қилинади хабарда.
Андижонда ИИБ ходимлари фуқаронинг қўлини синдиргани рад этилди
Андижон шаҳар депутати Жаҳонгир Жиянов ИИБ ходимлари фуқаронинг қўлини синдиргани ҳақида хабар берди. Бош прокуратура Андижон шаҳар прокуратураси терговга қадар текширув ўтказаётганини маълум қилди. ИИВ матбуот котиби эса фуқарога ИИБ ходимлари томонидан жароҳат етказилганини рад этди. Хабар берилишича, фуқаро эрталаб тез тиббий ёрдам бўлимига ИИО ходимлари тан жароҳати етказганлиги бўйича мурожаат этган. Ҳозирда фуқаро жароҳатни қаерда олганлиги бўйича суриштирув ишлари амалга оширилмоқда.
Ўзбекистонга яқин ойларда қарийб 5 млн доза вакцина олиб келинади
20−25 июль кунлари ZF-UZ-VAC 2001 вакцинасидан қўшимча 4 млн доза олиб келинади. Шунингдек, август-cентябрь ойларида Спутник V вакцинасидан 160 минг доза COVAX дастури доирасида яна 660 минг доза (AstraZeneca ёки Moderna) вакциналари олиб келиниши кутилмоқда, дея хабар берди депутат Дониёр Ғаниев.
«Газета.uz»да чиққан мақолалар:
«Мактабнинг мақсади „универсал одам“ яратиш эмас» — Республика таълим маркази директори
Республика таълим маркази директори Шуҳрат Сатторовнинг фикрича, ўқув дастурлари ва дарсликларда асосий эътибор ўқувчиларга қоидалар ва маълумотларни ёдлатишга эмас, мустақил ҳаётда керак бўладиган кўникмаларни ривожлантиришга қаратилиши керак. Бироқ бундай ёндашув асосида дарсликлар яратиш жараёни ҳар доим ҳам силлиқ кечаётгани йўқ. Бу ҳақида у «Газета.uz»га берган интервьюсида гапириб берди.
